Jesu wali kupa basikwiiya bakwe lulayo lubotu lujatikizya kubelesya lubono. Pele basikwiiya bakwe tabali mbabo balikke baswiilide. Ba Farisi abalo nkobali aawa, alimwi beelede kulubikkila maano lulayo lwa Jesu. Nkaambo nzi? Nkaambo ‘bayandisya mali.’ Nobamvwa ncaamba Jesu, ‘batalika kusululwa anguwe.’—Luka 15:2; 16:13, 14.

Pele Jesu takongwi aceeci. Wabaambila kuti: “Ndendinywe mulyaamba kuti muliluleme kubantu, pele Leza uliizyi myoyo yanu. Nkaambo cintu cibonwa abantu kuti cilisumpukide ncisesemyo kuli Leza.”—Luka 16:15.

Kwaciindi cilamfwu, ba Farisi bali ‘kubonwa abantu kuti balisumpukide,’ pele mazuba ngunamasandu, lino casika ciindi cakuti zintu zicince. Bantu basumpukide kapati, ibavwubide muzintu zyamunyika, ibajisi zyuuno mutwaambo twacisi, alimwi ibajisi nguzu mubukombi beelede kuletwa ansi. Bantu-bantu buyo ibazyi kuti bayandika kusololelwa aa Leza beelede kusumpulwa. Jesu wacisalazya kuti kucinca kupati kuli mukucitika, wati:

“Mulawo a Basinsimi zyakali kwaambilizyigwa kusikila kuciindi ca Johane. Kuzwa kuciindi eeco Bwami bwa Leza mbobwaambilizyigwa kaali makani mabotu, alimwi bantu bamisyobo yoonse balwanina kuti banjile mulimbubo. Masimpe, ncuuba-uba kuti julu anyika zimane kwiinda kuti kabala kasyoonto nokaba komwe ka Mulawo katazuzikizyigwi.” (Luka 3:18; 16:16, 17) Ino majwi ngaamba Jesu atondezya buti kuti kucinca kuli mukucitika?

Basololi babukombi baba Juda cakulisumpula balyaamba kuti batobela Mulawo wa Musa. Amuyeeye kuti ciindi Jesu naakaponya moofwu ku Jerusalemu, cakulimvwa ba Farisi bakaamba kuti: “Swebo tuli basikwiiya ba Musa. Tulizyi kuti Leza wakaambaula a Musa.” (Johane 9:13, 28, 29) Mulimo umwi ngowakajisi Mulawo iwakapegwa kwiinda muli Musa ngwakusololela bantu balicesya kuli Mesiya, nkokuti, kuli Jesu. Johane Mubbapatizi wakaamba Jesu kuti Mwanaambelele wa Leza. (Johane 1:29-34) Kuzwa ciindi Johane naakatalika mulimo wakwe, ba Juda ibalicesya, kwaambisya bacete, bali kumvwa makani aajatikizya “Bwami bwa Leza.” Masimpe, kuli “makani mabotu” ngobakonzya kumvwa boonse aabo ibayanda kuba balelwa ba Bwami bwa Leza akugwasyigwa ambubo.

Eeci tacaambi kuti Mulawo wa Musa tauli mukuzuzikizyigwa pe; muciindi caboobo wagwasya bantu kusololelwa kuli Mesiya. Kuyungizya waawo, imukuli wakuutobela umana buya. Mucikozyanyo, Mulawo wakali kuzumizya kulekana akaambo katwaambo twiindene-indene, pele lino Jesu upandulula kuti “muntu woonse uuleka mukaintu wakwe akukwata umbi wacita bumambe, alimwi kufwumbwa uukwata mukaintu wakalekwa kumulumaakwe wacita bumambe.” (Luka 16:18) Eelo kaka majwi aaya abasulula ba Farisi aabo ibalipenda kutobela mulawo!

Lino Jesu waamba cikozyanyo citondezya mbokuli kupati kucinca ikuli mukucitika. Cikozyanyo  eeci caamba bantu bobilo—umwi aumwi wabo uli mubukkale ibwacinca munzila iigambya. Nomulanga-langa cikozyanyo eeci, amuyeeye kuti akati kabaabo bali mukuswiilila kuli ba Farisi ibayandisya mali aabo ibasumpulwa abantu.

