Ncinzi cakamupa kuba aluyandisisyo musayaansi?

Nindakali mwana, ndakali kuzikkomanina zilenge. Ndakakomenena mu Richterswil, munzi mubotu waku Switzerland iwakali kunkomwe ya Lwizi lwa Zurich. Bazyali alimwi abapati bangu, bakali kunditolelezya kukweendeenda alimwi bakali kundipandulwida kujatikizya zilenge azisyango nzyotwakali kujana munzila.

Ncinzi cakamupa kwiiya mulimo wabusilisi bwamafwuwa?

Kwaciindi cisyoonto, bataata bakali kubeleka kabali basikugwasilizya mucibbadela kucibeela nkobaandula bantu. Zyintu nzibakali kubona zyakabakulwaizya kutalika kwaamba kujatikizya mulimo wakwaandula bantu. Busungu bwabo bwakandikkomanisya kapati cakuti andime kumbele ndakasala mulimo wabusilisi. Aboobo, akaambo kamulimo wakwaandula uujatikizyidwe, ndakasala kuba syaazibwene mukusilika malwazi aamafwuwa. Musilisi wamalwazi aamafwuwa, uyandika kuyeeya mbuli muntu uubamba mincini kutegwa acikonzye kubamba mafwuwa, milambi alimwi amanungo aazifwuwa zyalo zitupa kucikonzya kweenda.

Cilandikkomanisya kapati kubona balwazi mbondisilika kabapona. Ndilayanda kapati kubeleka antoomwe abantu.

Nkaambo nzi ncomwakali kudooneka kuti Leza nkwali?

Ndakatalika kudooneka kuti Leza nkwali nindakali mukubusi akaambo katwaambo tobilo. Kaambo kakusaanguna, ndakajana kuti basololi bazikombelo zimwi tiibakali kulilemeka, eeci cakandinyonganya. Kabili, nindakali sicikolo, bamayi bamwi ibakali kundiyiisya biology bakali kusyoma munjiisyo yakusanduka kwazyintu, calo cakapa kuti andime nditalike kwiisyoma njiisyo eeyo, kwaambisya ciindi nindakali kucikolo cipati cayunivesiti.

 Nkaambo nzi ncomwakaizumina njiisyo yakusanduka kwazyintu?

Ndakali kubasyoma bamayi bangu. Kuyungizya waawo, ndakali kuyeeya kuti kukozyanya kwamibili yazilenge zimwi cakali kutondezya kuti zilenge eezyi zyakazwa kucintu comwe, calo cakazuminana amuzeezo wakuti kusanduka kwazyintu inga kwapa kuti kuzyalwe zyintu zipya.

Pele, ncinzi cakapa kuti mucince mizeezo yanu mukuya kwaciindi?

Mweenzuma wakanditamba kumiswaangano ya Bakamboni ba Jehova. Okuya ndakakkomana kubona mbobayandana basimbungano alimwi amakani mabotu aakapegwa. Mukuya kwaciindi, umwi wabasimbungano aaba wakandiswaya, mpoonya ndakamubuzya kuti: “Mbuti mbondikonzya kusinizya kuti Bbaibbele ndibbuku lyamasimpe?”

Wakanditondezya businsimi bwamu Bbaibbele bwaamba zyintu zinji zijatikizya mazuba ngotupona. Cikozyanyo cimwi mbusinsimi mbwaakaamba Jesu kuti mamanino ayoozyibwa kwiinda munkondo, ‘mizuzumo mipati,’ kuvwula ‘kwamalwazi alimwi anzala.’ * Alimwi wakanditondezya businsimi ibwakaamba kujatikizya kuleka kulilemeka, bulyato alimwi azibi zimbi nzyotubona mazubaano. * Kakunyina kuwayawaya, ndakatalika kwiiya Bbaibbele cakusitikila, mpoonya kakutanainda ciindi ndakazyiba kuti zisyomezyo nzyolyaamba Bbaibbele lyoonse zilacitika ncobeni. Alimwi ndakatalika kulingula nzyondakali kusyoma kujatikizya matalikilo aabuumi.

Sena buvwuntauzi bwanu mubusilisi bwakamugwasya kuzyiba matalikilo aabuumi?

Inzya. Ciindi nindakatalika kwiiya Bbaibbele, ndakali kuvwuntauzya mbolyaandulwa gondo. Kumamanino aamuma 1960, basayaansi bakatalika kubuzyiba kabotu-kabotu bumpiyompiyo boonse bwagondo. Bakajana kuti gondo talinyoneni buyo kulubazu lomwe. Muciindi caboobo, lilanyona kakunyina kubelesya nguzu, calo cipa kuti muntu kacikonzya kweenda, kuzyana, alimwi akucita zyintu zimwi zinji.

Kwamyaka iili 40, basikuvwuntauzya bali kusola kupanga gondo. Pele cilabakatazya kucita boobo akaambo kakuti gondo lyamuntu lilakatazya kumvwisya mbolipangidwe. Kuyungizya waawo, magondo aakupanga taakkali kwaciindi cilamfwu, twaayezyanisya agondo lini. Nokuba kuti basikupanga aaba balijisi zibelesyo zisumpukide, balakkomana kapati kuti magondo ngobapanga akkala myaka iisika buyo ku 20. Masimpe ngakuti, gondo lyamuntu lipangidwe aamaseelo aapona alo aalibambulula ciindi aciindi. Aboobo, mbolipangidwe gondo, kwakandipa kusyoma kuti lyakaba akaambo kabusongo bwa Leza, kutali akaambo kakusanduka kwazyintu.

Mbuti kujatikizya kusanduka kwazyintu alimwi akukozyanya kwambozipangidwe zilenge zimwi?

Kukozyanya ooko kutondezya kuti Sikulenga zyintu eezyi ngumwi. Kuyungizya waawo, kusanduka kwazyintu takupi kuti zyintu zipona zilibonye munzila iimbi iisumpukide. Muciindi caboobo, kusanduka kwazyintu kunyonyoona tubeela twamaseelo (genes). Zimwi ziindi, ntenda inga yagwasya, mucikozyanyo, kuti citima calimba bbiliji akulinyonyoona, eeci inga capa kuti dolopo likwabililwe kuli basikalumamba bayanda kunyonyoona. Pele eeci tacaambi kuti dolopo eeli lyasumpulwa munzila imwi akaambo kantenda eeyo. Mbubwenya buyo, kusanduka kwazyintu takukonzyi kusumpula zilenge munzila imwi. Alimwi kunyina nobayoocikonzya kupanga cintu cakalengwa munzila mbotu mbuli gondo lyamuntu, noziba zizo zimbi zyamubili.

Nkaambo nzi Ncomwakaba Kamboni wa Jehova?

Nindakatalika kubelesya njiisyo zyamu Bbaibbele, buumi bwangu bwakabota kapati. Kuyungizya waawo, mu 2003, ndakaunka kumuswaangano wamasi wa Bakamboni ba Jehova, kwalo nkondakabona bantu bakamantene mbuli mukwasyi, nokuba akati kabasimuswaangano batakaningabwenene. Bakatondezya luyando lwini-lwini kuli umwi amweenzinyina, aboobo ndakayanda kubasangana.