1. Ino ncinzi Jehova ncayanda mazuba aano?

 MAZUBA AANO nkuyanda kwa Leza ikuti makani mabotu aa Bwami akambaukwe munyika yoonse. (Mk. 13:10; 1Tim. 2:3, 4) Mulimo ooyu nguwa Jehova, alimwi wakasala Mwanaakwe uuyandwa kuti kausololela. Aboobo tulijisi lusyomo lwakuti, mbwaanga Jesu ulatusololela, mulimo wakukambauka uyoomana kweelana ambwayanda Jehova mamanino kaatanasika.—Mt. 24:14.

2. Ncinzi ncotutiibandike mucibalo eeci?

² Mucibalo eeci, tulabona Jesu mbwabelesya “muzike uusyomeka alimwi uucenjede,” ikupa cakulya cakumuuya akugwasyilizya basikumutobela kujatikizya mbobakonzya kuubeleka mulimo ooyu mupati wakukambauka. (Mt. 24:45) Kuyungizya waawo, tulabona umwi aumwi wesu ncakonzya kucita kutegwa agwasyilizye Jesu alimwi amuzike uusyomeka.

3. Ninguzu nzi Jesu nzyaakapegwa?

³ Jesu ulausololela mulimo wakukambauka. Ino tuzyi buti oobo? Kakusyeede buyo ciindi cisyoonto kuti aunke kujulu, Jesu wakabandika abasikumutobela basyomeka bamwi acilundu ca Galilaya. Wakabaambila kuti: “Ndapegwa nguzu zyoonse kujulu alimwi aanyika.” Amubone majwi aatobela ngaakaamba: “Aboobo kamuya mukayiisye bantu bazisi zyoonse kuti babe basikwiiya.” (Mt. 28:18, 19) Akati kazintu nzyaakapegwa, Jesu wakapegwa nguzu zyakusololela mulimo wakukambauka.

4. Nkaambo nzi ncotukonzya kuba masimpe kuti Jesu ucitusololela mumulimo wakukambauka?

 ⁴ Jesu wakaamba kuti mulimo wakukambauka alimwi akugwasya bantu kuba basikwiiya wakali kuyoocitwa ‘muzisi zyoonse’ akuti wakali kuyooba antoomwe abasikumutobela “mazuba oonse mane kusikila kumamanino aabweende bwazintu.” (Mt. 28:20) Majwi aaya atondezya kuti mulimo wakukambauka wakali kuyoozumanana ansi abweendelezi bwa Jesu kusikila kumazuba eesu.

5. Ndubazu nzi ndotujisi mukuzuzikizya businsimi ibuli ku Intembauzyo 110:3?

⁵ Jesu kunyina naakalibilikide kuti basimulimo bayooceya kumamanino aabweende bwazintu. Wakalizyi kuti majwi aabusinsimi aasintembauzyo akali kuyoozuzikizyigwa aakuti: “Bantu bako bayoolyaaba cakuliyandila mubuzuba bwampi yako yabasikalumamba.” (Int. 110:3) Ikuti naa mulatola lubazu mumulimo wakukambauka, nkokuti mugwasyilizya Jesu alimwi amuzike uusyomeka alimwi mulagwasyilizya kuzuzikizya businsimi oobu. Mulimo uyaabuyaambele, pele kuli buyumuyumu.

6. Mbuyumuyumu nzi bumwi bakambausi ba Bwami mbobajana mazuba aano?

⁶ Buyumuyumu bumwi mbobajana bakambausi ba Bwami nkukazyigwa. Basiluleyo, basololi bazikombelo abasimapolitikisi baambila bantu banji makani aakubeja kujatikizya mulimo wesu. Ikuti banamukwasyi, balongwe ababelesima bakeenwa abantu bali boobu, balakonzya kutusinikizya kuleka kubelekela Jehova akuleka kukambauka. Mumasi aamwi, bakwesu abacizyi balakazyigwa kwiinda mukukongwa, kwaangwa alimwi buya akutolwa muntolongo. Eeci tacitugambyi pe. Kayi Jesu wakasinsima kuti: “Muyoosulwa amasi oonse akaambo kazina lyangu.” (Mt. 24:9) Kusulaikwa munzila iili boobu ncitondezyo cakuti tulakkomaninwa a Jehova. (Mt. 5:11, 12) Diabolosi nguupa kuti katukazyigwa. Pele Jesu ulaanguzu kapati kwiinda nguwe! Aboobo kwiinda mukugwasyigwa a Jesu, makani mabotu alabasikila bantu muzisi zyoonse. Lino atulange-lange bumboni bumwi.

