1, 2. (a) Ino ndilili cipego nociyandika kapati kulindinywe? (b) Nkaambo nzi cinunuzyo ncocili cipego ca Leza cipati kwiinda zyoonse?

NCIPEGO nzi ciinda kubota ncomwakapedwe amuntu umbi? Kutegwa mubone kuti cipego cilayandika kapati kulindinywe, taceelede kudula buya pe. Ikuti cipego kacimupa kukkomana naa kacili cintu ncomupengede ncobeni, mulalumba kapati.

² Akati kazipego zyoonse nzyatupede Leza, kuli cipego ncotuyandika kapati kwiinda zyoonse. Eeci ncipego cipati kwiinda cipego cili coonse Leza ncabapede bantu. Mucibalo eeci, tulaiya kuti Jehova wakatuma Mwanaakwe, Jesu Kristo, kutegwa tukonzye kupona mane kukabe kutamani. (Amubale Matayo 20:28.) Kwiinda mukutuma Jesu aano anyika kali cinunuzyo, Jehova wakatondezya kuti ulatuyanda kapati.

3. Nkaambo nzi bantu ncobafwida?

³ Cinunuzyo ninzila njabelesya Jehova kwaangununa bantu kucibi alufwu. (Baefeso 1:7) Kutegwa tumvwisye kaambo cinunuzyo ncocakali kuyandika, tweelede kuzyiba icakacitika myaka minji yainda mumuunda wa Edeni. Bazyali besu bakusaanguna, ba Adamu a Eva, bakabisya. Aboobo, bakafwa. Andiswe tulafwa akaambo kakuti twakakona cibi kuli Adamu a Eva.—Amubone Bupanduluzi Buyungizyidwe 9.

4. Ino Adamu nguni, alimwi ino ncinzi ncaakajisi?

⁴ Ciindi Jehova naakalenga muntu wakusaanguna, Adamu, wakamupa cintu cimwi ciyandika kapati. Wakapa Adamu  buumi bulondokede. Adamu wakajisi mizeezo iilondokede alimwi amubili uulondokede. Tanaakali kukonzya kuciswa, kucembaala alimwi akufwa pe. Kuyungizya waawo, akaambo kakuti Jehova ngookamulenga Adamu, nkokuti Leza wakali mbuli kuti ngousyi. (Luka 3:38) Ciindi aciindi Jehova wakali kwaambaula anguwe. Cakusalazya Leza wakaambila Adamu ncaakali kuyanda kulinguwe alimwi wakamupa mulimo uukkomanisya.—Matalikilo 1:28-30; 2:16, 17.

5. Ino Bbaibbele nolyaamba kuti Adamu wakalengwa “mucinkozya ca Leza” lipandulula nzi?

⁵ Adamu wakalengwa “mucinkozya ca Leza.” (Matalikilo 1:27) Jehova wakamupa bube mbuli mbwajisi walo mwini, bube mbuli luyando, busongo, bululami alimwi anguzu. Wakapa Adamu nguzu zyakulisalila. Adamu tanaakali mbuli cilobboti naa muncini uutayeeyi. Leza wakamulenga kuti kakonzya kulisalila kucita ziluzi naa zitaluzi. Ikuti naakasala kumvwida Leza, Adamu naakazumanana kupona mane kukabe kutamani mu Paradaiso.

6. Ncinzi Adamu ncaakasweekelwa akaambo kakutamvwida Leza? Ino eeci citujatikizya buti swebo?

⁶ Ciindi Adamu naakazangila Leza akupegwa cisubulo calufwu, wakasweekelwa kapati. Wakasweekelwa cilongwe citaliboteli a Jehova, ibuumi bulondokede, alimwi abusena bubotu kapati mbwaakali kukkala bwamu Paradaiso. (Matalikilo 3:17-19) Adamu a Eva bakacita caali kutamumvwida Leza, aboobo bakanyina bulangizi buli boonse bwakupona kumbele. Akaambo kaceeco ncaakacita Adamu, ‘icibi cakanjila munyika kwiinda mumuntu omwe alufwu kwiinda mucibi, eelyo lufwu lwakasikila bantu boonse nkaambo boonse bakabisya.’ (Baroma 5:12) Ciindi Adamu naakabisya, ‘wakalisambala’ lwakwe mwini kubikkilizya andiswe mubuzike bwacibi alufwu. (Baroma 7:14) Sena swebo tulijisi bulangizi buli boonse? Inzya nkobuli.

