SILUUBILILI ujisi meso aalibedelede alo aamugwasya kupima eeni mpayanda kusotokela. Ino mbuti mbwacikonzya kucita oobo?

Amubone makani aaya: Kutegwa siluubilili ooyu apime kabotu eeni mpocibede cintu cimwi, ubelesya meso aakwe abambidwe munzila iilibedelede, alo aajisi tuseelo tone tubikkidwe kamwi atala akeenzinyina. Kaseelo komwe kalatambula mumuni munji, kakuli kambi katambula buyo cinzimweemwe. Mbociyaabuleka kulibonya cinzimweemwe eeco mukaseelo aako, eeco cintu cilibonya kuba aafwaafwi mumeso aasiluubilili. Eeci cipa kuti siluubilili kacikonzya kupima bulamfwu bwawaawo mpayanda kusotokela kutegwa ajate kauka nkayanda kulya.

Basikuvwuntauzya balayanda kubwiiya busongo bwasiluubilili kutegwa bapange kkamela ilaanguzu kapati alimwi amalobboti aakonzya kupima bulamfwu buli akati kacintu cimwi kuya kucintu cimbi. Kweelana a Website ya ScienceNOW, meso aasiluubili apa “cikozyanyo cikkomanisya kujatikizya kauka kalampa cisela casentimita lyomwe alimwi ikajisi boongo busyoonto kwiinda bwanzinini mbokakonzya kuyobola zyintu zinji nzyokabona akucita zyintu zigambya.”

Muyeeya buti? Sena kubelesya meso aataboni kabotu kucitwa aasiluubilili kwakaba akaambo kakusanduka kwazyintu? Naa kwakalengwa buya?