BWIINGUZI bwakasimpe kujatikizya nzi? Kujatikizya mibuzyo imwi iiyandika kapati njobabuzya bantu. Ambweni kuli nomwakalibuzyide kale mibuzyo iili mbuli yeeyi:

• Sena ncobeni Leza ulatubikkila maano?

• Sena nkondo akupenga kuli noziyoomana?

• Ncinzi cicitika kulindiswe twafwa?

• Sena kuli bulangizi buliko kujatikizya bafwide?

• Mbuti mbondinga ndapaila mipailo njakonzya kuswiilila Leza?

• Mbuti mbondikonzya kujana lukkomano mubuumi?

Ino nkuli nkomukonzya kujana bwiinguzi kumibuzyo eeyi? Ikuti naa mwaunka kumalaibbulali naa kuzintoolo nkobasambala mabbuku, mulakonzya kujana mabbuku manji aambwa kuti alijisi bwiinguzi kumibuzyo eeyi. Pele ibunji bwaziindi, mabbuku aaya alakazyanya. Amwi inga kaaboneka kuti alagwasya aciindi eeco, pele muciindi buyo cisyoonto atalika kubonwa kuti aba aakaindi, aboobo alalembululwa naa kunjililwa busena.

Nokuba boobo, kuli bbuku lyomwe lijisi bwiinguzi busyomeka. Eelyo, ndibbuku lyakasimpe. Jesu Kristo naakali kupaila kuli Leza, wakati: “Ijwi lyako nkasimpe.” (Johane 17:17) Mazuba aano, Ijwi eelyo tulizyi kuti ndi Bbaibbele Lisalala. Amapeeji aatobela, mulajana bwiinguzi bwamu Bbaibbele kumibuzyo iili atala aawa ibulimvwisya alimwi busyomeka.

ICIPA KUBUZYA BOOBU: Tupona munyika iizwide lunya alimwi akutalulama. Zikombelo zinji ziyiisya kuti mapenzi aatusikila nkuyanda kwa Leza.

NCOLIYIISYA BBAIBBELE: Leza kunyina natalisya bubi pe. Lugwalo lwa Jobu 34:10 lwaamba kuti: “Leza mwini-mwini takonzyi kucita bubi nokuceya, alimwi Singuzuzyoonse takonzyi kubisya pe.” Leza ujisi makanze mabotu kubantu. Nkakaambo kaako Jesu ncaakatuyiisya kupaila kuti: “Taateesu ooli kujulu . . . Abuboole Bwami bwako. Akucitwe kuyanda kwako, ansi ano mbubonya mbuli kujulu.” (Matayo 6:9, 10) Leza ulatubikkila maano kapati cakunga wakasweekelwa zinji kutegwa makanze aakwe azuzikizyigwe ncobeni.—Johane 3:16.

Alimwi amubale Matalikilo 1:26-28; Jakobo 1:13; a 1 Petro 5:6, 7.

ICIPA KUBUZYA BOOBU: Bantu banji bacifwa munkondo. Toonse tulakopana akaambo kakupenga kwabantu.

NCOLIYIISYA BBAIBBELE: Leza usyomezya kuti ciindi ciyoosika nayooleta luumuno munyika yoonse. Mu Bwami bwakwe, ibuli nimfwulumende yakujulu, bantu “tabakaiyi limbi nkondo pe.” Muciindi caboobo, “bayoofwula mapanga aabo kuba maamba aakulimya.” (Isaya 2:4) Leza uyoomanizya kutalulama akupenga koonse. Ibbaibbele lisyomezya kuti: “[Leza] uyoosindula misozi yoonse kumeso aabo, alimwi lufwu talukabi limbi, akwalo koomoka, kulila nokuba kuciswa takukabi limbi pe. Zintu zyakaindi [kubikkilizya akutalulama alimwi akupenga kwamazuba aano] zyamana.”—Ciyubunuzyo 21:3, 4.

Alimwi amubale Intembauzyo 37:10, 11; 46:9; a Mika 4:1-4.

ICIPA KUBUZYA BOOBU: Zikombelo zinji munyika ziyiisya kuti kuli cintu cimwi mumuntu icizumanana kupona muntu afwa. Bamwi basyoma kuti bafwide balakonzya kubacisa baumi naa kuti Leza ulabasubula basizibi kwiinda mukubaumpa mumulilo wahelo mane kukabe kutamani.

NCOLIYIISYA BBAIBBELE: Ikuti muntu wafwa, ulaleka kubako. Lugwalo lwa Mukambausi 9:5 lwaamba kuti: “Bafwide tabazyi cintu nociba comwe.” Mbwaanga bafwide tabakonzyi kuzyiba cintu cili coonse, naa kulimvwa munzila imwi, kunyina nobakonzya kubapenzya naa kubagwasya baumi.—Intembauzyo 146:3, 4.

Alimwi amubale Matalikilo 3:19 a Mukambausi 9:6, 10.

ICIPA KUBUZYA BOOBU: Tulayanda kuzumanana kupona, alimwi tuyanda kuti katukkomana mubuumi antoomwe abayandwa besu. Ncilengwa buya kulombozya kuti kubota bumwi buzuba tukabonane alimwi abayandwa besu bafwide.

