Koezyeezya bukkale oobu: David weenzya mootokala mubusena mbwatazyi. Zikwankwani alimwi azitondezyo zyamumugwagwa zitondezya kuti aawo mpayendela taasyi mpayelede kuti kabede aciindi eeci. David wabona kuti wasweeka. Kweelede kuti mpaanyonena taasyi pe mpaayelede kunyonena.

Ikuti nooli nduwe David, ino inga wacita buti?

Kuli nzila zili mbozibede nzyokonzya kusala:

1. Ulakonzya kubuzya bantu kuti bakutondezye nzila.

2. Ulakonzya kubelesya maapu, naa GPS.

3. Ulakonzya kuzumanana kweenda, kolombozya kuti ulalijana buyo kuti walulama.

Cakutadooneka, Nzila ya C njiitagwasyi kapati.

Nzila ya B ilagwasya kwiinda yakusaanguna. Kayi maapu naa GPS inga nkoili mulweendo loonse kuti kaikusololela.

Mbubonya buyo, alyalo Bbaibbela lilakonzya kukugwasya!

Bbuku eeli ilyuulwa kapati kwiinda mabbuku aambi lilakonzya:

• kukusololela ciindi nojisi mapenzi mubuumi

• kukugwasya kuti ulizyibe omwini akuti ukonzye kuba muntu uuli kabotu

• kututondezya mbokonzya kupona buumi bubotu kapati

Mbotwacizyibila buyo kukanana, tulabuzya mibuzyo.

• Ino Nguni wakalenga julu?

• Ino nyenyezi zipangidwa aanzi?

Mukuya kwaciindi tulatalika kubuzya mibuzyo iijatikizya zintu zicitika munyika.

• Nkaambo nzi zintu zibi ncozicitika?

• Nkaambo nzi bantu ncobafwa?

Mbuti kuti bwiinguzi bwaliko mu Bbaibbele kuzwa kaindi?

Bantu banji baamba kuti Bbaibbele lizwide twaano, akuti ndyakaindi, naa kuti lilakatazya kulimvwisya. Pele sena masimpe Bbaibbele ndelijisi penzi, naa penzi lini lizwa kuzintu nzyobaamba bantu kujatikizya Bbaibbele? Ino mbuti kuti nzyobamvwa tazili zyamasimpe?

Mucikozyanyo, bantu bayeeya kuti Bbaibbele lyaamba kuti Leza nguweendelezya nyika. Ino inga caba buti oobo? Nyika eeyi ilibijide kapati! Izwide kucisa alimwi akupenga, kuciswa alimwi akufwa, bucete alimwi antenda. Mbuti Leza siluyando mbwanga wacita zintu zili boobu?

Sena inga wayanda kubuzyiba bwiinguzi? Ncolyaamba Bbaibbele kujatikizya yooyo iweendelezya nyika inga cakugambya!

Ambweni wabona kuti lulayo iluli mubroshuwa eeyi luzwa mu Bbaibbele. Bakamboni ba Jehova balisinizyide kuti Bbaibbele lilapa busolozi busyomeka. Eeci cili boobo akaambo kakuti, “Magwalo oonse akasololelwa a Leza alimwi alagwasya mukuyiisya, mukusinsa, mukululamika zintu.” (2 Timoteyo 3:16, 17) Cilakonzya kukugwasya kuti walilanga-langa bbuku eeli ilyakalembwa kaindi—pele iligwasya amazuba aano!