Jesu wali kuyiisya akuponya bantu mu Judaya amu Jerusalemu. Mpoonya wazabuka Mulonga wa Jordano kuti akayiisye bantu mumunzi amunzi mucooko ca Pereya. Pele lino-lino ulajokela mu Jerusalemu.

Jesu nacili mu Pereya muntu umwi wamubuzya kuti: “Mwami, sena masimpe kuti aabo ibayakufwutuka banooli buyo basyoonto?” Kulibonya kuti muntu ooyu ulaazyi makani ngobakazyanya basololi babukombi aakuti naa mbanji naa mbasyoonto buyo aabo ibayakufwutuka. Jesu waunyona mubandi; muciindi cakwaamba kuti bali bongaye bantu ibayakufwutuka, waamba ncayelede kucita muntu kutegwa afwutuke. Waamba kuti: “Amubeleke canguzu kuti munjile mumulyango uusyanikide.” Masimpe, kuyandika kubeleka canguzu, kuyuma. Nkaambo nzi ncocili boobo? Jesu wapandulula kuti: “Ndimwaambila kuti banji bayooyanda kunjila, pele bayookakilwa.”—Luka 13:23, 24.

Ikutondezya mbociyandika kubeleka canguzu, Jesu waamba kuti: “Ikuti mwiniŋanda wanyamuka kale akujala cijazyo, eelyo nywebo mwaima anze akutalika kukonkomona acijazyo akwaamba kuti, ‘Mwami, kotujalwida,’ . . . uyoomwaambila kuti, ‘Tandizyi naa mwazwa kuli. Amuzwe kulindime, nywebo nyoonse nobasikucita zitaluleme!’”—Luka 13:25-27.

Eeci citondezya mapenzi ngayakujana muntu uumuka kusika—ambweni uuboola aciindi ncayanda walo mwini—aboobo uujana kuti mulyango wajalwa kale akukkiigwa. Muntu ooyu waleelede kufwambaana kusika, nokuba kuti eeci caamba kuliimya zintu zimwi. Oobo mbocibede kubantu banji ibaleelede kugwasyigwa akaambo kakuti Jesu ulaambabo, ulabayiisya. Baalilwa kucibelesya coolwe cakubikka bukombi bwakasimpe mubusena bwakusaanguna mubuumi bwabo. Bunji bwabantu nkwaakatumwa Jesu tiibacitambula cipego ca Leza cakubapa lufwutuko. Jesu waamba kuti ‘bayoolila akuluma ntwino’ baakutandilwa anze. Pele bantu bazwa ‘kujwe akumbo, kunyika akumusanza,’ inzya, bazwa kumasi oonse buyo, “bayookkala akulya mu Bwami bwa Leza.”—Luka 13:28, 29.

Jesu wapandulula kuti: “Kuli baabo bamamanino [mbuli bantu batali ba Juda alimwi aba Juda bapenzyegwa] ibayooba bakusaanguna, alimwi abaabo bakusaanguna [ba Juda ibapedwe zyoolwe zyabukombi aabo ibalidunda akaambo kakuti mbalunyungu lwa Abrahamu] ibayooba bamamanino.” (Luka 13:30) Kuba “bamamanino” caamba kuti bantu bali boobu ibatalumbi tabakabi mu Bwami bwa Leza pe.

Ba Farisi bamwi lino baboola kuli Jesu akumwaambila kuti: “Kozwa okuno nkaambo Heroda [Antipa] uyanda kukujaya.” Ambweni Mwami Heroda mwini nguwakatalisya makani aaya kutegwa amukonge Jesu kuti atije kuzwa mucilawo eeci. Kuboneka kuti Heroda uyoowa kuti munzila imwi inga wajatikizyigwa mukujaya musinsimi aumbi, mbubonya mbwaakajatikizyigwa naakajaigwa Johane Mubbapatizi. Pele Jesu waambila ba Farisi  kuti: “Kamuya mukamwaambile mwaaba ooyo kuti, ‘Bona! Sunu ajuunza ndinootanda madaimona akuponya balwazi, pele mubuzuba bwatatu ndinoomanizyide.’” (Luka 13:31, 32) Mukwaamba Heroda kuti “mwaaba,” ambweni Jesu ubelesya maambilambali alo aamba mbobacenjede bamwaaba. Pele Jesu tako kweendelezyegwa naa kubindaanizyigwa a Heroda naa amuntu uumbi buyo. Ulacita mulimo ngobakamupa Bausyi kweelana aciindi ncaakamupa Leza, ikutali kweelana ancayanda muntu.

Jesu wazumanana kweenda mulweendo lwakwe lwakuya ku Jerusalemu nkaambo, mbuli mbwaamba, “taceeleli kuti musinsimi ajailwe kunze kwa Jerusalemu.” (Luka 13:33) Kunyina businsimi bwamu Bbaibbele ibwakaamba kuti Mesiya weelede kufwida mumunzi ooyu, aboobo nkaambo nzi Jesu ncaamba zyakujailwa nkuko? Nkaambo kakuti Jerusalemu ngomunzi mupati, ooko ikuli Nkuta Mpati Yaba Juda iijisi babetesi bali 71, alimwi ooko nkonkuko bantu ibapegwa mulandu wakuba basinsimi bakubeja nkobabetekelwa. Kuyungizya waawo, ooko nkonkuko banyama nkobapaizyigwa. Aboobo, Jesu ulizyi kuti inga tiiceelela kuti ajailwe kumbi.

Jesu walila wati: “Aakaka Jerusalemu, Jerusalemu, yebo oojaya basinsimi akubapwaya mabwe aabo batumwa kulinduwe—lyoonse ndakali kuyanda kubafwukatila bana bako mbubonya nkuku nseke mboifwukatila twana twanjiyo mumababa aanjiyo! Pele nywebo tiimwakali kuyanda. Amubone! Ŋanda yanu yaba tongo alimwi yasiigwa kulindinywe.” (Luka 13:34, 35) Cisi eeci cikaka Mwana wa Leza, aboobo mulandu ulaamutwe wabo!

Jesu katanasika ku Jerusalemu, musololi umwi waba Farisi wamwiitila kucakulya kuŋanda yakwe mu Sabata. Aabo baitidwe bamulangisisya Jesu kutegwa babone ncatiicitile muntu umwi uuciswa bulwazi bwakuzimba mubili (bulwazi bubi bwakuvwula kwameenda mumubili, kanji-kanji mumaulu alimwi amuzimpata). Jesu wabuzya ba Farisi alimwi abasyaazibwene mumakani aa Mulawo, wati: “Sena cilizumizyidwe kuponya mu Sabata naa pe?”—Luka 14:3.

Taakwe naba omwe waingula. Jesu waponya muntu ooyu akubabuzya kuti: “Nguni akati kanu uutakonzyi kumugusya cakufwambaana mwanaakwe naa ŋombe yakwe ikuti yawida mumugoti mubuzuba bwa Sabata?” (Luka 14:5) Alimwi baalilwa kumwiingula kumubuzyo ooyu ngwaabuzya cabusongo.