AMWEEZYEEZYE kuti muli Munakristo uupona mumwaanda wamyaka wakusaanguna. Kumane mbungano yanu yatambula lugwalo kuzwa kumwaapostolo Paulo. Ciindi nolubalwa, mwajana kuti mwaapostolo Paulo kanji-kanji wazubulula Magwalo manji kuzwa ‘kumagwalo aasalala’ aa Chihebrayo. (2 Timoteyo 3:15) Mpoonya mwalyaambauzya mumoyo kuti ‘ndiyanda kwaabona aawo mpaakazubulula majwi aayo.’ Pele eeco inga tiicaba cuuba-uba. Ino nkaambo nzi?

Amuyeeye buyo mbwaakabede mabbuku “aamalembe aasalala” muciindi ca Paulo. Cimwi cibeela cilitondezyedwe aawa—cibeela cabbuku lyakuvwunga lyamusinsimi Isaya kuzwa mu Lwizi Lutajisi Buumi. Ino ncinzi ncomubona? Mwala aalembedwe mabala! Kunyina twaandaanyo. Alimwi kunyina manamba aazyaandaano atupango nzyotubelesya mazuba aano.

Balembi ba Bbaibbele tiibakaandaanya mulumbe wabo kuba zyaandaano naa tupango. Bakaile kulemba mulumbe woonse Leza ngwaakabapa kutegwa basikubala kabakonzya kujana mulumbe woonse antoomwe, kutali tubeela tusyoonto-syoonto twamulumbe. Sena eeco tacili ncomuyanda mwatambula lugwalo luyandika kuzwa kumuntu ngomuyanda? Mulalubala lugwalo loonse, kutali buyo tubeela tusyoonto-syoonto twalugwalo.

Nokuba boobo kubula zyaandaano atupango kwakalijisi buyumuyumu. Paulo wakali kukonzya kuzyiba magwalo aakwe kwiinda mumajwi aakuti “mbubonya mbokulembedwe kuti” naa “mbubonya Isaya mbwaakaambila limwi kuti.” (Baroma 3:10; 9:29) Alimwi nicali ciyumu kujana majwi aayo ccita kuti muntu kaazyi kabotu “malembe aasalala.”

Kuyungizya waawo, aayo “malembe aasalala” tiiwakali buyo mulumbe omwe muuba-uba uuzwa kuli Leza. Kusika kumamanino amwaanda wamyaka wakusaanguna C.E., akabikkwa antoomwe kuba mabbuku aali 66. Nkakaambo kaako basikubala Bbaibbele mazuba aano balikkomene kuba amanamba aazyaandaano aatupango zyalo izibagwasya kujana makani aagaminide, mbuli majwi manji aakazubululwa mumagwalo aa Paulo.

Ambweni, mulakonzya kubuzya kuti, ‘ino nguni wakabikka manamba aazyaandaano aatupango mu Bbaibbele?’

Musololi wacikombelo waku England Stephen Langton, walo wakazikuba Archbishop waku Canterbury, nguuzyibidwe kuti nguwakabikka zyaandaano mu Bbaibbele. Wakacita oobo kumatalikilo aamwaanda wamyaka wa 13 C.E., ciindi naakali mwiiyi ku University of Paris ku France.

Katanabako Langton, basyaazibwene bakasola nzila zinji zyakwaandaanya Bbaibbele muzibeela zisyoonto-syoonto, ambweni, akaambo kakuyanda kuvwuntauzya (reference). Mulakonzya kuyeeyela mbocakali kukonzya kuuba-uba kulimbabo kujana cibalo kuti kabayandaula mucaandaano comwe buyo kwiinda mubbuku lyoonse, mbuli bbuku lya Isaya lijisi zyaandaano zili 66.