7. Mbumboni nzi ibutondezya kuti majwi aali ku Ciyubunuzyo 14:6, 7 alimukuzuzikizyigwa?

⁷ Buyumuyumu bumbi mbotujana ciindi notukambauka nkwiindana kwamyaambo. Muciyubunuzyo Jesu ncaakapa mwaapostolo Johane, wakaamba kuti mumazuba eesu makani mabotu akali kuyoobuzunda buyumuyumu oobo. (Amubale Ciyubunuzyo 14:6, 7.) Mubuti? Tupa bantu banji icoolwe cakusala ciindi notubakambaukila mulumbe wa Bwami. Mazuba aano, bantu munyika yoonse balakonzya kubala makani aamba zyamu Bbaibbele awebbusaiti yesu ya jw.org nkaambo makani aayo alajanika mumyaambo iinda ku 1,000! Ba Kabunga Keendelezya bakazumizya kuti kusandululwe bbuku lyakuti Amupone Kukabe Kutamani!, eelyo ndyotubelesya kapati kugwasya bantu kuba basikwiiya mumyaambo iinda ku 700! Alimwi kuli cakulya cakumuuya icipegwa kwiinda mumavidiyo aabasinke matwi alimwi amabbuku aaboofwu. Tulibubwene businsimi bwamu Bbaibbele mbobuli mukuzuzikizyigwa. Bantu “bazwa mumyaambo yoonse yamasi” balaiya kwaambaula “mwaambo uusalala” wakasimpe kamu Bbaibbele. (Zek. 8:23; Zef. 3:9) Zyoonse eezyi zili mukuzuzikizyigwa kwiinda mubweendelezi bwa Jesu Kristo.

8. Ncinzi cacitika akaambo kakukambauka?

⁸ Mazuba aano, bantu bainda ku 8,000,000 mumasi aali 240 balayanzana ambunga ya Jehova, alimwi mwaka amwaka  banji balabbapatizyigwa! Nokuba boobo, iciyandika kapati kwiinda myeelwe mbube bwa Bunakristo nkokuti, “buntu bupya,” mbobasama basikwiiya bapya. (Kol. 3:8-10) Banji bakaleka kutalilemeka, nkondo, kusalaulana mubala naa cisi. Businsimi ibuli kuli Isaya 2:4 buli mukuzuzikizyigwa bwakuti; ‘tabaciiyi limbi nkondo.’ Mbwaanga tulabeleka canguzu kusama buntu bupya tulagwasya bantu kuboola kumbunga ya Leza, alimwi tulatondezya kuti tutobela musololi wesu Kristo Jesu. (Joh. 13:35; 1Pet. 2:12) Zintu eezyi tazilicitikili buyo pe. Jesu ulatupa ilugwasyo ndotuyandika.

9. Kweelana a Matayo 24:45-47, ncinzi cakasinsimwa kujatikizya ciindi camamanino?

⁹ Amubale Matayo 24:45-47. Jesu wakasinsima kuti kumamanino aaciindi, uyoosala “muzike uusyomeka alimwi uucenjede” kuti kapa cakulya cakumuuya. Aboobo muzike ulaubeleka canguzu mulimo ooyo mumazuba eesu. Aaya masimpe. Jesu ubelesya kabunga kasyoonto kabaalumi bananike kupa bantu ba Leza alimwi abaabo ibajisi luyandisisyo cakulya cakumuuya “aciindi ceelede.” Baalumi aaba tabali basimalelo balusyomo lwabamwi. (2Kor. 1:24) Muciindi caboobo, balizyi kuti Jesu Kristo ‘ngomusololi alimwi amweendelezi’ wabantu bakwe.—Is. 55:4.

