Kakwiindide myezi iitandila kucisambomwe kuzwa ciindi Johane Mubbapatizi naakatalika kukambauka, Jesu, lino uujisi myaka yakuzyalwa iisika ku 30, waboola kulinguwe ku Mulonga wa Jordano. Ino waboolela nzi? Tanaaboolela kuzyoomuswaya buyo pe. Alimwi Jesu tanaaboola kuzyikubona buyo mboweenda mulimo wa Johane. Jesu waboolela kuti azyikulombe Johane kuti amubbapatizye.

Tacigambyi pe kuti Johane wakaka ulaamba: “Nduwe weelede kundibbapatizya, nkaambo nzi ncoboola kulindime?” (Matayo 3:14) Johane ulizyi kuti Jesu Mwana wa Leza uulibedelede. Tee kayi muliyeeyede kuti Johane kacili mwida lyabanyina, wakaputauka akaambo kakukkomana ciindi Mariya kamitide Jesu naakaswaya Elizabeta, banyina Johane. Cakutadooneka, banyina bakamwaambila Johane makani aaya kumbele. Alimwi kweelede kuti wakaazyiba makani aajatikizya mulumbe ngwaakaambilizya mungelo kujatikizya kuzyalwa kwa Jesu alimwi akujatikizya bangelo ibakalibonya kubeembezi masiku ibuzuba mbwaakazyalwa Jesu.

Johane ulizyi kuti lubbapatizyo ndwacita lujatikizya bantu aabo ibeempwa kuzibi zyabo. Pele Jesu tajisi cibi cili coonse pe. Nokuba kuti Johane wasoleka kukaka, Jesu wazumanana ategwa: “Akube boobu lino, nkaambo tuleelede kucita oobo kutegwa tucite zintu zyoonse ziluleme.”​—Matayo 3:15.

Nkaambo nzi Jesu ncayelede kubbapatizyigwa? Lubbapatizyo lwa Jesu tacili citondezyo cakweempwa kuzibi pe. Lubbapatizyo lwakwe ncitondezyo cakuti walipa kucita kuyanda kwa Bausyi. (Bahebrayo 10:5-7) Jesu wali sikubeza mapulanga, pele lino ciindi casika cakuti atalike mulimo ngwaakamutumina Usyi wakujulu kuti azyikucite anyika. Sena muyeeya kuti kuli cintu cimwi cigambya ncalangila Johane kuti cilacitika aamubbapatizya Jesu?

Kumbele Johane waamba kuti: “Ooyo iwakandituma kuti kandibbapatizya mumaanzi wakandaambila kuti: ‘Ooyo ngoyoobona kuti muuya waseluka akukkala alinguwe, ooyu ngonguwe uubbapatizya mumuuya uusalala.’” (Johane 1:33) Aboobo Johane ulangila kuti muuya wa Leza ulaselukila muntu umwi ngwatiibbapatizye. Nkakaambo kaako, ciindi Jesu naaimpuka kuzwa mumeenda, kweelede kuti Johane tagambidwe pe kubona “muuya wa Leza ulaseluka mbuli nziba akuboola [aali Jesu].”​—Matayo 3:16.

Pele nkocili acimbi cacitika ciindi Jesu nabbapatizyigwa. ‘Julu lyamujalukila.’ Ino  eeci caamba nzi? Kuboneka kuti caamba kuti ciindi naabbapatizyigwa Jesu, wayeeya buumi mbwaakajisi kujulu katanaboola anyika. Aboobo, lino Jesu wabuyeeya buumi bwakwe kali mwana wa Jehova wamuuya kubikkilizya amakani oonse aajatikizya kasimpe Leza ngaakamuyiisya kujulu katanaboola anyika.

Kunze lyaboobo, ciindi naabbapatizyigwa Jesu, ijwi kuzwa kujulu lyaamba kuti: “Ooyu Mwanaangu ngweyandisya, ngwekkomanina.” (Matayo 3:17) Ino eelyo ndijwi lyani? Eeli jwi talikonzyi kuba jwi lya Jesu; nkaambo Jesu bali limwi a Johane aciindi eeci. Eeli ndijwi lya Leza. Cilisalede kuti Jesu Mwana wa Leza. Tali ngo Leza pe.

Ikaambo kapati nkakuti Jesu mwana wa Leza alimwi muntu mbubonya mbwaakabede muntu wakusaanguna Adamu. Sikwiiya Luka naakamana kupandulula lubbapatizyo lwa Jesu wakalemba kuti: “Jesu naakatalika mulimo wakwe wakajisi myaka iitandila ku 30, alimwi wakazyibidwe kuti wakali mwana wa Josefa, Josefa wakali mwana wa Heli, . . . mwana wa Davida, . . . mwana wa Abrahamu, . . . mwana wa Nowa, . . . mwana wa Adamu, . . . mwana wa Leza.”​—Luka 3:23-38.

Mbubonya Adamu mbwaakali “mwana wa Leza” muntunsi, awalo Jesu mbwabede oobo. Aaciindi cakubbapatizyigwa kwakwe, Jesu waba acilongwe cipya a Leza, waba Mwana wa Leza kumuuya. Aboobo Jesu ulakonzya kuyiisya bantu kasimpe ka Leza alimwi akubatondezya nzila iisolololela kubuumi. Jesu watalika kupona buumi oobo mukuya kwaciindi ibuyakumupa kutuula buumi bwakwe kacili cipaizyo cabantu basizibi.