Ncolyaamba Bbaibbele Kujatikizya Ciluzi Acitaluzi Ncotukonzya Kusala
Kusala kwesu kujatikizya kutobela zyeelelo zyakulilemeka, kuyoobujatikizya kapati buumi bwesu bwakumbele. Jehova Leza ulizyi oobo. Nkakaambo kaako uyanda kuti katupona kweelana azyeelelo zyakwe.
Jehova ulayanda kuti katujisi luumuno alimwi katukkomene mubuumi.
“Mebo, nde Jehova ndime Leza wako, ndime ndikuyiisya kuti ugwasyigwe, uukusololela munzila moyelede kweendela. Eelo kaka inga cabota kuti waiswiilila milawo yangu! Aboobo luumuno lwako inga lwaba mbuli mulonga abululami bwako mbuli mayuwe aamulwizi.”—Isaya 48:17, 18.
Mbwali Mulengi wesu, Leza uliizyi nzila yiinda kubota kujatikizya mbotweelede kupona. Uyanda kuti katutobela zyeelelo zyakwe akaambo kakuti zibambilidwe kutugwasya. Ciindi notutobela milawo ya Leza, tacidoonekwi buya kuti cakusala cesu ciyoozwidilila. Lyoonse tunoopanga cakusala ciluzi calo cisololela kuluumuno alimwi alukkomano.
Jehova inga taatwaambila kucita cintu ncotutakonzyi
“Mulawo ooyu ngondimulailila sunu tauli muyumu kutobela, alimwi tauli kule.”—Deuteronomo 30:11.
Kupona kweelana azyeelelo zya Leza zyakulilemeka kuyandika kupanga kucinca mubuumi caboola mbotuyeeya alimwi ambotucita zintu. Nokuba boobo, Jehova tatwaambili kucita zintu nzyotutakonzyi. Amana buya mbwali Mulengi wesu, ulizyi nzyotuyandika mubuumi. Mbotuyaabumuzyiba Jehova, tuyoojana kuti “milawo yakwe tiiminyi.”—1 Johane 5:3.
Jehova usyomezya kuti uyoobagwasya aabo basala kupona kweelana azyeelelo zyakwe.
“Mebo nde Jehova Leza wako, ndilikujatide kujanza lyako lyalulyo, ndendime yooyo uukwaambila kuti, ‘utayoowi pe. Mebo ndilakugwasya.’”—Isaya 41:13.
Tulakonzya kupona munzila njayanda Leza akaambo kakuti ulilibambilide kutugwasya. Ulakonzya kutugwaya kwiinda mu Jwi lyakwe Bbaibbele, lyalo litukulwaizya akutupa bulangizi.
Bantu banji munyika yoonse bajana kuti kupona kweelana azyeelelo zyamu Bbaibbele kwabagwasya kucinca maumi aabo. Aboobo tumukulwaizya kuti mwiiye zinji kujatikizya lulayo lubotu ndolipa Bbaibbele. Mulakonzya kucita oobo kwiinda mukulanga-langa broshuwa iiyeeme a Bbaibbele yakuti Amupone Kukabe Kutamani! yalo njomukonzya kubweza kakunyina kubbadela a jw.org. Ijisi ziiyo eezyi zitobela:
-
Mbuti Bbaibbele Mbolikonzya Kumugwasya?
-
Bbaibbele Lilapa Bulangizi
-
Sena Mulakonzya Kulisyoma Bbaibbele?
Ciindi nomulanga-langa Jwi lya Leza Bbaibbele, muyoojana kuti licibeleka naaba mazuba aano; ‘lilasyomeka ciindi coonse, lino mane kukabe kutamani.’ (Intembauzyo 111:8) Kutobela zyeelelo zyakulilemeka zijanika mu Bbaibbele njenzila yiinda kubota. Nokuba boobo, Leza takatusinikizyi kucita boobo. (Deuteronomo 30:19, 20; Joshua 24:15) Eeci ncakusala umwi aumwi ncayelede kupanga.
