Ino Nkuli Nkotukonzya Kujana Busolozi?
Ino Nkuli Nkotukonzya Kujana Busolozi?
INO nguni uukonzya kutupa malailile aakonzya kutugwasya kuti katukkala kabotu—ikutali akaambo kakuvwuba, pele akaambo kakukkomana? Mbubonya mbokwaambwa kale mucibalo cainda, muntu uuyanda kukkala kabotu weelede kupona kweelana anjiisyo zigwasya alimwi weelede kuba amakanze mabotu—zyintu eezyi taziswaangene akuba ampuwo, buvwubi naa kuba anguzu zyakweendelezya bamwi.
Ino nkuli nkotukonzya kujana njiisyo zikonzya kutugwasya kuzyiba ncotuponena? Sena kuli muntu uukonzya kutwiingula? Masimpe ngakuti, akaambo kakuti tatulondokede tulakonzya kulombozya zyintu zitaluzi. (Matalikilo 8:21) Eeci ncecipa kuti bantu banji bazumanane kucita zyintu zitagwasyi zyaambwa mu Bbaibbele kuti ‘zisusi zyanyama, zyameso akulisumpula.’ (1 Johane 2:16) Nokuba boobo, zyintu eezyi tazikonzyi kupa kuti muntu kakkala kabotu pele zimupa kutyompwa. Nkakaambo kaako bantu banji basyoma kuti Mulengi wesu ulakonzya kuingula mibuzyo iiyandika kapati mubuumi. *
Sena Tweelede Kumusyoma Leza?
Nkaambo nzi ncotweelede kumusyoma Mulengi wesu? Ulicizyi ncaakatulengela ancotuponena. Alimwi ulizyi mbwaakatulega, ncotuyeeya ambotulimvwa. Aboobo, Leza ulizizyi njiisyo zikonzya kutugwasya. Kunze lyaboobo, Leza nduyando, aboobo uyanda kuti katukkomana akukkala kabotu. (1 Johane 4:8) Ino nkuli nkotukonzya kujana malailile aakwe? Tulakonzya kwaajana mu Bbaibbele lyakalembwa abantu bali 40 ibakasololelwa amuuya wa Leza. * (2 Timoteo 3:16, 17) Ino mbuti mbotukonzya kwaasyoma malailile aali mu Bbaibble?
Jesu Kristo wiiminina Leza wakaamba kuti: “Nkabela maanu alulamikwa kumilimo yao.” (Matayo 11:19; Johane 7:29) Busongo bujanika munjiisyo zya Leza butupa kuti katukkala kabotu akukkomana mane kukabe kutamani akaambo kakuti tweenda “munzila mbotu” lyoonse. Pele bantu ibatamubikkili maano Leza tabazwidilili muzyintu nzyobacita alimwi tabakkomene pe.—Tusimpi 2:8, 9, BT; Jeremiya 8:9.
Atulange-lange bukkale bujatikizya bakubusi ibakali kupona muma 1960 batakali kuyanda kulaigwa abapati. Bakubusi aaba bakali kubelesya misamu iikola, tiibakali kulilemeka alimwi bakali kusyoma kuti beelede kulida limwi kabatanafwa. Pele sena zyintu eezyi zyakabagwasya? Sena bantu aaba bakalikkomene ncobeni abuumi buli boobu? Makani aansiku atondezya kuti ikulilemeka munzila eeyi tiikwakabapa kuti kabapona kabotu, pele kwakapa kuti bantu aaba kabatalilemeki.—2 Timoteo 3:1-5.
Mukwiindana abusongo bwabantu, ibusongo bwa Leza ibuli mu Bbaibbele bulagwasya lyoonse. (Isaya 40:8) Mucibalo citobela mulabona njiisyo zyamu Bbaibbele zili cisambomwi izyapa kuti bantu banji bavwubide abatavwubide munyika yoonse kabakkala kabotu akukkomana.
Bupanduluzi buyungizidwe
^ munc. 3 Amubone kabbokesi kakuti “Njiisyo Zipa Kuti Bantu Batacizyibi Ncobaponena.”
^ munc. 5 Amubone magazini ya Sinsimuka! yacigisi yamu November 2007 iijisi mutwe wakuti “Can You Trust the Bible?” (Sena Mulakonzya Kulisyoma Bbaibbele?) Zibalo zili mumagazini eeyi zitondezya kuti zyintu zyansiku, makani aansiku, sayansi alimwi azyintu zimwi zipa bumboni bwakuti Bbaibbele lyakasololelwa amuuya wa Leza.
[Kabbokesi kali apeeji 23]
NJIISYO ZIPA KUTI BANTU BATACIZYIBI NCOBAPONENA
Bantu banji baamba kuti Leza tako akuti zyintu zipona zyakasanduka buya. Ikuti naa makani aaya ngamasimpe, nkokuti buumi mbwabuyo alimwi tacigwasyi kuzyiba ncotuponena.
Bamwi basyoma kuti Leza wakatulenga amane watulekelezya. Muzeezo ooyu utondezya kuti tuli bamucaala akuti tacigwasyi kuzyiba ncotuponena ambotweelede kupona. Amukalange-lange kaambo aaka: Leza wakapa banyama boonse maano kutegwa kabacita milimo njaakabalengela. Aboobo, busongo bwa Leza bulalibonya muzyintu nzyaakalenga. Sena Mulengi uuli boobo wakatulenga kuti katwiingaila buyo? Peepe.—Ba-Roma 1:19, 20.
Njiisyo zyabaabo batasyomi kuti Leza nkwali zipa buyo kuti bantu kabayeeya kuti kukkala kabotu caamba kuvwuba akubikkila maano kumilimo yakumubili.
[Cifwanikiso icili apeeji 23]
Busongo bwa Leza ibuli mu Bbaibbele bulagwasya lyoonse