10. Kweelana azifwanikiso, ndibbuku nzi lyakamugwasya kweendela munzila iitola kubuumi?

¹⁰ Kuzwa mu 1919, muzike uusyomeka wazumanana kumwaya mabbuku aayindene-indene aakapa coolwe kuli baabo ibakajisi luyandisisyo lwakwiiya kasimpe kamu Jwi lya Leza. Mu 1921, muzike wakamwaya bbuku lyakuti The Harp of God kutegwa ligwasye baabo ibakajisi luyandisisyo lwakwiiya njiisyo zyantalisyo zyamu Bbaibbele. Mukuya kwaciindi, kwakamwaigwa amabbuku aambi.  Ndibbuku nzi ilyakamugwasya kumuzyiba alimwi akumuyanda Taateesu wakujulu? Sena ndibbuku lyakuti “Let God Be True,” The Truth That Leads to Eternal Life, Mulakonzya Kupona Kukabe Kutamani mu-Paradaiso Anyika, Luzibo Lutola Kubuumi Butamani, Ino Ncinzi Cini Bbaibbele Ncoliyiisya?, Ncinzi Bbaibbele Ncolituyiisya?, naa bbuku lyesu lipya lyakuti Amupone Kukabe Kutamani!? Mabbuku oonse aaya akabambilwa kutuyiisya kubona mbotukonzya kugwasya bantu kuba basikwiiya alimwi akaboola aciindi ceelede.

11. Nkaambo nzi ncociyandika kuti toonse katutambula icakulya cakumuuya?

¹¹ Tabali bapya balikke ibayandika cakulya cakumuuya ciyumu. Toonse tuyandika cakulya eeci. Mwaapostolo Paulo wakalemba kuti: “Cakulya ciyumu ncabantu basimide.” Mpoonya wakayungizya kuti ikuzibelesya nzyotwiiya kulakonzya kutugwasya “kwaandaanya ciluzi acitaluzi.” (Heb. 5:14) Muciindi ecino cikatazya, ciindi zyeelelo zyakulilemeka nozyayaaansi kapati cilakonzya kutuyumina ikutobela zyeeleo zya Jehova. Pele Jesu ulabikkila maano kapati ikubona kuti twajana nguzu kwiinda mucakulya cakumuuya. Cakulya eeci cizwa mu Jwi lya Leza ilyakasololelwa amuuya, Bbaibbele. Muzike uusyomeka ulabamba cakulya eeci akutupa ncico kwiinda mubusolozi bwa Jesu.

12. Mbubwenya mbuli Jesu, ino tulibona buti zina lya Leza?

¹² Mbubwenya mbuli Jesu, tulalilemeka kapati zina lya Leza. (Joh. 17:6, 26) Mucikozyanyo, mu 1931 twakatalika kwiitwa azina lyamu Magwalo lya Bakamboni ba Jehova, kwiinda mukucita boobo twakatondezya mboliyandika kapati zina lya Leza kulindiswe alimwi akuti tulayanda kwiitwa azina lya Taateesu wakujulu. (Is. 43:10-12) Aboobo kuzwa mu October mwaka ooyo, izina lya Leza lilalibonya acivwumbyo camagazini  eeyi. Kuyungizya waawo, mu Bbaibbele lya Busanduluzi Bwanyika Mpya twakalipilusya zina lya Leza mubusena moliyandika. Eelo kaka kuli kwiindana kupati azikombelo zimwi zya Bunakristo Bwanyika izyakaligusya zina lya Jehova muma Bbaibbele aabo manji!

