Jesu waboola ku Jerusalemu ku Pobwe Lyakwaaba Tempele (naa, Hanukkah). Pobwe eeli ndyakusekelela kwaabwa kwatempele alimwi. Myaka iyiinda kumwaanda musyule oomu, Mwami waku Siriya, Antiochus Epiphanes Wane wakayaka cipaililo atala aacipaililo cipati catempele lya Leza. Kumbele, bana bamupaizi umwi mu Juda bakalwana akubweza munzi wa Jerusalemu alimwi akwaaba tempele kuli Jehova alimwi. Kuzwa ciindi eeco, mwaka amwaka kulaba pobwe mu Kisilevi 25, imwezi weendelelana aciindi cakumamanino aamwezi wa November akumatalikilo aamwezi wa December aakkalenda yesu.

Lino nciindi camupeyo. Jesu uleenda mutempele mukkoce lya Solomoni. Okuno ba Juda bamuzinguluka akumwaambila kuti: “Ino ulatupa kuzumbauzya kwaciindi cilamfwu buti? Ikuti koli ndonduwe Kristo, kotwaambila cakutainda mumbali.” (Johane 10:22-24) Ino Jesu wavwiila buti? Waamba kuti: “Ndamwaambila kale, pele tamusyomi pe.” Jesu tanaabaambila cacigaminina kuti ngo Kristo mbuli mbwaakaambila mukaintu mu Samariya kumugoti. (Johane 4:25, 26) Pele, walipandulula kwiinda mukwaamba kuti: “Abrahamu katanabako, mebo ndakaliko.”—Johane 8:58.

Jesu uyanda kuti bantu balizyibile beni kuti ngo Kristo kwiinda mukweelanya milimo yakwe amakani aakasinsimwa kujatikizya nzyayakucita Kristo. Nkakaambo kaako aziindi zimbi wakaambila basikwiiya bakwe kuti bataambili muntu uuli woonse kuti ngo Mesiya. Pele lino ba Juda aaba basilusulo wabaambila cakaanzambwene kuti: “Imilimo njondicita muzina lya Taata njiipa bumboni kujatikizya ndime. Pele tamusyomi pe.”—Johane 10:25, 26.

Nkaambo nzi ncobatasyomeni kuti Jesu ngo Kristo? Waamba kuti: “Tamusyomi pe nkaambo tamuli mbelele zyangu. Imbelele zyangu zilaliswiilila ijwi lyangu, ndilizizyi alimwi zilanditobela. Ndizipa buumi butamani, aboobo kunyina noziyoonyonyoonwa limbi, alimwi kunyina uuyoozikwempa mujanza lyangu. Ncaandipa Taata ncintu cipati kwiinda zintu zyoonse.” Kumane Jesu wabaambila mbwamvwana kapati a Bausyi, ulaamba: “Mebo a Taata tuli bamwi.” (Johane 10:26-30) Jesu uli waano anyika pele Bausyi bali kujulu, aboobo tapandululi kuti walo a Bausyi mubili omwe. Pele mbamwi mukuti bajisi makanze omwe, balikamantene.

Majwi ngaamba Jesu abanyemya kapati ba Juda eelyo alimwi babweza mabwe kuti bamujaye. Pele eeci tiicamupa kuyoowa Jesu. Waamba kuti: “Ndakamutondezya milimo mibotu minji iizwa kuli Taata. Mulimo nzi akati kayeeyi ngomuyanda kundipwayila mabwe?” Bamwiingula kuti: “Tuyanda kukupwaya mabwe ikutali akaambo kamulimo mubotu, pele akaambo kakutukila Leza; nkaambo yebo . . . ulibikka kuba leza.” (Johane 10:31-33) Mbwaanga Jesu kunyina naakaambide kuti nguleza, nkaambo nzi ncobamupeda mulandu ooyu?

Nkaambo kakuti Jesu waamba kuti ulaanguzu eezyo ba Juda nzyobasyoma kuti Leza alikke nguuzijisi. Mucikozyanyo, kujatikizya “mbelele” waamba kuti, “ndizipa buumi butamani,” eeco bantu ncobatakonzyi kucita. (Johane 10:28) Ba Juda tiibakabikkila maano kaambo Jesu nkaamba caantangalala kuti wakapegwa nguzu kuzwa kuli Bausyi.

Ikukazya mulandu wakubeja ngobamupa, Jesu wabuzya kuti: “Sena takulembedwe mu Mulawo wanu [ku Intembauzyo 82:6] kuti, ‘Ndakaamba kuti: “Muli baleza”’? Ikuti aabo jwi lya Leza mbolyakapa mulandu wakabaita kuti ‘baleza,’ . . . sena mebo nendakasalazyigwa akutumwa a Taata munyika mundaambila kuti, ‘Utukila Leza,’ akaambo kakuti ndaamba kuti, ‘Ndili Mwana wa Leza’?”—Johane 10:34-36.

Inzya, nobaba babetesi bataluleme Magwalo abaamba kuti ‘mbaaleza.’ Aboobo, mbuti ba Juda aaba mbobakonzya kumupa mulandu Jesu akaambo kakuti waamba kuti “Ndili Mwana wa Leza”? Jesu waamba cintu cimwi iceelede kubapa kusyoma, ulaamba: “Ikuti tandiciti milimo ya Taata, mutandisyomi pe. Pele ikuti kandiicita, nokuba kuti tamundisyomi, amusyome milimo kutegwa muzyibe akuzumanana kuzyiba kuti mebo a Taata tulikamantene.”—Johane 10:37, 38.

 Naamba boobu, ba Juda basola kumujata Jesu, pele alimwi wabatija. Wazwa mu Jerusalemu akuunka mutala lya Mulonga wa Jordano kubusena ooko nkwaakatalikila kubbapatizya Johane myaka iitandila kuli yone yainda. Kuboneka kuti busena oobu tabuli kulamfwu kapati ankomwe yakumusanza ya Lwizi lwa Galilaya.

Makamu aabantu aboola kuli Jesu kubusena oobu akutalika kwaamba kuti: “Johane kunyina naakacita citondezyo nociba comwe, pele zintu zyoonse nzyaakaamba Johane kujatikizya muntu ooyu zyakali zyamasimpe.” (Johane 10:41) Aboobo, ba Juda banji bamusyoma Jesu.