Ncolyaamba Bbaibbele Kujatikizya Ciluzi Acitaluzi Kulakonzya Kutugwasya
Bbaibbele lyabagwasya bantu banji kapati mumbazu zyone
1. Cikwati
Bantu bajisi mizeezo yiindene-indene kujatikizya cikwati alimwi ancobeelede kucita kutegwa kabakkomene
BBAIBBELE LYAAMBA KUTI: “Umwi aumwi wanu weelede kuyanda mukaintu wakwe mbubonya mbwaliyanda mwini; kunze lyaboobo, mukaintu awalo weelede kumulemeka kapati mulumaakwe.”—Baefeso 5:33.
BUPANDULUZI: Cikwati mbubambe bwakatalisyigwa a Leza, aboobo ulizyi iziyandika kutegwa banabukwetene kabakkomene. (Marko 10:6-9) Lukkomano akati kabanabukwetene lulaboola ciindi aumwi nayeeya nzyayandika mweenzinyina kutali nzyayanda walo. Mwaalumi uumuyanda mukaintu wakwe umweendelezya kabotu alimwi akumulanganya kabotu. Alimwi mukaintu ulamugwasyilizya mulumi wakwe alimwi akwaambaula cabulemu anguwe.
BUSOLOZI MBOLIPA BBAIBBELE BULAGWASYA: Ba Quang alimwi aba Thi, baku Vietnam, bakali kuyeeya kuti kunyina nobakonzya kujana lukkomano mucikwati cabo. Ba Quang kanji-kanji tiibakali kutondezya luzyalo. Bakaamba kuti: “Tiindakali kubikkila maano mbobakali kulimvwa bakaintu bangu alimwi kanji-kanji ndakali kucita zintu izyakali kubacisizya moyo.” Aboobo ba Thi bakali kuyanda kuti balekane amulumi wabo. Bakaamba kuti: “Ndakali kulimvwa kuti tiindakali kukonzya kubasyoma naa kubalemeka balumi bangu.”
Mukuya kwaciindi, ba Quang aba Thi bakaiya ncolyaamba Bbaibbele alimwi ambobakonzya kubelesya lugwalo lwa Baefeso 5:33 mucikwati cabo. Ba Quang bakaamba kuti: “Lugwalo oolu lwakandigwasya kubona ncociyandika kuba aluzyalo akupa ba Thi kulimvwa kuyandwa alimwi akubikkilwa maano. Eeci cakapa kuti kabandiyanda alimwi akundilemeka kapati.” Ba Thi bakaamba kuti: “Ciindi nondibelesya ncolwaamba lugwalo lwa Baefeso 5:33 alimwi akubalemeka balumi bangu, inga ndilimvwa kuyandwa, kukwabililwa alimwi akuba aluumuno.”
Kutegwa muzyibe zinji kujatikizya cikwati, amubale Sinsimuka! No. 2 2018, iijisi mutwe wakuti “Nzila Izili 12 Zikonzya Kupa Kuti Mukwasyi Uzwidilile” a jw.org.
2. Mbotweelede Kweendelezya Bamwi
Bantu kanji-kanji tababeendelezyi kabotu bamwi akaambo kamubala, cisi, mbobalibonya, bukombi naa bantu banyomenena koonana ambobakozyenye limwi zizo.
BBAIBBELE LYAAMBA KUTI: “Amubalemeke bantu bamisyobo yoonse.”—1 Petro 2:17.
BUPANDULUZI: Bbaibbele kunyina nolituyiisya kusalulula bantu bamubala uumbi, cisi nkobazwa naa aabo boonana abantu mbobakozyenye limwi zizo. Muciindi caboobo, litukulwaizya kulemeka bantu boonse, tacikwe makani balivwubide naa mbacete. (Milimo 10:34) Nokuba kuti nzyobasyoma ziliimpene anzyotusyoma akuti naa bacita zintu munzila yiindene ambotucita zintu swebo, tulakonzya kunoobelendelezya caluzyalo alimwia cabulemu.—Matayo 7:12
BUSOLOZI MBOLIPA BBAIBBELE BULAGWASYA: Daniel wakayiisyigwa kubona bantu baku Asia kuti balakonzya kubikka cisi cakwe muntenda. Wakatalika kubasulaika bantu baku Asia akutalika kubatukila buya abuleya. Daniel wakaamba kuti. “Ndakali kuyeeya kuti ndigwasyilizya cisi cangu. Alimwi tiindakali kuyeeya kuti nzyondakali kucita tiizyakaluzi.”
Mukuya kwaciindi Daniel wakaiya ncoliyiisya Bbaibbele. Wakaamba kuti: “ndakeelede kucinca cakumaninina kujatikizya mbondakali kuyeeya. Ndakeelede kubona bantu mbubwenya mbwababona Leza akuti toonse tuleelene tacikwe makani ankotuzwa.” Daniel ulaamba mbwalimvwa lino ciindi nabonana abantu. Wakayungizya kuti: “Kulindime tacikwe makani ankobazwa. Lino ndilabayanda bantu bamisyobo yoonse alimwi ndilijisi balongwe nyika yoonse.”
Kutegwa muzyibe zinji, amubale Sinsimuka! No. 3 2020, iijisi mutwe wakuti, “Sena Kuli Cikonzya Kumana Lusalululo?” icijanika a jw.org.
