Nobeenda kuzwa ku Judaya kuya ku Galilaya, Jesu abasikwiiya bakwe bagama kunyika kwiinda mucooko ca Samariya. Balikatede akaambo kalweendo. Cakuma 12:00 baima afwaafwi amunzi wa Sukari kutegwa balyookezye aamugoti ooyo uulangilwa kuti ngwaakasya Jakobo naa ngwaakabbadelela kuti usyigwe myaanda-myaanda yamyaka yainda. Kusikila sunu mugoti ooyu nkuucili munsi-munsi adolopo lya Nablus.

Jesu kacilyookezya amugoti ooyu, basikwiiya bakwe baunka mumunzi uuli munsi-munsi kuti bakaule zyakulya. Nobaunka, kwasika mukaintu muna Samariya kuzyikuteka meenda. Jesu wamulomba kuti: “Kondipa maanzi aakunywa.”​—Johane 4:7.

Kanji-kanji ba Juda aba Samariya tabalyatani pe akaambo kakusalaulana. Aboobo mukaintu wagambwa akubuzya kuti: “Ino caba buti kuti yebo, nokuba kuti uli mu Juda undilomba maanzi aakunywa, kakuli mebo ndili mukaintu muna Samariya?” Jesu waingula kuti: “Ikuti noolicizyi cipego citabbadelwi ca Leza ayooyo uukwaambila kuti, ‘Kondipa maanzi aakunywa,’ noomulomba eelyo walo naakupa maanzi aapa buumi.” Amvwe boobo mukaintu wati: “Omwami, tojisi acakutesya maanzi alimwi mugoti mulamfwu. Aboobo ino ulaajana kuli maanzi aayo aapa buumi? Sena uli mupati kwiinda taateesu Jakobo iwakatupa mugoti ooyu alimwi walo antoomwe abana bakwe aŋombe zyakwe ibakali kunywa maanzi kuzwa mulinguwo?”​—Johane 4:9-12.

Jesu waamba kuti: “Muntu woonse uunywa maanzi aaya uyoofwa nyota alimwi. Kufwumbwa uunywa maanzi ngondiyoomupa takafwi limbi nyota naaceya, pele maanzi ngondiyoomupa ayooba kasensa kamaanzi aabbobboma akupa buumi butamani mulinguwe.” (Johane 4:13, 14) Inzya, nokuba kuti ulikatede, Jesu uliyandide kumwaambila majwi aakasimpe aapa buumi mukaintu ooyu muna Samariya.

Mpoonya mukaintu waamba kuti: “Omwami, kondipa maanzi aayo kutegwa kanditafwi nyota alimwi kanditabooli lyoonse kubusena oobu kuzooteka maanzi.” Jesu lino kuboneka kuti waucinca mubandi, wamwaambila kuti: “Koya ukaite mulumaako muboole okuno.” Waingula kuti: “Tandijisi mulumi pe.” Pele kulangilwa kuti wagambwa kapati kumvwa ncazyi Jesu eelyo naamwaambila kuti: “Waingula kabotu kuti, ‘Tandijisi mulumi pe.’ Nkaambo wakalijisi balumi bosanwe, pele mwaalumi ooyo ngoli limwi tali mulumaako.”​—Johane 4:15-18.

Mukaintu ooyu wakabona kaambo, alimwi cakugambwa waamba kuti: “Omwami ndabona kuti uli musinsimi.” Mpoonya watondezya kuti ulayanda kuzyiba zintu zyakumuuya. Munzila nzi? Wazumanana ulaamba: “Bamatata bakali kukombela mucilundu eeci [Cilundu ca Gerizimu, icili afwaafwi], pele nywebo [noba Juda] mwaamba kuti mu Jerusalemu mobeelede kukombela bantu.”​—Johane 4:19, 20.

Pele Jesu wapandulula kuti ibusena bukombelwa tacili ncecintu cipati pe. Waamba kuti: “Ciyoosika ciindi nywebo nomutakakombi Taata mucilundu eeci nomuba mu Jerusalemu.” Mpoonya wamwaambila kuti: “Ciindi ciyoosika alimwi ncencico cino, eelyo bakombi bakasimpe  nobayookomba Taata mumuuya amukasimpe, nkaambo mubwini bantu bali boobu mbayandaula Taata kuti bamukombe.”​—Johane 4:21, 23, 24.

Ncayanda Taata mubakombi bakasimpe tabuli busena nkobamukombela, pele nzila mbobakomba. Mukaintu wakkomana kapati. Ulaamba: “Ndilizyi kuti Mesiya ulaboola, ooyo uutegwa Kristo. Aakusika ooyo, uyootwaambila zintu zyoonse caantangalala.”​—Johane 4:25.

