Mulengi wesu musongo kwiinda ndiswe. Mbwali Usyi bana siluyando, ulatulanganya. Alimwi tanaakali makanze aakwe aakuti katulyeendelezya. (Jeremiya 10:23) Aboobo, mbubwenya mbuli mwana mbwayandika busolozi bwabazyali, toonse tuyandika busolozi bwa Leza. (Isaya 48:17, 18) Njiisyo zyamu Bbaibbele zipa busolozi buzwa kuli Leza.​—Amubale 2 Timoteyo 3:16.

Milawo ya Jehova anjiisyo zyakwe zilatuyiisya mbotukonzya kupona kabotu lino alimwi akututondezya mbotukonzya kujana zilongezyo zitamani kumbele. Mbwaanga Leza ngowakatulenga, cileelela kuti katutobela busolozi mbwatupa.​—Amubale Intembauzyo 19:7, 11; Ciyubunuzyo 4:11.

Njiisyo zyamu Bbaibbele twaambo twamasimpe twalo itukonzya kubelesyegwa mubukkale bwiindene-indene. Pele milawo ibelesyegwa buyo mubukkale bugaminide. (Deuteronomo 22:8) Tweelede kubelesya maano kutegwa tuzyibe njiisyo mboikonzya kubeleka mubukkale bumwi abumwi. (Tusimpi 2:10-12) Mucikozyanyo, Bbaibbele liyiisya kuti buumi ncipego kuzwa kuli Leza. Njiisyo eeyi ilakonzya kutugwasya notuli kumulimo, aŋanda alimwi anotuli mulweendo. Ipa kuti tulikwabilile kuntenda.​—Amubale Milimo 17:28.

Jesu wakaamba milawo yobilo iiyandika kapati iikonzya kutugwasya kumvwisya njiisyo zyobilo. Njiisyo yakusaanguna  yaamba kaambo ncobaponena bantu—kuzyiba Leza, kumuyanda akumubelekela cakusyomeka. Njiisyo eeyi yakusaanguna yeelede kutugwasya muzintu zyoonse nzyotusala. (Tusimpi 3:6) Aabo bapona kweelana anjiisyo eeyi baba balongwe ba Leza, balajana lukkomano lwini-lwini alimwi bayooba abuumi butamani.​—Amubale Matayo 22:36-38.

Njiisyo yabili ilakonzya kutugwasya kumvwana abantu. (1 Bakorinto 13:4-7) Ikutobela njiisyo eeyi yabili cibikkilizya kwiiya Leza mbwayendelezya bantu.​—Amubale Matayo 7:12; 22:39, 40.

Njiisyo zyamu Bbaibbele ziyiisya mikwasyi mboikonzya kukamantana muluyando. (Bakolose 3:12-14) Ijwi lya Leza alimwi likwabilila mikwasyi kwiinda mukuyiisya njiisyo iimbi—yakuti cikwati taceelede kumana.​—Amubale Matalikilo 2:24.

Kwiinda mukutobela njiisyo zyamu Bbaibbele tulakonzya kukwabilila zintu zyesu zyakumubili alimwi amizeezo yesu. Mucikozyanyo, basikunjizya milimo ziindi zinji bayanda babelesi batobela njiisyo zyamu Bbaibbele kujatikizya kusyomeka alimwi akubeleka cabunkutwe. (Tusimpi 10:4, 26; Bahebrayo 13:18) Kuyungizya waawo, Ijwi lya Leza lituyiisya kuti tweelede kukkutila azintu ziyandika alimwi akubikkila maano kucilongwe cesu a Leza kwiinda mbotubikkila maano kuzintu zyakumubili.​—Amubale Matayo 6:24, 25, 33; 1 Timoteyo 6:8-10.

Ikutobela njiisyo zyamu Bbaibbele cilakonzya kukwabilila buumi bwesu. (Tusimpi 14:30; 22:24, 25) Mucikozyanyo, ikutobela milawo ya Leza kujatikizya bukolwi cilatukwabilila kumalwazi aajaya alimwi akuntenda. (Tusimpi 23:20) Jehova ulatuzumizya kunywa bukoko pele ikutali kuciindizya. (Intembauzyo 104:15; 1 Bakorinto 6:10) Milawo ya Leza ilatugwasya mukuti taituyiisyi buyo kucita zintu zibotu, pele alimwi ituyiisya kukwabilila mizeezo yesu. (Intembauzyo 119:97-100) Nokuba boobo, Banakristo bakasimpe tabatobeli zyeelelo zya Leza akaambo buyo kakuti cilabagwasya. Balacita oobo kutegwa balemeke Jehova.​—Amubale Matayo 5:14-16.