Nomuyandwa Nobasyomima:

Mbwaanga tuli bakombi ba Jehova, tulaliyanda kapati Jwi lyakwe, Ibbaibbele. Tulisinizyide kuti lilijisi makani aakaindi aaluzi, busolozi bugwasya mubuumi, alimwi abumboni bukkazika moyo ibutondezya kuti Jehova ulabayanda kapati bantu. (Intembauzyo 119:105; Luka 1:3; 1 Johane 4:19) Tulayandisya kapati kugwasya bamwi kwiiya kasimpe kabotu ikajanika mu Jwi lya Leza. Akaambo kaceeco, tulikkomene kulemba bbuku eeli lyakuti, Ziiyo Nzyomukonzya Kwiiya Kuzwa mu Bbaibbele. Amuleke tumwaambile makani masyoonto kujatikizya ndilyo.

Ikapati bbuku eeli, lyalembelwa bana. Nokuba boobo, lilakonzya kubelesyegwa kugwasya bapati aabo ibayanda kwiiya zinji kujatikizya Bbaibbele. Alimwi mbwaanga Bbaibbele ndibbuku lyabantu boonse, cakutadooneka toonse tuyoogwasyigwa kulanga-langa ziiyo zijanika mumo, zyalo izikonzya kutugwasya kuba alukkomano lwini-lwini.

Kwiinda mukubelesya zibalo zyamu Bbaibbele, bbuku eeli lyaamba twaano itujatikizya bantu kuzwa ciindi zintu nozyakalengwa. Kwakabikkilwa maano kapati kuti zibalo zyamu Bbaibbele zyaambwe munzila iimvwika alimwi nguba-uba, alimwi kwabelekwa canguzu kuti zibalo zibikkwe kweelana ambozyakali kutobelana kucitika.

Bbuku eeli taligoleli buyo akwaamba twaano tujanika mu Bbaibbele. Mabala alimwi azifwanikiso zyabambwa munzila iipa kuti zibalo zyamu Bbaibbele kazikkomanisya alimwi akutondezya mbobakali kulimvwa aabo ibaambidwe.

Ibbuku eeli lilatugwasya kubona Bbaibbele mbolili bbuku lyabantu boonse—aabo ibakamumvwida Jehova alimwi abaabo ibatakali kumumvwida. Alimwi litukulwaizya kujana ziiyo kuzwa kuzikozyanyo zyabo. (Baroma 15:4; 1 Bakorinto 10:6) Ibbuku eeli lijisi zibeela zili 14.  Kumatalikilo aacibeela cili coonse kuli ziiyo zimwi nzyotukonzya kwiiya izilembedwe mubufwaafwi.

Ikuti kamuli bazyali, mulakonzya kumubalila mwanaanu ciiyo kumane akubandika zifwanikiso. Mpoonya mulakonzya kubala cibalo camu Bbaibbele aayeeme ciiyo eeco. Amumugwasye mwanaanu kubona mboziswaangene nzyaabala mu Bbaibbele aceeco ncaabala mubbuku. Nzila njiyona eeyi ilakonzya kubelesyegwa ciindi nomugwasya muntu mupati kumvwisya mulumbe wamu Bbaibbele.

Tulaalusyomo lwakuti bbuku eeli liyoobagwasya boonse babombemyoyo—bana abapati—kwiiya kuzwa mu Jwi lya Leza alimwi akuzibelesya ziiyo mubuumi bwabo. Kwiinda mukucita boobo abalo balakonzya kumukomba kabali cibeela camukwasyi wakwe uuyandwa kapati.