Kukomba caamba “kucita cintu icitondezya bulemu alimwi aluyando kuli leza.” Mu Bbaibbele, imabala aakabelesyegwa mumwaambo wakusaanguna ikwaamba “kukomba” alakonzya kupa muzeezo wamuntu uutondezya bulemu kapati, naa kulibombya kuzilenge. (Mt. 28:9) Mabala aayo alimwi alakonzya kwaamba kucita cintu citondezya bukombi kuli Leza naa kaleza. (Joh. 4:23, 24) Aboobo, twaambo ituli mucibalo ntotupa kuzyiba cini ncaamba mabala.

Alikke Jehova, Mulengi alimwi Mweendelezi wa Bubumbo Boonse, nguweelela kukombwa. (Ciy. 4:10, 11) Tulamukomba Jehova kwiinda mukutondezya bulemu kubweendelezi bwakwe alimwi akwiinda mukulemeka zina lyakwe. (Int. 86:9; Mt. 6:9, 10) Imitwe eeyi yobilo, bweendelezi bwa Jehova alimwi azina lyakwe, ilakankaizyigwa kapati mubbuku lya Ezekieli. Imabala akuti “Mwami Singuzuzyoonse Jehova” alibelesyedwe ziindi zili 217 mubbuku lya Ezekieli lelikke, alimwi majwi aakuti “bayoozyiba kuti ndime Jehova” amabala aakozyenye ayaaya, alajanika ziindi zili 55.—Ezk. 2:4; 6:7.

Nokuba boobo, kukomba kwesu takujatikizyi buyo mbotulimvwa pe; muciindi caboobo, kukomba kwini-kwini kulajatikizya amilimo. (Jak. 2:26) Ciindi notwaaba buumi bwesu kuli Jehova, tulakonka kuti mumbazu zyoonse zyabuumi bwesu, tunoomumvwida mbwali Mweendelezi wesu alimwi akutondezya bulemu kapati kuzina lyakwe. Amuyeeye kuti naakali kupa bwiinguzi musunko lyatatu, Jesu wakaswaanganya kukomba ‘amulimo uusetekene.’ (Mt. 4:10) Mbotuli bakombi ba Jehova, tulayandisisya kumubelekela. * (Dt. 10:12) Tulamubelekela Leza wesu mulimo uusetekene ciindi notutola lubazu mumilimo iiswaangene kapati akukomba kwesu alimwi ayeeyo iijatikizya kulyaaba. Ino milimo nzi eeyi?

Mulimo uusetekene ulaboola munzila zinji, nzila eezyo zyoonse zilamukkomanisya Jehova. Tulabeleka mulimo uusetekene ciindi notukambaukila bamwi, notutola lubazu mumiswaangano ku Ŋanda ya Bwami alimwi anotulanganya akuyaka masena eesu aakuswaanganina. Kuyungizya waawo, tulabeleka mulimo uusetekene ciindi notutola lubazu mukukomba kwamukwasyi, mumulimo wakugwasya basyomima ibayandika lugwasyo, notulisungula kubeleka amiswaangano yacooko, naa notubelekela ku Beteli. (Heb. 13:16; Jak. 1:27) Ciindi bukombi busalala notububikkila maano mumizeezo alimwi amumyoyo yesu, tuyoobeleka “mulimo uusetekene isyikati amasiku.” Tulakkomana kukomba Leza wesu, Jehova!—Ciy. 7:15.