NCOLIYIISYA BBAIBBELE: Ibunji bwabantu ibakafwa bayoobusyigwa. Jesu wakasyomezya kuti: ‘Boonse ibali muzyuumbwe . . . bayoozwa mulinzizyo.’ (Johane 5:28, 29) Kweelana amakanze ngaakajisi Leza kumatalikilo, aabo bayoobusyigwa, bayooba acoolwe cakupona muparadaiso anyika. (Luka 23:43) Cisyomezyo eeci cibikkilizya ikuba abuumi bulondokede alimwi butamani kubantu baswiilila. Ibbaibbele lyaamba kuti: “Balulami bayookona nyika, alimwi bayookala alinjiyo lyoonse mane kukabe kutamani.”—Intembauzyo 37:29.

Alimwi amubale Jobu 14:14, 15; Luka 7:11-17; a Milimo 24:15.

ICIPA KUBUZYA BOOBU: Bantu muzikombelo zyoonse balapaila. Nokuba boobo, ibanji balimvwa kuti mipailo yabo tayiingulwi.

NCOLIYIISYA BBAIBBELE: Jesu wakatuyiisya kuti ciindi notupaila tatweelede kubelesya majwi ngoonya cakwiinduluka-induluka. Wakati: “Ciindi nomupaila, mutanikwaambi majwi ngoonya cakwiinduluka-induluka.” (Matayo 6:7) Ikuti katuyanda kuti Leza aiswiilile mipailo yesu, tweelede kupaila munzila njayanda. Kutegwa tucite oobo, tweelede kwaazyiba makanze aa Leza mpoonya akupaila kweelana amakanze aayo. Lugwalo lwa 1 Johane 5:14 lwaamba kuti: “Kufwumbwa cintu ncotumulomba [Leza] ceendelana akuyanda kwakwe, ulatumvwa.”

Alimwi amubale Intembauzyo 65:2; Johane 14:6, 14; a 1 Johane 3:22.

ICIPA KUBUZYA BOOBU: Bantu banji bayeeya kuti ikuba amali, mpuwo, naa kubota ciwa zilakonzya kubapa kukkomana. Aboobo, balalitakata kuyandaula zintu eezyi—pele tabalujani lukkomano.

NCOLIYIISYA BBAIBBELE: Jesu wakaamba nzila iisololela kulukkomano naakati: “Balikkomene aabo bazyi kuti bayandika kusololelwa a Leza.” (Matayo 5:3) Lukkomano lwini-lwini lulakonzya kujanwa lilikke ikuti naa twabweza ntaamu yakuzuzikizya cintu ncotuyandika kapati—kuyanda kuzyiba kasimpe kajatikizya Leza amakanze ngajisi kulindiswe. Kasimpe aaka kajanika mu Bbaibbele. Ikuzyiba kasimpe aaka kulakonzya kutugwasya kubona cintu ciyandika ncobeni acitayandiki. Kusololelwa akasimpe kamu Bbaibbele notusala zyakucita kulakonzya kutupa kukkomana kapati mubuumi.—Luka 11:28.

Alimwi amubale Tusimpi 3:5, 6, 13-18 a 1 Timoteyo 6:9, 10.

 Oobu bwali buyo bwiinguzi bufwaafwi bwamu Bbaibbele kumibuzyo iili cisambomwe. Sena mulayanda kuzyiba twaambo atumbi? Ikuti kamuli umwi wabaabo “bazyi kuti bayandika kusololelwa a Leza,” nkokuti mulayanda. Ambweni muyanda kuzyiba bwiinguzi bwamibuzyo aimbi mbuli yakuti: ‘Kuti naa Leza ulatubikkila maano, nkaambo nzi ncalekelede bubi akupenga kwaciindi cilamfwu? Mbuti mbondikonzya kugwasya mukwasyi wangu kuti ube abuumi buli kabotu?’ Ibbaibbele lilapa bwiinguzi buzwide alimwi bukkazika moyo kumibuzyo eeyi alimwi aimbi minji.

Nokuba boobo, mazuba aano bantu banji balawayawaya kulanga-langa ncolyaamba Bbaibbele. Bayeeya kuti bbuku eeli ndipati kapati alimwi zimwi ziindi lilakatazya kumvwa. Sena inga mwayanda kuzyiba mbomukonzya kujana bwiinguzi mu Bbaibbele? Bakamboni ba Jehova balijisi nzila njobabelesya iikonzya kumugwasya.

Cakusaanguna, ibbuku lyakuti Ino Ncinzi Cini Bbaibbele Ncoliyiisya? lyakabambilwa kugwasya bantu kulanga-langa bwiinguzi bwamu Bbaibbele kujatikizya mibuzyo iiyandika kapati. Cabili nkuba apulogilamu iitabbadelelwi yaciiyo ca Bbaibbele. Kakunyina kumubbadelesya, umwi wa Bakamboni ba Jehova wakooko nkomukkala ulakonzya kuboola kuzoobandika makani aamu Bbaibbele andinywe kuŋanda yanu naa kubusena bumwi buli kabotu kwaciindi buyo cisyoonto amvwiki. Bantu babalilwa kumamiliyoni nyika yoonse bagwasyigwa kale abubambe oobu. Ibunji bwabo calukkomano balasinizya kuti: “Ndakajana kasimpe!”

Akati kazintu ziyandisi nzyomukonzya kujana, kasimpe nkakayandika kapati. Kasimpe kamu Bbaibbele kalatwaangununa kukusyoma mizimo, kunyongana mumizeezo alimwi akuba abukandu. Katupa kuba abulangizi, makanze alimwi alukkomano. Jesu wakati: “Muyoozyiba kasimpe, eelyo kasimpe kayoomwaangununa.”—Johane 8:32.