1, 2. Ino mubuzyo nzi ngomukonzya kulibuzya, alimwi nkaambo nzi ncociyandika kucita boobo?

NOMWALI kwiiya Bbaibbele, mwaiya kuti bantu banji ibalyaamba kuti bakomba Leza, mubwini balayiisya naa kucita zintu nzyasulide Leza. (2 Bakorinto 6:17) Nkakaambo kaako Jehova utulailila kuti tuzwe mubukombi bwakubeja, nkokuti muli “Babuloni Mupati.” (Ciyubunuzyo 18:2, 4) Ino nywebo mulatyani? Umwi aumwi wesu weelede kusala, aboobo tweelede kulibuzya kuti, ‘Sena ndiyanda kukomba Leza munzila walo njayanda kuti kandimukomba, naa sena ndiyanda kumukomba munzila njindali kumukomba lyoonse?’

² Ikuti naa mwakazwa kale naa mwakacileka kunjila cikombelo cakubeja, nkokuti mucitide kabotu. Pele ambweni mukati kamoyo wanu kuli micito imwi naa zilengwa zyamubukombi bwakubeja nzyomucikkomanina. Lino atubandike micito alimwi azilengwa zimwi eezyi akubona kaambo ncociyandika kapati kuzibona mbwazibona Jehova.

3. (a) Ino nkaambo nzi ncocikonzya kubayumina bamwi kuleka kubelesya zikozyanyo mubukombi bwabo? (b) Ino Bbaibbele lyaamba nzi kujatikizya kubelesya zikozyanyo mukukomba Leza?

³ Bantu bamwi bali kubelesya zikozyanyo naa twaanda twamalende kukomba Leza kwamyaka minji. Ikuti naa oobo mbomwali kucita andinywe, ambweni cilakonzya kumubeda ceenzu naa kumuyumina kukomba Leza kakunyina kubelesya zintu eezyi. Pele amuyeeye kuti Jehova utuyiisya mbotweelede kumukomba. Alimwi cakusalazya Bbaibbele litwaambila kuti Jehova tayandi kuti katubelesya zikozyanyo mubukombi bwesu.—Amubale Kulonga 20:4, 5; Intembauzyo 115:4-8; Isaya 42:8; 1 Johane 5:21.

4. (a) Ino nkaambo nzi ncotuteelede kukomba basikale? (b) Ino nkaambo nzi Jehova ncaakaambila bantu bakwe ikutasola kwaambaula abafwu?

 ⁴ Bantu bamwi balakonzya kubelesya ciindi cinji alimwi akusoleka canguzu kukkomanisya mizimo yabasikale babo. Mane buya balakonzya kubakomba basikale aabo. Pele twakaiya kuti aabo ibakafwa tabakonzyi kutugwasya naa kutucita cibi. Tabaponi kubusena bumwi pe. Masimpe, ncilijazyo ikusola kubandika ambabo nkaambo kufwumbwa mulumbe uulibonya mbuli kuti uzwa kuli wacibbululu iwakafwa, mubwini uzwa kumadaimona. Nkakaambo kaako Jehova wakalailila bana Israyeli kutasola kubandika abafwu naa kujatikizyigwa mukusyoma mizimo naa madaimona ikuli koonse.—Deuteronomo 18:10-12; amubone Bupanduluzi Buyungizyidwe 26 a 31.

5. Ncinzi cikonzya kumugwasya kuleka kubelesya zikozyanyo mukukomba Leza alimwi akuleka kukomba basikale banu?

⁵ Ino ncinzi cikonzya kumugwasya kuleka kubelesya zikozyanyo mukukomba Leza naa kuleka kukomba basikale banu? Mweelede kubala Bbaibbele akukkala ansi kuyeeya mbwakubona Jehova kucita boobo. Ukubona kuba cintu “cisesemya” naa civwundausya kumoyo. (Deuteronomo 27:15) Amupaile kuli Jehova buzuba abuzuba kutegwa amugwasye kubona zintu mbubonya mbwazibona walo alimwi akuti mumukombe munzila njayanda. (Isaya 55:9) Mulakonzya kuba alusyomo lwakuti Jehova uyoomupa nguzu nzyomuyandika kutegwa muzinyonyoone zintu zyoonse nzyomujisi iziswaangene abukombi bwakubeja.