7, 8. Ino cinunuzyo ninzi?

 ⁷ Ino cinunuzyo ninzi? Mubufwaafwi, cinunuzyo cijatikizya zintu zyobilo. Cakusaanguna, cinunuzyo mweelwe wamali aabbadelwa kutegwa muntu umwi aangununwe naa kuti cintu cimwi cinununwe. Cabili, cinunuzyo ncintu cilungwa naa kubbadelwa iceelene amuulo wacintu eeco cibbadelelwa.

⁸ Kunyina muntu naba omwe iwakali kukonzya kubbadelela mulandu mupati kapati ngwaakacita Adamu ciindi naakabisya akutuletela lufwu. Nokuba boobo, Jehova wakabamba nzila yakutwaangununa kucibi alufwu. Lino atwiiye mbocibeleka cinunuzyo alimwi ambotukonzya kugwasyigwa ancico.

9. Ino ncinunuzyo icili buti cakali kuyandika?

⁹ Kunyina naba omwe akati kesu wakali kukonzya kupa cinunuzyo cabuumi bulondokede mbwaakasweekelwa Adamu. Nkaambo nzi? Nkaambo swebo toonse tatulondokede pe. (Intembauzyo 49:7, 8) Cinunuzyo icakeelede kupegwa mbuumi abumbi bulondokede bwamuntu. Nkakaambo kaako ciitwa kuti “cinunuzyo ceelene.” (1 Timoteyo 2:6) Cinunuzyo icakali kuyandika nceeco cijisi muulo iweelene abuumi mbwaakasweekelwa Adamu.

10. Ino Jehova wakacita buti kuti ape cinunuzyo?

¹⁰ Ino mbuti Jehova mbwaakapa cinunuzyo? Jehova wakatuma Mwanaakwe ngwayandisya kapati kuti aboole anyika. Ooyu Mwanaakwe, Jesu, nguwakali cilenge cakwe cakusaanguna. (1 Johane 4:9, 10) Jesu wakalisungula kusiya Bausyi alimwi akuzwa kujulu nkwaakali kukkala. (Bafilipi 2:7) Jehova wakalonzya Jesu kuzwa kujulu akumuleta anyika, aboobo Jesu wakazyalwa kali muntu uulondokede, uutakwe cibi.—Luka 1:35.

11. Ino muntu omwe wakaba buti cinunuzyo cabantu boonse?

 ¹¹ Muntu wakusaanguna, Adamu, wakapa kuti bantu boonse basweekelwe buumi bulondokede ciindi naatakamvwida Jehova. Sena kuli muntu umbi iwakali kukonzya kumana lufwu ilwakasikila bana ba Adamu boonse? Inzya. (Amubale Baroma 5:19.) Jesu, walo iwatakacita cibi nociba comwe, wakapa buumi bwakwe bulondokede kuti bube cinunuzyo. (1 Bakorinto 15:45) Buumi bwakwe bulondokede bwakali kukonzya kubelesyegwa kumana lufwu ndobakakona bana ba Adamu boonse.—1 Bakorinto 15:21, 22.