Jesu waamba kuti: “Kwakali muvwubi umwi iwakali kusama zisani zyamubala wacisombo alimwi zyuuba-uba, akulya zibotu abuzuba. Pele sikulombelela umwi uutegwa Lazaro iwakajisi zilonda amubili woonse wakali kusiigwa amulyango wamuvwubi alimwi wakali kulombozya kulya bufwefwelenga ibwakali kuloka kutebulu lyamuvwubi ooyo. Inzya, nobaba babwa bakali kuboola akumyankuta zilonda zyakwe.”—Luka 16:19-21.

Ba Farisi bayandisya mali, aboobo sena kuli kuzumbauzya kujatikizya mbali mukwaamba Jesu naamba kujatikizya “muvwubi” mucikozyanyo cakwe? Basololi aaba babukombi bwaba Juda alimwi bayandisya kusama zisani zidula zyeebeka. Alimwi kunze lyakuba abuvwubi bwakumubili, kuboneka kuti mbavwubi mukuti bajisi zyoolwe alimwi amikuli iilibedelede. Inzya, ikubakozyanisya amuntu uusama zisani zidula zyacisombo citondezya zyuuno zyaatala nzyobajisi, mpoonya zisani zituba zyuuba-uba zitondezya mizeezo njobajisi yakulibona kululama.—Daniele 5:7.

Ino basololi aaba bavwubide, alimwi ibalisumpula bababona buti bacete, ibantu-bantu buyo? Bababona kuti mbaa ‛am ha·’aʹrets, naa bantu baansi, ibatauzyi Mulawo alimwi bateeleli kuyiisyigwa nguwo. (Johane 7:49) Eeci citondezya bukkale mwabede “sikulombelela umwi uutegwa Lazaro” ooyo uulombozya kulya nobuba ‘bufwefwelenga buloka  kutebulu lyamuvwubi.’ Mbubonya mbuli Lazaro ooyo uujisi zilonda mubili woonse, bantu-bantu buyo balanyansyigwa, babonwa mbuli kuti balasesemya kuli Leza.

Bukkale oobu ibweetezya bwaliko kwaciindi cili mbocibede, pele lino Jesu ulizyi kuti ciindi casika cakuti zintu zicince kapati, nkokuti kucinca kwabukkale bwabaabo bali mbuli muvwubi alimwi abwabaabo bali mbuli Lazaro.

Jesu wazumanana kwaamba kucinca ooku kugambya kwabukkale. Waamba kuti: “Lino mukuya kwaciindi, sikulombelela ooyo wakafwa, mpoonya bangelo bakamutola kumbali lya Abrahamu. Awalo muntu ooyo muvwubi wakafwa akuzikkwa. Lino mu Cuumbwe kali mumapenzi mapati wakalanga mujulu, eelyo wakabona Abrahamu kulaale a Lazaro kali kumbali lyakwe.”—Luka 16:22, 23.

Aabo ibali mukumuswiilila Jesu balizyi kuti Abrahamu wakafwa kaindi alimwi uli mu Cuumbwe. Magwalo alacisalazya kuti kunyina muntu uuli mu Cuumbwe uukonzya kubona naa kwaambaula, calo cibikkilizya a Abrahamu. (Mukambausi 9:5, 10) Aboobo, ino basololi aaba babukombi bayeeya kuti Jesu upandulula nzi mucikozyanyo eeci? Ncinzi ncali mukwaamba kujatikizya bantu-bantu buyo alimwi abasololi babukombi aabo ibayandisya mali?

Jesu wazwa akwaamba kucinca kumwi naamba kuti ‘Mulawo a Basinsimi zyakali kwaambilizyigwa kusikila kuciindi ca Johane, pele kuzwa kuciindi eeco Bwami bwa Leza mbobwaambilizyigwa kaali makani mabotu.’ Aboobo, bukambausi bwa Johane abwa Jesu Kristo bwapa kuti bantu aaba boonse bobilo, nkokuti muvwubi alimwi a Lazaro, bafwe kubukkale bwabo bwakaindi, mpoonya akubonwa munzila mpya mumeso aa Leza.

