Amutwaambile mbomwakakomezyegwa.

Mukwasyi wesu wakalongela ku Spain kuzwa ku France nindakajisi myaka iili fwuka yakuzyalwa. Bazyali bangu bakali ba Katolika, pele mebo ndakacileka kusyoma muli Leza nindakajisi myaka iili 16 yakuzyalwa. Kulindime bukombi tiibwakajisi mulimo mubuumi. Ikuti muntu wandibuzya buumi mbobwakatalika ikuti kakutakwe Leza, ndakali kwiingula kuti, “Calino basayaansi tabakonzyi kupandulula, pele bumwi buzuba bayoocikonzya.”

Ncinzi cakamupa kwiiya bulwazi bwansa?

Ndakaiya kucikolo cabusilisi mu Montpellier ku France. Syaazibwene kucikolo eeci wakandilomba kubelekela kucibeela cakali kulanganya busilisi bwansa. Mulimo ookuya wakali kubikilizya kuvwuntauzya alimwi akulanganya balwazi. Eeco ncondakali kuyanda. Mu 1990, ndakatalika kutola lubazu mukuvwuntauzya mboukonzya kubeleka musamu uutegwa recombinant erythropoietin (EPO) kweendelezya kupangwa kwamaseelo aapanga bulowa mumafwuwa eesu. Aciindi eeco, buvwuntauzi oobu bwakali kubonwa kuti mbupya.

Ncinzi cakamupa kutalika kumuyeeya Leza?

Mu 1979, balumi bangu ba Floréal, bakatalika kwiiya Bbaibbele a Bakamboni ba Jehova. Pele mebo tiindakali kuyanda pe. Kandicili mwana, bukombi bwakali kundicima. Nokuba boobo, balumi bangu abana besu bakaba Bakamboni, alimwi kakutanainda ciindi bunji bwabalongwe besu bakaba Bakamboni.  Umwi wambabo wazyina lyakuti Patricia wakandaambila kuti kandipaila, wakati: “Ikuti taakwe uuliko kujulu, cili buyo kabotu, pele ikuti kaliko muyoobona ciyoocitika.” Nikwakainda myaka ndakatalika kuyeeya kujatikizya mpindu yabuumi, alimwi ndakaayeeya majwi ngobakaamba ba Patricia. Ndakatalika kupaila kutegwa ndimvwisye.

Ncinzi cakamupa kutalika kuyeeya mpindu yabuumi?

Zigwebenga nozyakanyonyoona World Trade Center mu New York ndakatalika kuyeeya bubi ncobwakavwulide boobu. Ndakayeeya kuti: ‘Aabo baciindizya mubukombi babikka buumi bwesu muntenda. Pele ookuno ndizingulukidwe a Bakamboni ba Jehova basiluumuno. Tabaciindizyi pe. Batobela ncolyaamba Bbaibbele. Ambweni ndeelede kuzyiba ncolyaamba.’ Aboobo, ndakatalika kubala Bbaibbele endikke.

Kamuli badokota, sena cakali kumuyumina kusyoma kuti kuli Mulengi?

Peepe. Ndakali kumupa bulemu kapati akaambo kamibili yesu mboyakalengwa. Mucikozyanyo, cilagambya kapati insa mbozyeendelezya maseelo aapanga bulowa.

Nkaambo nzi ncomwaamba boobo?

Mbubwenya mbomuzyi, maseelo aapanga bulowa ngaanyamuna muya wa oxygen. Ikuti bulowa bunji bwazwa mumubili wanu naa ikuti mwaunka kubusena buli atala kapati, mubili wanu ulabula oxygen. Insa zilijisi tuntu tuzyiba ikuti naa oxygen waceya mubulowa. Ikuti naa oxygen waceya mubulowa tuntu ootu tulapa kuti musamu uutegwa EPO utalike kupangwa, alimwi buya musamu wa EPO ulakonzya kuvwula kapati mubulowa. Kumane musamu wa EPO ulapa kuti mooma utalike kupanga maseelo aapanga bulowa, alo aatiinyamune oxygen munji. Cilakkomanisya kaka! Pele cigambya ncakuti ndakaayiiya makani aaya kwamyaka iili kkumi kanditanazyiba kuti Leza alikke nguukonzya kulenga bumpiyompiyo buli boobu.

Ino Bbaibbele lyakamujatikizya buti?

Ndakabalide kale mabbuku manji aamba zyakaindi alimwi aamwi aadumide kapati aatwaano, pele nondakabala Bbaibbele, mpoonya-mpoonya ndakazyiba kuti lyakaliimpene amabbuku aambi. Lulayo lwandilyo lulagwasya cakuti lweelede kuzwa kumuntu uusumpukide kwiinda bantu boonse. Abwalo bube bwa Jesu bwakandikkomanisya. Ndakazyiba kuti wakali muntu mwini-mwini. Kuli mbwaakali kulimvwa alimwi wakalijisi balongwe. Akaambo kakuti tiindakali kuyanda kubelesya mabbuku aa Bakamboni ba Jehova, ndakali kuvwuntauzya muma encyclopedia amumabbuku aambi ikuti kandijisi mubuzyo.

Ncinzi ncomwakali kuvwuntauzya?

Akati kazyintu nzyondakali kuvwuntauzya, ndakali kuyanda kuzyiba zinji kujatikizya Bbaibbele mbolyakasinsima mwaka wakubbapatizyigwa kwa Jesu. Ndakali kuyanda kuzyiba myaka iyakali kuyooinda kuzwa mumwaka wa 20 wabulelo bwa mwami waku Persia Artaxerxes kusikila ciindi Jesu naakali kuyooba Mesiya. * Ndakazyibila kuvwuntauzya—ngomulimo ngondicita. Aboobo, ndakavwuntauzya mumabbuku aamba zyakaindi madeeti aabulelo bwa Artaxerxes alimwi amadeeti aamulimo wa Jesu. Kumamanino ndakazyiba kuti businsimi oobu bwamu Bbaibbele bwakazuzikizyigwa aciindi ceelede alimwi akuti bweelede kuti bwakazwa kuli Leza.