12. Ino nkaambo nzi Jesu ncaakapengela kapati?

¹² Bbaibbele lilaamba mbwaakapenga kapati Jesu katanafwa. Wakakwibbaulwa calunya, kugagailwa aacisamu cakupenzyezya, akufwa lufwu lucisa alimwi lutola ciindi cilamfwu. (Johane 19:1, 16-18, 30) Ino nkaambo nzi Jesu ncaakapengela kapati boobu? Nkaambo Saatani wakatwanga kuti kunyina muntu uukonzya kusyomeka kuli Leza ikuti wasunkwa citaambiki. Jesu wakatondezya kuti muntu uulondokede ulakonzya kusyomeka kuli Leza nokuba kuti wapenga citaambiki. Amuyeeyele buyo mbwaakakkomana Jehova akaambo kancaakacita Jesu!—Tusimpi 27:11; amubone Bupanduluzi Buyungizyidwe 15.

13. Ino cinunuzyo cakabbadelwa buti?

¹³ Ino cinunuzyo cakabbadelwa buti? Jesu wakapa Bausyi muulo wabuumi bwakwe. Mu Nisani 14, 33 C.E. kweelana akkalenda yaba Juda, Jehova wakalekela kuti Jesu ajaigwe abasinkondonyina. (Bahebrayo 10:10) Nokwakainda mazuba otatwe kuzwa waawo, Jehova wakamubusya Jesu kuzwa kubafwu, katali muntu wanyama, pele kajisi mubili wamuuya. Mpoonya naakapiluka kujulu kuli Bausyi, Jesu wakapa Jehova muulo wabuumi bwakwe bulondokede kabuli cinunuzyo. (Bahebrayo 9:24) Lino mbwaanga cinunuzyo cakabbadelwa, tulijisi coolwe cakwaangununwa kucibi alufwu.—Amubale Baroma 3:23, 24.

14, 15. Ncinzi ncotweelede kucita kutegwa tulekelelwe zibi zyesu?

¹⁴ Noliba lino tulagwasyigwa acipego ca Leza cipati kwiinda zyoonse. Atubone mbotugwasyigwa ciindi cino alimwi ambotuyakugwasyigwa kumbele.

¹⁵ Tulalekelelwa zibi. Nciyumu kucita zintu zibotu ciindi coonse. Tulalubizya, alimwi zimwi ziindi tulaamba akucita zintu zitali kabotu. (Bakolose 1:13, 14) Ino inga twalekelelwa buti? Tweelede kuusa ncobeni akaambo kacibi ncotwacita alimwi akumulomba Jehova cakulicesya kuti atulekelele. Kwiinda mukucita boobo, tulakonzya kuba alusyomo lwakuti twalekelelwa zibi.—1 Johane 1:8, 9.

16. Ncinzi ncotweelede kucita kutegwa tube aamanjezyeezya mabotu?

¹⁶ Tulakonzya kuba amanjezyeezya mabotu. Ciindi manjezyeezya eesu naatwaambila kuti twacita cintu citali kabotu, tulalipa mulandu, ambweni buya tulimvwa bubi alimwi akulimvwa kubula mulimo. Pele tatweelede kugolelwa maano akucileka pe. Ikuti twamulomba Jehova camoyo woonse kuti atulekelele, ncobeni ulakonzya kutuswiilila akutulekelela. (Bahebrayo 9:13, 14) Jehova uyanda kuti tumwaambile kufwumbwa mapenzi alimwi akulezya nkotujisi. (Bahebrayo 4:14-16) Kwiinda mukucita boobo, tulakonzya kuba muluumuno a Leza.

17. Ino nzileleko nzi nzyotukonzya kujana akaambo kakuti Jesu wakatufwida?

¹⁷ Tulijisi bulangizi bwakupona kukabe kutamani. “Cakuvwola cacibi ndufwu, pele cipego ncapa Leza mbuumi butamani kwiinda muli Kristo Jesu Mwami wesu.” (Baroma 6:23) Akaambo kakuti Jesu wakatufwida, tulakonzya kupona mane kukabe kutamani akukkomana abuumi bulondokede, kakunyina kuciswa. (Ciyubunuzyo 21:3, 4) Pele ino ncinzi ncotweelede kucita kutegwa tukajane zileleko eezyi?