Cakutainda mumbali, kwaciindi cilamfwu bantu-bantu buyo naa bacete balikudyaamininwa kumuuya. Pele lino bali mukutambula akugwasyigwa amulumbe wa Bwami ooyo wakasaanguna kwaambilizyigwa a Johane Mubbapatizi alimwi lino iwaambilizyigwa a Jesu. Musyule oomu, bakali kuponena buyo ‘abufwefwelenga ibwakali kuloka kutebulu lyakumuuya’ lyabasololi babukombi. Pele lino basaninwa makani aayandika kapati aamu Magwalo, kwaambisya zintu zibotu Jesu nzyapandulula. Cili mbuli kuti lino bali mubukkale bwakukkomaninwa a Jehova Leza.

Mukwiimpana, basololi babukombi aabo bavwubide alimwi ibajisi nguzu bakakaka kutambula mulumbe wa Bwami ngwaakakambauka Johane alimwi ngwaali kukambauka Jesu mucisi coonse mbocizulwa. (Matayo 3:1, 2; 4:17) Mubwini, balinyemede, bamvwa moyo kucisa, akaambo kamulumbe ooyu, calo citondezya lubeta luli mbuli mulilo uuvwilima iluboola kuzwa kuli Leza.  (Matayo 3:7-12) Basololi babukombi ibayandisya mali balakonzya kubotelwa ikuti Jesu abasikwiiya bakwe baleka kwaambilizya mulumbe wa Leza. Basololi aabo bali mbuli muvwubi waambwa mucikozyanyo, ooyo waamba kuti: “Taata Abrahamu, kondifwida luse alimwi komutuma Lazaro kuti anjizye munwe wakwe mumaanzi akutontozya mulaka wangu, nkaambo ndapenga citaambiki mumulilo ooyu uupya kapati.”—Luka 16:24.

Pele eeco tacikoocitika pe. Bunji bwabasololi babukombi tabakoocinca. Bakakaka ‘kuswiilila Musa alimwi a Basinsimi,’ nkokuti magwalo aayo aakeelede kubapa kuzumina Jesu kuti ngo Mesiya alimwi a Mwami ngwasalide Leza. (Luka 16:29, 31; Bagalatiya 3:24) Alimwi tiibalicesya akuzumina kuti bagwasyigwe abacete aabo ibamusyoma Jesu alimwi lino ibakkomaninwa a Leza. Basikwiiya ba Jesu kunyina nobakonzya kuubya-ubya kasimpe akaambo buyo kakuyanda kukkomanisya basololi babukombi. Mucikozyanyo cakwe, Jesu waamba kaambo aaka mumajwi ngaamba “Taata Abrahamu” kwaambila muvwubi, kuti:

“Mwanaangu, koyeeya kuti wakatambula zintu zyako zyoonse zibotu nookali kupona, pele Lazaro awalo wakatambula zintu zibyaabi. Pele lino walo ulaumbulizyigwa okuno kakuli yebo ulapenga. Alimwi kunze lyazintu eezyi zyoonse, kwabikkwa dindi pati akati kesu andinywe kutegwa aabo bayanda kuzabuka kuzwa kokuno kuboola kulindinywe batacikonzyi alimwi abaabo bayanda kuzwa kooko akuboola kokuno batacikonzyi.”—Luka 16:25, 26.

Eelo kaka cililuleme alimwi cileelela kuti kwaba kucinca ooku kugambya! Lino kwaba kucinca kwabukkale bwabasololi babukombi ibalisumpula alimwi abwabantu balicesya aabo ibazumina kunyamuna joko lya Jesu, aboobo ibakatalukwa akusaninwa kabotu kumuuya. (Matayo 11:28-30) Kucinca ooku kuyoolibonya kapati mumyezi misyoonto iiboola ciindi cizuminano ca Mulawo caakunjililwa busena acizuminano cipya. (Jeremiya 31:31-33; Bakolose 2:14; Bahebrayo 8:7-13) Leza aakutila muuya uusalala mubuzuba bwa Pentekoste 33 C.E., ciyoolibonya antangalala kuti, basikwiiya ba Jesu mbabakkomaninwa a Leza ikutali ba Farisi alimwi abasibukombi bambi mbocibeleka limwi.