3. Mali
Bantu banji baliyandawida lubono kutegwa kabakkomene lino alimwi akuyoopona buumi bubotu kumbele.
BBAIBBELE LYAAMBA KUTI: “Busongo bulakwabilila mbubonya mbuli mali mbwaakwabilila, pele bubotu bwaluzyibo mbwakuti: Busongo bupa kuti ooyo uubujisi azumanane kupona.”—Mukambausi 7:12.
BUPANDULUZI: Kuba aalukkomano alimwi akuyoopona buumi bwakumbele bubotu takuyeeme amali. (Tusimpi 18:11; 23:4, 5) Muciindi caboobo, kuba alukkomano lwini-lwini alimwi akuyooba abuumi bubotu bwakumbele kuyeeme akubelesya busongo bujanika mu Bbaibbele.—1 Timoteyo 6:17-19.
BUSOLOZI MBOLIPA BBAIBBELE BULAGWASYA: Ba Cardo, baku Indonesia bakali kubikkila maano kukujana lubono. Bakaamba kuti: “Ndakalibukkede naa kuti ndakali aalubono lunji kapati. Ndakali kuunka kufwumbwa nkondiyanda, kuula cili coonse ncondiyanda mbuli mamoota alimwi amaanda.” Pele lubono lwabo lwakamana. Ba Cardo bakaamba kuti: “Mukulaba buyo kwaliso ndakabbidwa mali woonse ngondakabelekela canguzu kwamyaka minji. Ndakabeleka canguzu kwamyaka minji kutegwa ndijane lubono lunji, pele aciindi eeci ndakatyompwa kapati akaambo kakuti ndakasyaala buyo cinkwa maanza alimwi ndakalimvwa kubula mpindu mubuumi.”
Ba Cardo bakatalika kubelesya njiisyo zyamu Bbaibbele kujatikizya mali. Muciindi cakulijaya kubeleka kuyandaula lubono lunji bakatalika kupona buumi buuba-uba. Bakati: “Lino ndilimvwa kuti ndilivwubide kapati akaambo kakuti ndijisi cilongwe ciyumu a Leza. Lino ndiloona cakuliiba alimwi buya ndilikkomene.”
Kutegwa muzyibe zinji kujatikizya ncolyaamba Bbaibbele caboola kumali, amubale cibalo cijisi mutwe wakuti “Sena Lwiiyo Alimwi Amali Zilakonzya Kupa Muntu Kuyooba Abuumi Bubotu Kumbele? Mu Ngazi Yamulindizi No. 3 2021, a jw.org.
4. Koonana
Bantu bajisi mizeezo yiindene-indene kujatikizya ciluzi caboola kumakani akoonana.
BBAIBBELE LYAAMBA KUTI: ‘Amulilesye kubwaamu. Umwi aumwi wanu azyibe kweendelezya mubili wakwe mwini munzila iisalala alimwi mubulemu, ikutali muluunyaunya lwabulyato, mbuli loolo lujisi bamasi batamuzyi Leza.’—1 Batesalonika 4:3-5.
BUPANDULUZI: Bbaibbele lilatwaambila mbotweelede kwaabona makani akoonana. Bbala lyakuti “bwaamu” libikkilizya bumambe, buvwuule, koonana kwabantu batakwetene, koonana kwabantu bajisi zizo zikozyenye alimwi akoonana abanyama. (1 Bakorinto 6:9, 10) Koonana ncipego kuzwa kuli Leza calo cizumizyidwe buyo kubantu bakwetene.—Tusimpi 5:18, 19.
BUSOLOZI MBOLIPA BBAIBBELE BULAGWASYA: Mukaintu waku Australia wazina lyakuti Kylie wakaamba kuti: “Kanditanakwatwa, ndakali kuyeeya kuti koonana kulakonzya kundipa kulimvwa kuyandwa alimwi akukwabililwa. Pele cakacitika cakaliimpene ambondakali kuyeeya. Tiindakalimvwa kukwabililwa alimwi akuyandwa.”
Mukuya kwaciindi, Kylie wakaiya ncolyaamba Bbaibbele kujatikizya koonana alimwi akutalika kupona kweelana aancakaiya. Wakaamba kuti: “Leza wabikka zyeelelo kutegwa atukwabilile. Lino ndilimvwa kukwabililwa alimwi akuyandwa akaambo kakucita zintu kweelana ambwayanda Jehova. Kutobela busolozi bwamu Bbaibbele kwandigwasya kapati kutegwa nditanjili mumapenzi.”
Kutegwa muzyibe zinji amubale cibalo cijisi mutwe wakuti: “Ino Bbaibbele Lyaamba Nzi Kujatikizya Kukkala Antoomwe Amuntu Ngomutakwetene Limwi?” icili a jw.org.
Mulengi wesu ulatugwasya kuzyiba ciluzi acitaluzi. Nokuba kuti talili lyoonse nocili cuuba-uba kutobela zyeelelo zijatikizya kulilemeka nzyatubikkilide, kucita boobo kulagwasya kapati. Tulaalusyomo lwakuti ikuti naa twazitobela zyeelelo zyakwe tunookkomene lyoonse.