Nokuba boobo, zyoonse eezyi, zyakaleta buyumuyumu. Basyaazibwene bakapanga nzila zinji ziindene-indene alimwi ziteendelani. Nzila imwi, Makani Mabotu aa Marko aakaandanizyigwa muzyaandaano zitandila ku 50, kutali zili 16 nzyotujisi lino. Ku Paris mumazuba aa Langton, kwakali basicikolo bakali kuzwa muzisi zinji, alimwi bakaletelezya ma Bbaibbele  kuzwa kuzisi zyabo. Nokuba boobo, bamayi alimwi abasicikolo tiibakali kupandulwidana cibalo ncobakali kwaamba kuzwa mumalembe. Ino nkaambo nzi? Akaambo kakuti zyaandaano muma Bbaibbele aabo tiizyakali kweendelana.

Aboobo Langton wakayeeya muzeezo mupya wakwaandaanya zyaandaano. Bbuku litegwa The Book—A History of the Bible lyakaamba kuti, nzila yakwe “yakabakkominisya basikubala alimwi abalembi,” alimwi “yakamvwika cakufwambaana mu Europe.” Wakatupa manamba aazyaandaano nzyotujana muma Bbaibbele manji aamazuba aano.

Mumyaka iili 300 yakatobela, akati-kati kamwaanda wamyaka wa 16, sikusimba uudumide kapati muna France-syaazibwene Robert Estienne wakazyuubya-ubya kapati zintu. Makanze aakwe akali aakusumpula kwiiya Bbaibbele. Wakazyiba mbocakali kukonzya kugwasya ikuba anzila iitobeleka yamanamba aazyaandaano alimwi aatupango.

Estienne tanaakaba amuzeezo wakwaandaanya Bbaibbele mutupango. Bamwi bakalicitide kale oobo. Mucikozyanyo, mumyaanda yamyaka yamusyule, mulembi umwi mu Juda wakalyaandaanya Bbaibbele lyoonse lya Chihebrayo, naa cibeela ca Bbaibbele ciitwa kuti Cizuminano Cakaindi, mutupango amuzyaandaano. Alimwi, nobakali kuyaabubikka zyaandaano, tiibakali kweendelanya.

Estienne wakaandaanya Magwalo aa Banakristo aa Chigiriki, naa aaitwa kuti Cizuminano Cipya, mucibeela cipya camanamba aatupango alimwi akutubikka antoomwe atooto itwakali kale mu Bbaibbele lya Chihebrayo. Mu 1553, wakalemba Bbaibbele lyakusaanguna likkwene (lyamuci French) kalijisi zyaandaano atupango ntomunya totubelelsya muma Bbaibbele ngotubelesya mazuba aano. Bantu bamwi tiibakakkomana alimwi bakaamba kuti tupango twakaandaanya mulumbe wamu Bbaibbele mutubeela, akupa kuti kaliboneka mbuli kuti zibeela zyaandeene alimwi twaambo tutaswaangene. Pele nzila njaakabelesya yakatambulwa cakufwambaana akubelesyegwa abasikusimba Bbaibbele.

Manamba aazyaandaano alimwi aatupango aboneka kuba cintu cuuba-uba. Eeci cipa kapango kamwi akamwi kamu Bbaibbele mbokeelede kwiitwa. Masimpe, kwaandaanizyigwa kwazyaandaano atupango tiizyakasololelwa amuuya wa Leza, alimwi ziindi zimwi zilakosola mulumbe wamu Bbaibbele mumasena aateeleli. Pele kulatugwasya kugama majwi aazubuludwe alimwi akutondezya bamwi tupango itujisi bupanduluzi mbotuyanda mbubwenya mbotutondezya majwi ngotuyanda kapati kuti katwaayeeya mucibalo naa mubbuku.

Nokuba kuti kwaandaanizyigwa kwazyaandaano atupango kulagwasya, lyoonse kuyandika kuyeeya kuti iciyandika kapati nkubona makani mapati, nkokuti kumvwisya mulumbe woonse Leza ngwaakatupa. Amube acilengwa cakubala cibalo coonse muciindi cakubala buyo tupango tusalidwe. Kucita boobo kuyoomugwasya kapati kwaazyiba kabotu ‘malembe aasalala, aayo aakonzya kumupa kuti mube basongo kutegwa mukafwutuke.’—2 Timoteyo 3:15.