6. Ino nkaambo nzi buzuba bwa December 25 ncobwakasalwa kuba buzuba bwakusekelela kuzyalwa kwa Jesu?

⁶ Munyika yoonse mboizulwa, Kkilisimasi ili akati kamapobwe aadumide kapati, alimwi bantu banji bayeeya kuti ndipobwe lyakusekelela kuzyalwa kwa Jesu. Pele masimpe ngakuti Kkilisimasi iswaangene abukombi bwakubeja. Bbuku limwi ilipandulula twaambo tujatikizya makani aaindene-indene lyaamba kuti bana Roma ibatakombi Leza bakali kusekelela  kuzyalwa kwazuba mu December 25. Basololi bazikombelo bakali kuyanda kuti bantu aaba ibatakombi Leza basandulwe kuba Banakristo, aboobo nokuba kuti Jesu tanaakazyalwa mubuzuba bwa December 25, bakasala kuti kabasekelela kuzyalwa kwa Jesu mubuzuba oobu. (Luka 2:8-12) Basikwiiya ba Jesu tiibakali kusekelela Kkilisimasi. Bbuku limwi lyaamba kuti mumyaka iili 200 iyakainda kuzwa ciindi Jesu naakazyalwa, “taakwe muntu wakazyi buzuba bwini mbwaakazyalwa, alimwi mbasyoonto bantu ibakali kulipenzya amakani aabuzuba bwakuzyalwa kwakwe.” (Sacred Origins of Profound Things) Kusekelela Kkilisimasi kwakatalika nokwakainda myaanda yamyaka minji kuzwa ciindi Jesu naakali aano aanyika.

7. Ino nkaambo nzi Banakristo bakasimpe ncobatasekeleli Kkilisimasi?

⁷ Bantu banji balizyi kuti pobwe lya Kkilisimasi alimwi azilengwa zyandilyo, mbuli cilengwa cakupobola alimwi akupana zipego, zyakazwa kubantu batakombi Leza. Mucikozyanyo, ku England alimwi amumasi amwi aaku America, kwakali ciindi ikusekelela pobwe lya Kkilisimasi nokwakakasyidwe akaambo kakuti lyakazwa kubantu batakombi Leza. Kufwumbwa muntu iwakali kulisekelela wakali kusubulwa. Pele mukuya kwaciindi bantu bakatalika alimwi kusekelela Kkilisimasi. Nkaambo nzi Banakristo bakasimpe ncobatasekeleli Kkilisimasi? Nkaambo bayanda kukkomanisya Leza muzintu zyoonse nzyobacita.

8, 9. Ino nkaambo nzi Banakristo bakusaanguna ncobatakali kusekelela mazuba aakuzyalwa?

⁸ Pobwe limbi ndyobasekelela bantu banji mbuzuba bwakuzyalwa kwabo. Sena Banakristo beelede kusekelela mazuba aakuzyalwa? Mapobwe aakusekelela buzuba bwakuzyalwa alikke aambidwe mu Bbaibbele ngabantu ibatakali kukomba Jehova. (Matalikilo 40:20; Marko 6:21) Mapobwe aakusekelela buzuba bwakuzyalwa akali kucitwa kutegwa bantu balemeke baleza bakubeja. Nkakaambo kaako Banakristo bakusaanguna  “bakali kusyoma kuti kusekelela buzuba bwakuzyalwa cakali cilengwa cabantu batakombi Leza.”—The World Book Encyclopedia.

⁹ Ba Giriki alimwi aba Roma bansiku bakali kusyoma kuti ciindi muntu nazyalwa, inga kuli muzimo uuboola kulinguwe, eelyo muzimo ooyu ulamukwabilila muntu ooyo mubuumi bwakwe boonse. Ibbuku lyakuti The Lore of Birthdays lyaamba kuti “imuzimo ooyo wakaliswaangene munzila iigambya aleza weendelezya buzuba mbwazyalwa muntu.”

10. Ino nkaambo nzi Banakristo mazuba aano ncobateelede kusekelela mazuba aakuzyalwa?

¹⁰ Ino muyeeya buti, sena Jehova ulaakkomanina mapobwe aaswaangene abukombi bwakubeja? (Isaya 65:11, 12) Peepe, taakkomanini pe. Nkakaambo kaako tatusekeleli mazuba aakuzyalwa naa mazuba aali woonse aakulyookezya aaswaangene abukombi bwakubeja.

11. Ino nkaambo nzi bantu bamwi ncobasekelela mapobwe aamazuba aakulyookezya? Ino ncinzi ncomweelede kubikkila maano kapati?

