IBBAIBBELE lyakamana kulembwa mumwaanda wamyaka wakusaanguna C.E. Mpoonya njiisyo ya Butatu yakatalisyigwa mu 325 C.E. kakwiindide myaanda yamyaka yobilo, kumuswaangano wakacitwa mudolopo lya Nicaea ku Asia Minor, lino liitwa kuti Iznik, ku Turkey. Bbuku liitwa kuti New Catholic Encyclopedia, lilaamba kaambo kakapa kuti Muswaangano waku Nicaea upe bupanduluzi bwakusaanguna bwanjiisyo zyacikombelo, kubikkilizya abupanduluzi bwa Leza alimwi a Jesu. Nokuba boobo, nkaambo nzi cakali kuyandika kupa bupanduluzi bwa Leza alimwi a Kristo myaanda yamyaka kuzwa nilyakamana kulembwa Bbaibbele? Sena Bbaibbele talipi busanduluzi busalede kujatikizya makani aaya aayandika?

Ciindi Constantine naakaba mweendelezi wa Bwami bwa Roma, ibakali kulyaamba kuba Banakristo bakaliindene mbobakali kukupandulula kuswaangana kuli akati ka Leza alimwi a Kristo. Sena Jesu wakali Leza? Sena wakalengwa a Leza? Kukosola makani aaya, Constantine wakabaita beendelezi bazikombelo ku Nicaea, kutali akaambo kakuti wakali kuyanda kuzyiba kasimpe kabukombi, pele akaambo kakuti tanaakali kuyanda kuti bukombi bwaandaanye bwami bwakwe.

Constantine wakalomba bamabbishopo, balo ibakali banji, kuti bazuminane aakaambo komwe kujatikizya bukombi, pele kulomba kwakwe kwakaba kwabuyo. Mpoonya wakaambila basimuswaangano kuti batobele njiisyo yakubeja yakuti Jesu “ncibeela comwe” homoousios (naa ciswaangene) a Taata. Ibbala eeli lya Chigiliki lyakatalisya njiisyo ya Butatu yalo yakamwaika muzikombelo zinji. Aboobo, kumamanino amwaanda wamyaka wane, njiisyo ya Butatu yakaduma kapati mbubwenya mboibede mazuba aano, kubikkilizya aceeco cibonwa kuba cibeela catatu camutwe wa leza, imuuya uusalala.

Jesu wakaamba kuti: ‘Bakombi bakasimpe bayookomba Taata mukasimpe.’ (Johane 4:23) Kasimpe aako kakalembwa mu Bbaibbele. (Johane 17:17) Sena Bbaibbele liyiisya kuti Taata, Mwana, alimwi amuuya uusalala mbantu botatwe muli Leza omwe?

 Mubwini, mu Bbaibbele kunyina aalembedwe bbala lyakuti “Butatu.” Kaambo kambi nkakuti, Jesu kunyina naakalitaminina kuti uleelene a Leza. Muciindi caboobo, Jesu wakali kukomba Leza. (Luka 22:41-44) Alimwi bumboni bumwi bujatikizya cilongwe ncaakajisi Jesu abasikumutobela. Nokuba ciindi naakamana kubusyigwa kali cilenge camuuya, basikwiiya bakwe wakali kubaita kuti “bakwesu.” (Matayo 28:10) Sena bakali banabokwabo a Leza Singuzuzyoonse? Peepe! Pele akaambo kakuba alusyomo muli Kristo, imwana wa Leza uuyandwa, abalo baba bana Bataata omwe. (Bagalatiya 3:26) Amweezyanisye magwalo aambi kumajwi aaya aatobela aakazwa kunjiisyo yakatalikila ku Muswaangano waku Nicaea.

Ncoyaamba Njiisyo Yaku Nicaea:

“Tusyoma . . . mu Mwami omwe Jesu Kristo . . . walo uuli ncibeela ca Taata, Leza wa Leza, Mumuni wa Mumuni, nguwenya Leza wa Leza.”

Ncolyaamba Bbaibbele:

• “Taata mupati kwiinda ndime [Jesu].”—Johane 14:28. *

• “Nsinatanta [Jesu] kuli-Taata, akuli-Uso, akuli-Leza wanu.”—Johane 20:17.

• “Kulindiswe kuli Leza omwe buyo, Taateesu.”—1 Ba-Korinto 8:6.

• “Alumbwe Leza, Wisi wa-Mwami wesu Jesu Kristo!”—1 Petro 1:3.

• “Ngaaya makani ngaamba Ameni [Jesu], . . . matalikilo aabulenge bwa-Leza.”—Ciyubunuzyo 3:14. *