Makani 52: Gidiyoni Abasankwa Bakwe Bali 300
HENA wacibona cicitika aawa? Boonse aaba mbaasinkondo balwana bana Isilayeli. Bantu aaba basintemi, banywa meenda. Musankwa wiimvwi munsi lyabo ngu Gidiyoni Mubetesi. Ulalangilila mbobanywa meenda.
Kolangisya mbobaindenyi kunywa meenda. Bamwi basintama buya kunywa meenda. Pele umwi uliintamukide nanywa meenda ikutegwa kabona zicitika. Eeci cilayandika, nkaambo Jehova wakaambila Gidiyoni kusala basankwa aabo balikke balanga ooku akooku nobanywa meenda. Aabo bacaala, Leza wati beelede kujokela kumunzi. Atubone ncocili boobo.
Bana Isilayeli alimwi banjila mumapenzi manji. Cili boobo akaambo kakuti tiibamuswiilila Jehova. Bana Midyani babainda nguzu, aboobo tababeendelezi kabotu. Eelyo bana Isilayeli bamulilila Jehova kutegwa abagwasye, aboobo wakumvwa kulila kwabo.
Jehova waambila Gidiyoni kubweza basikalumamba, aboobo Gidiyoni wabungika basankwa bali 32,000. Pele kuli basikalumamba ibasankwa ibali 135,000 balwana bana Isilayeli. Nokuba boobo, Jehova wati kuli Gidiyoni: ‘Ulijisi bantu banji.’ Nkaambo nzi Jehova ncaambila boobo?
Nkaambo kakuti, ikuti bana Isilayeli bazunda munkondo, inga bayeeya kuti bazunda kwiinda munguzu zyabo. Inga bayeeya kuti tiibakali kuyandika lugwasyo lwa Jehova kutegwa bazunde. Aboobo Jehova kuli Gidiyoni wati: ‘Ambila bantu boonse bakandu kuti bajokele kumunzi.’ Gidiyoni mbwaati buyo kamuya, basikalumamba bakwe bali 22,000 bajokela kumunzi. Kwacaala buyo bali 10,000 kulwana basinkondonyina bali 135,000.
Pele komvwa! Jehova wati: ‘Ucijisi bantu banji.’ Aboobo waambila Gidiyoni kuti aambile bantu kunywa meenda mukalonga aaka akubajola kumunzi aabo balaasintame kunywa meenda. Jehova wasyomezya wati: ‘Ndiya kukupa kuti uzunde abantu bali 300 aabo bali kulanga zicitika nibali kunywa meenda.’
Casika ciindi cakulwana. Gidiyoni wabikka bantu bakwe bali 300 mutubunga totatwe. Muntu amuntu wamupa mweembo ankapu iijisi lambe mukati. Ciindi kaciyanda kusika akati kamasiku, balibunga-bunga kuzinguluka munzi wabasinkondonyina. Kumane boonse antoomwe basiba myeembo akupwaya nkapu zyabo, boongolola bati: ‘Mupeni wa Jehova awa Gidiyoni!’ Bazyi kubuke basinkondonyina, nkujana banyongana alimwi bayoowa. Boonse baccija, eelyo bana Isilayeli bazunda munkondo.
Babetesi Caandaano 6 kusikila ku 8.
Mibuzyo
- Mbuti, alimwi nkaambo nzi bana Isilayeli ncobali mumapenzi manji?
- Nkaambo nzi Jehova ncaambila Gidiyoni kuti ulijisi bantu banji basikalumamba?
- Bali bongaye bantu bacaala Gidiyoni naambila bantu bakandu kuti bajokele kumunzi?
- Ikweelana acifwanikiso, pandulula Jehova mbwaakacesya mweelwe wabasikalumamba ba Gidiyoni kusikila kubantu bali buyo 300.
- Mbuti Gidiyoni mbwaali bambila abasikalumamba bakwe bali 300, alimwi mbuti bana Isilayeli mbobazunda munkondo?
Mibuzyo aimwi
- Bala Babetesi 6:36-40.
Mbuti Gidiyoni mbwaakaba masimpe kuti ooku nkuyanda kwa Jehova?
Mbuti sunu mbotuzyiba kuyanda kwa Jehova mbokubede? (Tus. 2:3-6; Mt. 7:7-11; 2 Timo. 3:16, 17)
- Bala Babetesi 7:1-25.
Nciiyo nzi ncotukonzya kwiiya kubantu bali 300 bakapakamenyi alimwi abaabo batakapakamenyi? (Bab. 7:3, 6; Balo. 13:11, 12; Ef. 5:15-17)
Mbweena mbuli bantu bali 300 mbobakaiya kwiinda mukulanga Gidiyoni, mbuti mbotwiiya kwiinda mukulanga Gidiyoni Mupati, Jesu Kristo? (Bab. 7:17; Mt. 11:29, 30; 28:19, 20; 1 Pita 2:21)
Mbuti Babetesi 7:21 mbwatugwasya kulisungula kubeleka kufwumbwa nkotwatumwa mumbunga ya Jehova? (1 Kor. 4:2; 12:14-18; Jak. 4:10)
- Bala Babetesi 8:1-3.
Caboola kumakani aakubamba twaambo amukwesu naa amucizyi, ncinzi ncotukonzya kwiiya mbuli Gidiyoni mbwaakabamba twaambo abana Efulaimu? (Tus. 15:1; Mt. 5:23, 24; Lk. 9:48)