¹¹ Bantu bamwi balizyi kuti Kkilisimasi alimwi amapobwe amwi aakusekelela mazuba aakulyookezya akazwa kubantu batakombi Leza, pele balazumanana kwaasekelela. Balimvwa kuti mazuba aaya aakulyookezya abapa coolwe cakuba abanamukwasyi. Sena andinywe mbomulimvwa oobo? Tacili cibi pe kuba aciindi cakuba antoomwe abanamukwasyi. Jehova nguwakalenga mukwasyi, alimwi uyanda kuti katumvwana abanamukwasyi. (Baefeso 3:14, 15) Nokuba boobo, ncotweelede kubikkila maano kapati nkuzumanana kuba acilongwe cibotu a Jehova muciindi cakuyanda kukkomanisya bacibbululu kwiinda mukusekelela mazuba aakulyookezya aabukombi bwakubeja. Nkakaambo kaako mwaapostolo Paulo wakaamba kuti: “Lyoonse kamusaanguna kusinizya naa ncomucita cilatambulika ku Mwami.”—Baefeso 5:10.

12. Ncinzi cikonzya kupa kuti buzuba bumwi bwakulyookezya butamukkomanisyi Jehova?

¹² Bantu banji balimvwa kuti nkwaazyila mapobwe aakusekelela mazuba aakulyookezya taali makani mapati pe;  pele oobo tabusyi mbwalimvwa Jehova. Taakkomanini pe mapobwe aakusekelela mazuba aakulyookezya aazwa mubukombi bwakubeja naa aasumpula bantu noziba zitondezyo zyacisi. Mucikozyanyo, bana Egepita bakajisi mapobwe manji aakulemeka baleza babo bakubeja. Ciindi bana Israyeli nobakafwutuka kuzwa mu Egepita, bakaiya pobwe limwi lyabana Egepita ibatakali kukomba Leza akuliita kuti “pobwe lya Jehova.” Pele Jehova wakabasubula akaambo kakucita boobo. (Kulonga 32:2-10) Mbubonya mbwaakaamba musinsimi Isaya, tatweelede ‘kuguma cintu cili coonse cisofweede!’—Amubale Isaya 52:11.

13. Mibuzyo nzi njomukonzya kuba anjiyo ciindi nomwasala kuleka kusekelela mapobwe aamazuba aakulyookezya?

¹³ Ciindi nomwasala kuleka kusekelela mazuba aakulyookezya, ambweni mulakonzya kuba amibuzyo minji. Mucikozyanyo mulakonzya kulibuzya kuti: Ncinzi ncondikonzya kucita ikuti naa mbondibeleka limwi bandibuzya kujatikizya kaambo nconditasekeleli Kkilisimasi ambabo? Ncinzi ncondeelede kucita ikuti naa umwi wandipa cipego lya Kkilisimasi? Ncinzi ncondeelede kucita ikuti ngotukwetene limwi uyanda kuti ndisekelele buzuba bumwi bwakulyookezya? Mbuti mbondikonzya kubagwasya bana bangu kutegwa batalimvwi kwiindwa akaambo kakutasekelela buzuba bwakulyookezya naa bwakuzyalwa?

14, 15. Ncinzi ncomukonzya kucita ikuti muntu umwi wamupa mooni uujatikizya pobwe limwi naa kumupa cipego?

¹⁴ Cilayandika kapati kubelesya bongo nomusala zyakwaamba akucita mubukkale bumwi abumwi. Mucikozyanyo, ikuti bantu bamupa mooni uujatikizya pobwe limwi, tamweelede kunyema, mweelede kubavwiila buyo kabotu. Inga mwaamba buyo kuti, “Ndalumba.” Pele mubukkale bumwi mocalibonya kuti muntu umwi uyanda kuzyiba zinji, inga mwasala kumupanduluda ncomutasekeleli pobwe eelyo. Nokuba boobo, ciindi  coonse mweelede kubelesya majwi mabotu, bupampu, alimwi akutondezya bulemu. Bbaibbele lyaamba kuti: “Majwi aanu kaakondelezya lyoonse, aalweezyedwe kabotu amunyo kutegwa muzyibe mbomweelede kumwiingula muntu umwi aumwi.” (Bakolose 4:6) Ambweni mulakonzya kupandulula kuti nywebo mulakkomana kuba aciindi cakulikkomanisya abamwi alimwi akupana zipego, pele mwasala ikutacita boobo aaciindi cabuzuba bwapobwe eelyo.