18. Ino tuzyi buti kuti Jehova ulatuyanda?

¹⁸ Amuyeeye buyo mbomukkomana mumoyo ciindi muntu umwi namupa cipego citaliboteli. Cinunuzyo ncipego ciyandika kapati kwiinda zyoonse, aboobo tweelede kumulumba kapati Jehova akaambo kancico. Lugwalo lwa Johane 3:16 lutwaambila kuti, “Leza wakaiyanda kapati nyika cakuti wakapa Mwanaakwe simuzyalwaalikke.” Masimpe, Jehova ulatuyanda kapati cakuti wakatupa Mwanaakwe ngwayandisya, Jesu. Alimwi tulizyi kuti awalo Jesu ulatuyanda, nkaambo wakalisungula kutufwida. (Johane 15:13) Cipego cacinunuzyo ceelede kumupa kusyoma kuti Jehova alimwi a Jesu balamuyanda nywebo kumugama.—Bagalatiya 2:20.

19, 20. (a) Mbuti mbomukonzya kuba mulongwe wa Jehova? (b) Ino inga mwatondezya buti kuti mulacizumina cipaizyo cacinunuzyo ca Jesu?

¹⁹ Mbokunga lino mwaiya luyando lupati ndwaakatondezya Leza, mbuti mbomukonzya kuba mulongwe wakwe? Tacili cuuba-uba kuyanda muntu ngomutazyi. Lugwalo lwa Johane 17:3 lwaamba kuti tulakonzya kumuzyiba Jehova. Kwiinda mukucita boobo, luyando ndomujisi kulinguwe luyookomena, munooyanda kumukkomanisya ciindi coonse, alimwi muyooba balongwe bakwe. Aboobo amuzumanane kwiiya kujatikizya Jehova kwiinda mukwiiya Bbaibbele.—1 Johane 5:3.

²⁰ Amucizumine cipaizyo cacinunuzyo ca Jesu. Bbaibbele lyaamba kuti “ooyo uumusyoma Mwana ulaabuumi butamani.” (Johane 3:36) Ino kusyoma caamba nzi? Caamba kucita nzyaakatuyiisya Jesu. (Johane 13:15) Tatweelede kwaamba buyo amulomo kuti tulamusyoma Jesu. Kutegwa tucizumine cinunuzyo, tweelede kutondezya lusyomo mumilimo. Kulugwalo lwa Jakobo 2:26, tubala kuti: “Lusyomo lunyina milimo lulifwide.”

21, 22. (a) Nkaambo nzi ncotweelede kujanika ku Ciibalusyo calufwu lwa Kristo mwaka amwaka? (b) Ncinzi ciyakubandikwa mu Zibalo 6 alimwi a 7?

 ²¹ Amujanike ku Ciibalusyo calufwu lwa Kristo. Mangolezya katanafwa Jesu, wakatulailila kuti tweelede kucita ciibalusyo calufwu lwakwe. Tulacita oobo mwaka amwaka, alimwi ciitwa kuti Ciibalusyo naa “Mulalilo wa Mwami.” (1 Bakorinto 11:20; Matayo 26:26-28) Jesu uyanda kuti katuyeeya lyoonse kuti wakapa buumi bwakwe bulondokede kabuli cinunuzyo cesu. Wakaamba kuti: “Kamucita oobu lyoonse kutegwa kamundiyeeya.” (Amubale Luka 22:19.) Ciindi nomujanika ku Ciibalusyo, mutondezya kuti mulaciyeeya cinunuzyo alimwi muliluyeeyede luyando lupati ndwaakatutondezya Jehova alimwi a Jesu.—Amubone Bupanduluzi Buyungizyidwe 16.

²² Cinunuzyo ncipego cipati kwiinda zipego zyoonse nzyotukonzya kupegwa. (2 Bakorinto 9:14, 15) Cipego eeci cibotu kapati ciyakugwasya alimwi amamiliyoni aabantu aabo bafwide. Zibalo 6 alimwi a 7 zibandika mbociyakukonzyeka eeci.