BAYUNI ibauluka kapati kuya mujulu, babelesya buyo nguzu zisyoonto. Oobu mbwacita muyuni uutegwa Albatross. Mababa aakwe malamfwu kusika kumamita aali 3.4, ulalema kusika kumakkilogilamu aali 8.5, alimwi muyuni ooyu ulakonzya kuuluka musinzo mulamfwu kabelesya buyo nguzu zisyoonto. Muyuni ooyu ulacita oobu akaambo kamboupangidwe mubili wakwe alimwi ambwauluka.

Amubone kaambo aaka: Nauluka, muyuni ooyu ulaakkiya manungo aamilambi iili mumababa aakwe ciindi naavwungulula kapati, calo cipa kuti milambi yakwe kaitabeleki. Cimwi cipa muyuni ooyu kucikonzya kucita boobu, myuwo yamulwizi.

Ciindi nali atala aalwizi, ooyu muyuni ulauluka kuunka mujulu, akunyona kuboola ansi alimwi ulazumanana kucita mbweena oobu, calo cipa kuti muyuni ooyu acikonzye kupilusya nguzu nzyaabelesya naali kuya mujulu. Basayaansi bakacizyiba ino-ino cipa muyuni ooyu kucita boobu. Kwiinda mukubelesya zibelesyo zisumpukide kapati mbuli makkompyuta, aaba bantu bakajana kuti muyuni ooyu ulaba anguzu ciindi nauluka kuya kulubazu nkoutozya muwo, calo cimupa kucikonzya kuunka mujulu akuya ansi. Basayaansi aaba baamba kuti: “Nguzu zizwa kumuwo nzyabelesya muyuni ooyu, ncilengwa ncacita lyoonse.” Ino cimugwasya buti muyuni ooyu? Ulakonzya kuuluka kwamawoola manji kakunyina kuvwupaula mababa aakwe.

Busongo oobu inga bwabagwasya basikupanga ndeke kutegwa kabapanga ndeke zitabelesyi mungwimba munji, ndiza akupanga ndeke zibelesya zipaka-paka zitazingulusigwi anjini.

Ino muyeeya buti? Sena mbwauluka muyuni ooyu kakunyina kubelesya nguzu zinji, alimwi amboupangidwe mubili wakwe, zyakaba akaambo kakusanduka kwazyintu? Naa mbwaakalengwa buya?