¹⁵ Ino mweelede kucita nzi ikuti umwi wamupa cipego? Bbaibbele talitupede mulongo wamilawo njotweelede kutobela, pele litwaambila kuti tweelede kuba amanjezyeezya mabotu. (1 Timoteyo 1:18, 19) Ambweni muntu ooyo uumupa cipego tazyi kuti tamusekeleli pobwe lyabuzuba oobo. Naa ambweni umwi ulakonzya kwaamba kuti, “Ndilizyi kuti tamusekeleli pobwe lyabuzuba oobu, nokuba boobo ndalikuyanda buyo kumupa cipego eeci andinywe.” Kufwumbwa mbocikonzya kuba, mulakonzya kusala kucitambula cipego eeco naa pe. Pele kufwumbwa ncomukonzya kusala, amubone masimpe kuti mwazumanana kuba amanjezyeezya mabotu. Tatuyandi kucita cintu cili coonse icikonzya kunyonganya cilongwe cesu a Jehova.

16. Ncinzi ncomweelede kucita ikuti naa banamukwasyi bayanda kusekelela pobwe lyabuzuba bwakulyookezya?

¹⁶ Ncinzi ncomweelede kucita ikuti naa banamukwasyi bayanda kusekelela pobwe limwi lyabuzuba bwakulyookezya? Tamweelede kubalwana pe. Amuyeeye kuti balaangulukide kusala ncobayanda kucita. Amwaambaule ambabo amajwi mabotu alimwi akulemeka nzyobasala mbubonya mbomuyanda kuti bamucitile andinywe. (Amubale Matayo 7:12.) Pele ikuti banamukwasyi bayanda kuti musekelele antoomwe ambabo, ncinzi ncomweelede kucita? Kamutanasala cakucita, amupaile kuli Jehova kutegwa amugwasye kusala kabotu. Amwaakkalile ansi makani aaya akwaavwuntauzya. Mutalubi kuti lyoonse muyanda kukkomanisya Jehova.

17. Ncinzi ncomukonzya kucita kutegwa mugwasye bana banu kutalimvwa kuti baindwa zibotu ciindi nobabona beenzinyina ibasekelela mazuba aakulyookezya?

 ¹⁷ Ncinzi ncomukonzya kucita kutegwa mugwasye bana banu nobabona beenzinyina ibasekelela mapobwe aamazuba aakulyookezya? Ciindi aciindi mulakonzya kubabambila naa kubacitila cintu cimwi citabonwi-bonwi. Kuyungizya waawo, mulakonzya kubapa zipego nzyobatayeeyeli. Cipego cimwi cibotu kapati ncomukonzya kubapa nkuba aciindi cakuba ambabo alimwi akubayanda.

18. Nkaambo nzi ncotweelede kujanika kumiswaangano ya Bunakristo?

¹⁸ Kutegwa tumukkomanisye Jehova, tweelede kuzwa mucikombelo cakubeja akuleka zilengwa alimwi amapobwe aancico aamazuba aakulyookezya. Nokuba boobo, tweelede kucita zintu izicitwa mubukombi bwakasimpe. Ino inga twacita buti oobo? Nzila imwi nkwiinda mukujanika kumiswaangano ya Bunakristo ciindi coonse. (Amubale Bahebrayo 10:24, 25.) Miswaangano eeyi ncibeela ciyandika kapati cabukombi bwakasimpe. (Intembauzyo 22:22; 122:1) Tulakonzya kukulwaizyanya umwi amweenzinyina ciindi notuswaangana antoomwe.—Baroma 1:12.

19. Nkaambo nzi ncociyandika kapati kwaambila bamwi kasimpe kamu Bbaibbele nkomwaiya?

¹⁹ Nzila aimbi yakusala bukombi bwakasimpe nkwaambila bamwi nzyomwaiya mu Bbaibbele. Bantu banji balipengede mumoyo akaambo kazintu zibi zicitika munyika. (Ezekieli 9:4) Ambweni kuli mbomuzyi ibalimvwa boobo. Amubaambile bulangizi bubotu kapati mbomujisi kujatikizya buumi bwakumbele. Ciindi nomujanika kumiswaangano ya Bunakristo akwaambila bamwi kujatikizya kasimpe kamu Bbaibbele, muyoojana kuti tamunoolimvwi kusweekelwa akaambo kakuzwa mucikombelo cakubeja alimwi akuleka zilengwa zyancico. Amuzyibe kuti munookkomene alimwi Jehova uyoomuleleka kapati akaambo kakusoleka kumukomba munzila iiluzi.—Malaki 3:10.