Makani 72: Leza Wamugwasya Mwami Hezekiya
HENA ulicizyi muntu ooyu cimupa kupaila kuli Jehova? Ino nkaambo nzi ncaabikkila magwalo kumpela lyacipaililo ca Jehova? Muntu ooyu ngu Hezekiya. Mwami wamisyobo yakumusanza yobilo yabana Isilayeli. Alimwi uli mumapenzi manji. Ino nkaambo nzi?
Nkaambo kakuti basikalumamba babana Asiliya bakajaya kale misyobo iili 10 yakunyika. Jehova wakacilekela eeci kuti cicitike nkaambo bantu aabo bakali babi kapati. Aboobo lino basikalumamba bana Asiliya baboola kuzyi kulwana bwami bwamisyobo yobilo.
Mwami waku Asiliya lino aawa naamana kutumizya magwalo ku Mwami Hezekiya. Aaya ngamagwalo Hezekiya ngaabikka kubusyu bwa Leza. Magwalo aaya ngakusampaula Jehova, alimwi azyibya Hezekiya kuti aleke kulwana. Nkakaambo kaako Hezekiya ncapaila kuti: ‘O Jehova, kotuvwuna kumwami wabana Asiliya. Eelyo misyobo yoonse iya kuzyiba kuti iwe olikke ndonduwe Leza.’ Hena Jehova ulakuswiilila kupaila kwa Hezekiya?
Hezekiya mwami mubotu moyo. Tali mbuli bami babi babwami bwamisyobo iili 10 yabana Isilayeli naa mbuli swaabo Mwami Ahazi. Hezekiya wali kwiiccilila kabotu yoonse milawo ya Jehova. Eelyo Hezekiya naamana kupaila, musinsimi Isaya wamutumina mulumbe uuzwa kuli Jehova wakuti: ‘Mwami wa Asiliya tako kuboola ku Jelusalemu. Taku sikalumamba naba omwe uuya kusika aafwiifwi amunzi ooyu. Tabakawaali suno niliba lyomwe mumunzi.’
Langa acifwanikiso cili apeeji eeli. Hena ulibazyi basikalumamba aaba boonse bafwide? Mbana Asiliya. Jehova watuma mungelo, eelyo mubuzuba bomwe masiku wajaya basikalumamba babana Asiliya bali 185,000. Aboobo mwami muna Asiliya wacileka kulwana alimwi wajokela kumunzi.
Bwami bwamisyobo yobilo bwafwutulwa, eelyo alimwi bantu balikwaya kwaciindi cisyoonto. Pele afwe Hezekiya, mwana wakwe Manase waba ngowaba mwami. Manase amwana wakwe Amoni ibakaccilila kulela, boonse bobilo bakali bami babi kapati. Alimwi lino nyika yavwula bubi amanyongwe. Mwami Amoni naakajaigwa amubelesi wakwe, mwana wakwe Josiya wakabikkwa kuba mwami wabwami bwamisyobo yobilo.
2 Bami 18:1-36; 19:1-37; 21:1-25.
Mibuzyo
- Ngwani muntu uuli acifwanikiso, alimwi nkaambo nzi ncali mumapenzi manji?
- Magwalo nzi Hezekiya ngaabikka kubusyu bwa Leza, alimwi ncinzi Hezekiya ncapailila?
- Ino Hezekiya mwami uuli buti, alimwi mulumbe nzi Jehova ngwaamutumina kwiinda mumusinsimi Isaya?
- Ncinzi mungelo wa Jehova ncaacita kubana Asiliya kweelana ambokutondezyedwe acifwanikiso?
- Nikuba kuti bwami bwamisyobo yobilo bwalikwaya kwakaindi kasyoonto, ncinzi cacitika mbwaafwida Hezekiya?
Mibuzyo aimwi
- Bala 2 Bami 18:1-36.
Mbuti Labisake mwaambilizi wabana Asiliya mbwaakali kuyanda kutola ansi lusyomo lwabana Isilayeli? (2 Bam. 18:19, 21; Kul. 5:2; Int. 64:3)
Mbuti notuli abasikukazya mbotubikkila maano swebo Tobakamboni ba Jehova kucikozyanyo ca Hezekiya? (2 Bam. 18:36; Int. 39:1; Tus. 26:4; 2 Timo. 2:24)
- Bala 2 Bami 19:1-37.
Mbuti mazuba aano bantu ba Jehova mbobamwiiya Hezekiya muziindi zyamapenzi? (2 Bam. 19:1, 2; Tus. 3:5, 6; Heb. 10:24, 25; Jak. 5:14, 15)
Nziindi nzi zyotatwe Mwami Senakelibu nzyaakazundwa, alimwi ngwani ngwaiminina mubusinsimi? (2 Bam. 19:32, 35, 37; Ciy. 20:2, 3)
- Bala 2 Bami 21:1-6, 16.
Nkaambo nzi ncokukonzya kwaambwa kuti Manase ngomwami wakali kwiinda kubija kubami boonse bakalela mu Jelusalemu? (2 Mak. 33:4-6, 9)