Mpoonya Jesu wamusyamwida makani aakasimpe aayandika kapati, waamba kuti: “Mebo nendaambaula anduwe ndendime nguwe.” (Johane 4:26) Amuciyeeyele buyo eeco! Ooyu mukaintu waboolede buyo kuzyooteka meenda cakuma 12:00. Pele Jesu wamupa kuba acoolwe citaliboteli. Wamwaambila cakutainda mumbali makani aalibonya kuti tanabuzuba waambila muntu umbi uuli woonse, aakuti ngo Mesiya.

Basikwiiya ba Jesu bapiluka kuzwa ku Sukari azyakulya. Bamujana amugoti wa Jakobo mpobamusiide, pele lino waambaula amukaintu muna Samariya. Mbobasikila buyo basikwiiya, mukaintu ooyo wasiya nongo yakwe akuunka mumunzi.

Kali mumunzi wa Sukari, mukaintu ooyo walwiida bantu zintu nzyaamwaambila Jesu. Kasinizyide wabaambila kuti: “Kamuboola mubone muntu iwandaambila zintu zyoonse nzindakacita.” Mpoonya, ambweni kutegwa abape kuba aluyandisisyo bantu, wabuzya kuti: “Sena ooyu inga katali ngo Kristo?” (Johane 4:29) Ooyu mubuzyo ujatikizya makani mapati bantu ngobali kuyanda kuzyiba kuzwa kuciindi ca Musa. (Deuteronomo 18:18) Mubuzyo ooyu wapa bantu bamumunzi kunyamuka akuunka kuli Jesu kuti bakalibonene ameso aabo.

Aciindi eeci basikwiiya batalika kukulwaizya Jesu kuti alye zyakulya nzyobaleta. Pele waingula kuti: “Ndijisi cakulya ncendilya eeco ncomutazyi.” Basikwiiya bagambwa naabaambila boobo, eelyo batalika kubuzyanya kuti: “Sena kuli umwi iwamuletela cakulya cili coonse?” Caluyando Jesu wabapanduluda amajwi aabajatikizya basikumutobela boonse ategwa: “Cakulya cangu nkucita kuyanda kwayooyo wakandituma alimwi akumanizya mulimo wakwe.”​—Johane 4:32-34.

 Jesu taambi mulimo wakutebula maila ooyo weelede kutalika kwainda myezi yone. Muciindi caboobo, Jesu waamba kutebula munzila yakumuuya, mbubonya mbwaatondezya naamba kuti: “Amuwaale meso aanu mubone myuunda, nkaambo yayuma kale kuti itebulwe. Lino sikutebula utambula bulumbu alimwi uyobolola micelo yakubuumi butamani, kutegwa sikuminza asikutebula bakakkomanine antoomwe.”​—Johane 4:35, 36.

Ambweni Jesu ulicibwene kale icitiicitike akaambo kamubandi ngwaajisi amukaintu muna Samariya. Bantu banji bamumunzi wa Sukari bamusyoma Jesu akaambo kabumboni bwamukaintu ooyu, nkaambo ubaambila kuti: “Wandaambila zintu zyoonse nzindakacita.” (Johane 4:39) Aboobo, bantu baku Sukari nobasika kumugoti nkwabede, balomba Jesu kuti akkale ambabo kutegwa abaambile azimbi. Jesu wazumina, eelyo wakkala mu Samariya mazuba obilo.

Ba Samariya nobamuswiilila Jesu, abambi ibanji bamusyoma. Baambila mukaintu kuti: “Tatucisyomi akaambo buyo kamajwi aako; nkaambo twalimvwida tobeni, alimwi tulizyi kuti mubwini muntu ooyu mufwutuli wanyika.” (Johane 4:42) Masimpe, mukaintu muna Samariya wapa cikozyanyo cibotu cambotukonzya kupa bumboni kujatikizya Kristo, kwiinda mukupa kuti baswiilizi babe aluyandisisyo lwakwiiya makani aambi.

Amuyeeye kuti lino kwacaala buyo myezi yone kuti kutebula kutalikwe​—kuboneka kuti nkutebula kwabbaale kwalo kucitwa ciindi cacilimo mucisi eeci. Aboobo lino ambweni muu November naa December. Eeci caamba kuti nolyakamana Pobwe Lyakwiindilila lyamu 30 C.E., Jesu abasikwiiya bakwe bakakkala myezi iisika kulusele mu Judaya kabayiisya akubbapatizya. Lino bagama kunyika kucooko cokwabo ca Galilaya. Ino ncinzi ncobayakujana ooko?