Tuyanda Kuti Kupenga Kumane!

Mapenzi aa Khieu akatalika ciindi bausyi nobakajaigwa akaambo kakulekela ŋombe mumuunda wamapopwe wakali afwaafwi. Mukuya kwaciindi, banyina alimwi abacizyi bakwe botatwe bakajaigwa antoomwe abantu bakajaigwa abasikalumamba baitwa kuti Khmer Rouge baku Cambodia. Kumane Khieu kakamucisa kadandamiti. Akaambo kaceeci, wakakkala musyokwe kwamazuba aali 16, kalindila kuti agwasyigwe. Kuulu kwakwe kwakazookosolwa. Khieu wakaamba kuti: “Tiindakali kuyanda kuzumanana kupona.”

ANDINYWE mwakabona kale kuti mapenzi alasikila bantu boonse. Ntenda zilicitikila, malwazi alimwi abulema, kulwana alimwi amapenzi buyo aamwi alakonzya kumusikila muntu uuli woonse, aciindi cili coonse alimwi akubusena buli boonse. Itubunga tulanganya maumi aabantu tulabeleka canguzu kusola kukwabilila bantu kuzwa kumapenzi aabacitikila. Pele sena bazwidilila mukusolekesya kwabo?

Amubone cikozyanyo eeci—kulwana penzi lyanzala. Kweelana ambowakaamba muteende wiitwa kuti Toronto Star, ntenda zilicitikila zyapa kuti bantu banji babule maanda aakukkala alimwi akubulilwa zyakulya. Nokuba boobo, muteende ooyu wakaamba kuti “nokuba kuti tubunga tugwasilizya kumana nzala tulabeleka canguzu, twaalilwa akaambo kakujayana kwavwula.”

Beendelezi mutwaambo twacisi, mubusilisi alimwi amubuleya basolekesya canguzu kumana mapenzi, pele baalilwa. Mapulogilamu aabambilwa kupa kuti cisi civwube, aalilwa kumana bucete. Misamu, alimwi anzila zisumpukide zyakwaandula bantu tazikonzyi kwaamanizya malwazi oonse. Bapulisa alimwi abasikubamba luumuno baalilwa kumana bugwebenga ibwazumanana.

Nkaambo nzi ncokuli mapenzi manji boobu? Sena Leza ulabikkila maano kumapenzi aabasikila bantu? Mbubwenya mbotutiibone, bantu banji bajana bwiinguzi bukkazika moyo kuzwa mu Bbaibbele kumibuzyo eeyi.