13. Ncinzi cimupa kusyoma kuti Jesu ubelesya “muzike uusyomeka alimwi uucenjede” mazuba aano? (Johane 6:68)

¹³ Kwiinda ‘mumuzike uusyomeka alimwi uucenjede,’ Jesu wakabamba imbunga iilibedelede aano anyika kutegwa asumpule bukombi busalala. Ino mulimvwa buti kujatikizya mbunga eeyo? Ambweni mulimvwa mbubwenya mbwaakalimvwa mwaapostolo Petro iwakaambila Jesu kuti: “Ino inga twaunka kuli ni? Yebo ujisi majwi aapa buumi butamani.” (Joh. 6:68) Ino notwali kuli mazuba aano ikuti notwatali mumbunga ya Jehova? Kwiinda mulinjiyo, Kristo ulabikkila maano kubona kuti tulasaninwa kabotu kumuuya. Alimwi ulatuyiisya mbotukonzya kuubeleka kabotu mulimo wakukambauka. Kuyungizya waawo, ulatugwasya kusama “buntu bupya,” ikutegwa katukkomaninwa a Jehova.—Ef. 4:24.

14. Ino kuba mumbunga ya Jehova kwakamugwasya buti lyabulwazi bwa COVID-19?

¹⁴ Jesu ulapa busolozi bwabusongo muziindi zikatazya. Ibubotu bwabusolozi oobu bwakalibonya ciindi nobwakatalika bulwazi bwa COVID-19. Nokuba kuti banji munyika tiibakazyi cakucita, Jesu wakaba masimpe kuti twatambula busolozi busalede kujatikizya mbotwakeelede kulikwabilila. Twakakulwaizyigwa kusama mamasiki mubuleya akutantamukana. Baalu bakayeezyegwa kubandika aboonse ibali mumbungano akubona kuti bali kabotu kumubili akumuuya. (Is. 32:1, 2) Kuyungizya waawo, twakali kutambula  busolozi buyungizyidwe akukulwaizyigwa kwiinda mumalipooti aa Kabunga Keendelezya.

15. Mbusolozi nzi bwakapegwa kujatikizya mbotwakeelede kucita miswaangano alimwi amulimo wesu wakukambauka lyabulwazi oobu, alimwi ncinzi cakacitika?

¹⁵ Lyabulwazi oobu, twakatambula busolozi ibusalede kujatikizya mbotwakeelede kucita miswaangano amulimo wakukambauka. Cakufwambaana twakatalika kucita miswaangano yambungano, yabbazu ayacooko kwiinda mukukwabana avidiyo. Twakatalika kukambauka kubelesya magwalo amafooni. Mpoonya Jehova wakakulongezya kusolekesya kwesu. Mumitabi minji kuli malipooti aatondezya kuyungizyika kwamweelwe wabasikumwaya. Alimwi buya, kuli zyakuluula zinji izikulwaizya izyakacitika muciindi eeci.—Amubone kabbokesi kakuti “ Jehova Ulaulongezya Mulimo Wesu Wakukambauka.”

16. Ndusyomo nzi ndotujisi?

¹⁶ Bamwi balakonzya kuyeeya kuti mbunga yakaciindizya kupa malailile kujatikizya bulwazi oobu. Pele cakalibonya kuti busolozi mbotwakali kutambula, mbwabusongo. (Mt. 11:19) Ciindi notuzinzibala kuyeeya nzila yaluyando Jesu mbwasololela bantu bakwe tulijisi lusyomo lwakuti kufwumbwa ciyootucitikila kumbele Jehova alimwi a Mwanaakwe uuyandwa banooli andiswe.—Amubale Bahebrayo 13:5, 6.

17. Ino mulimvwa buti ikusololelwa a Jesu?

¹⁷ Eelo kaka tulilelekedwe kusololelwa a Jesu! Tuzulilwa mumbunga iikamantene tacikwe makani azilengwa, cisi akwiindana kwamyaambo. Tulasaninwa kabotu-kabotu kumuuya akugwasyigwa mbotukonzya kuubeleka kabotu mulimo wakukambauka. Umwi aumwi wesu ulagwasyigwa mbwakonzya kusama buntu bupya alimwi tulaiya kuyandana. Aboobo tulijisi kaambo kalimvwisya ncotweelede kulidunda akaambo kakusololelwa a Jesu!