Leza wakasyomezya musinsimi Abrahamu kuti umwi walunyungu lwakwe wakali kuyooleta zilongezyo ‘kumasi oonse aamunyika.’ (Matalikilo 22:18) Ino ooyo wakali kuyooba ni?

Myaka iitandila ku 2,000 yainda, Leza wakapa Jesu nguzu zyakucita maleele aagambya, walo iwakali walunyungu lwa Abrahamu. Maleele aayo akatondezya kuti cisyomezyo ncaakaambilwa Abrahamu cakali kuyoozuzikizyigwa kumasi kwiinda muli Jesu.—Bagalatiya 3:14.

Maleele Jesu ngaakacita akagwasya bakali kumulangilila kuzyiba kuti ngonguwe Leza ngwaakasala kulongezya bantu alimwi akatondezya mbwayoomubelesya Leza kulongezya bantu kukabe kutamani. Amubone maleele ngaakacita Jesu mbwaatondezya bube bubotu bumwi mbwajisi.

Luzyalo—Jesu wakaponya baciswa.

Ciindi cimwi, sicinsenda wakalomba Jesu kuti amuponye. Jesu wakamujata akwaamba kuti: “Ndilayanda!” Mpoonya aawo cinsenda cakwe cakamana.—Marko 1:40-42.

Bwaabi—Jesu wakabasanina ibakafwide nzala.

Jesu tanaakali kuyanda kuti bantu kabafwa nzala. Kwaziindi zili mbozibede, camaleele Jesu wakasanina bantu banji kwiinda mukubelesya buyo zinkwa alimwi answi zisyoonto. (Matayo 14:17-21; 15:32-38) Nobakamana kulya, boonse bakakkuta alimwi kwakacaala cakulya cinji.

Lweetelelo—Jesu wakabusya bafwide.

Akaambo ‘kaluzyalo,’ Jesu wakabusya mwana musankwa alikke ngwaakajisi mukamufwu walo iwakanyina wakumugwasyilizya.—Luka 7:12-15.