Naamana kubasinsa ba Farisi akaambo katunsiyansiya ntobatobela kutegwa baligwasye beni, Jesu waunka abasikwiiya bakwe. Wagama kuzyooko zya Turo a Sidoni mu Fonike, ikulampa makkilomita manji kuya kunyika lwaambo.

Jesu wajana ŋanda yakukkala pele tayandi kuti bantu bazyibe kuti nkwali. Pele akwalo kuno waalilwa kulisisa kubantu. Mukaintu mu Giriki iwakazyalilwa mubusena oobu wajana Jesu akutalika kumulomba kuti: “Ndifwide luse Mwami, O Mwana wa Davida. Mwanaangu musimbi unjidwe daimona limupenzya kapati.”—Matayo 15:22; Marko 7:26.

Nokwainda ciindi cili mbocibede, basikwiiya baambila Jesu kuti: “Komwaambila aunke nkaambo uzyaaboompolola musyule lyesu.” Mukwiingula, Jesu wapandulula kaambo ncaamucitila muuzyamvwide, ulaamba: “Tiindakatumwa kubantu boonse pe, pele ndakatumwa buyo kumbelele zisweekede zyamuŋanda ya Israyeli.” Pele mukaintu ooyu tanaatyompwa pe. Waswena munsi-munsi a Jesu, wamufwugamina akumukombelezya kuti: “Mwami, ndigwasye!”—Matayo 15:23-25.

Ambweni kasunka lusyomo lwamukaintu ooyu, Jesu waamba kaambo katondezya iba Juda mbobasalaula bantu bamisyobo iimbi, wati: “Tacili cibotu kubweza cinkwa cabana akuciwaalila tubwa.” (Matayo 15:26) Kwiinda mukwaamba kuti “tubwa,” Jesu watondezya kuti ngusilweetelelo kubantu ibatali ba Juda. Kweelede kuti mbwalibonya kumeso alimwi ajwi lyakwe libombe azyalo zitondezya kuti mbwalimvwa oobo.

Muciindi cakunyema, mukaintu ooyu wabelesya kaambo nkoonya ikajatikizya kusalaula kwaba Juda, kumane cakulibombya waamba kuti: “Inzya Mwami, pele tubwa tulalya bufwefwelenga buloka kutebulu lyabasimalelo.” Jesu wabona kuti mukaintu ooyu ulaamoyo mubotu, eelyo wamwaambila kuti: “Omukaintu, lusyomo lwako ndupati; acicitike kulinduwe mbuli mboyanda.” (Matayo 15:27, 28) Eelyo cacitika mbubonya oobo, nokuba kuti musimbi ooyo tako aawo! Naapilukila kuŋanda, mukaintu ooyu wajana mwanaakwe musimbi ulilede abulo kaponede cakumaninina—‘daimona lyazwa’!—Marko 7:30.

Kuzwa kucooko ca Fonike, Jesu abasikwiiya bakwe bakosola minzi kugama ku Mulonga wa Jordano nkouli kumulundu. Kuboneka kuti bazabuka Jordano kunyika kwa Lwizi lwa Galilaya akunjila mucooko ca Dekapole. Ooko batanta cilundu pele makamu aabantu abajana. Bantu aabo Jesu bamuletela bantu balemene, bapuutide, boofwu alimwi abasyaataambi. Balwazi aaba bababikka kumaulu aa Jesu, eelyo walo wabaponya. Bantu bagambwa akulemeka Leza wa Israyeli.

Jesu wabikkila kapati maano kumwaalumi umwi musinkematwi alimwi sikamaama. Mulakonzya kweezyeezya mbwalimvwide mwaalumi ooyu munkamu mpati boobu. Ambweni kabwene mbwalibilikide mwaalumi ooyu, Jesu wamugusya munkamu akumutola kumbali. Nobaba balikke, Jesu watondezya ncatiimucitile. Wanjizya minwe yakwe mumatwi aamwaalumi ooyu, eelyo amane kuswida mate, wamujata amulaka. Mpoonya kalangide kujulu, Jesu wabelesya bbala lya Chihebrayo ilyaamba kuti: “Sinkuka.” Mpoonya aawo, matwi aamuntu ooyu asinkuka alimwi watalika kwaambaula kabotu. Jesu tayandi kuti makani aaya amwaike, pele uyanda kuti bantu bamusyome kwiinda mukulibonena akulimvwida lwabo beni.—Marko 7:32-36.

Nguzu nzyajisi Jesu zyakuponya munzila yamaleele zyabanjila mumoyo bantu aabo ‘ibagambidwe kapati.’ Baamba kuti: “Wazicita kabotu zintu zyoonse. Basinkematwi ulabasinkula abasyaataambi ulabapa kwaambaula.”—Marko 7:37.