Makani 22: Josefa Wabikkwa Muntolongo
JOSEFA wakalijisi buyo myaka iili 17 nibakamutola ku Ijipiti. Okuya wauzyigwa kumuntu uutegwa Potifa. Potifa ubeleka kumwami waku Ijipiti uutegwa Falawo.
Josefa ulabeleka canguzu kuli Potifa simalelo wakwe. Aboobo Josefa akomene buyo, Potifa wamupa mulimo wakulanganya zintu zyoonse zyamu ŋanda yakwe. Ikuti kakuli boobo, ino nkaambo nzi Josefa ncali muntolongo? Nkaambo kamukaintu wa Potifa.
Josefa wakomena akuba musankwa mubotu weebeka. Aboobo mukaintu wa Potifa uyanda kuti boone limwi. Pesi Josefa ulizyi kuti eeci tacili kabotu, aboobo wakaka. Mukaintu wa Potifa wakalala kapati. Munyokwabo aboole kuŋanda, wamubejelezya Josefa wati: ‘Ooyu Josefa mubi wali kuyanda kundijata!’ Potifa wasyoma caamba mukaintu wakwe, eelyo wamukalalila Josefa kapati. Amane wamubikka muntolongo.
Sikulanga ntolongo wabona kuti Josefa muntu uuli kabotu. Aboobo wamubikka kuba mupati wabasintolongonyina boonse. Kumane Falawo wamukalalila sikumupa zyakunywa alimwi asikumujikila, boonse bobilo wababikka muntolongo. Buzuba bumwi aumwi wakalota ciloto ciyoosya, pele taku wakazyi aumwi ncocakali kupandulula. Nobwakaca Josefa wakati: ‘Amundaambile ziloto zyanu.’ Nibakamwaambila, Josefa kwiinda mulugwasyo lwa Leza wakazyipandulula ziloto zyabo.
Kuli sikupa zyakunywa, Josefa wati: ‘Mumazuba otatwe uya kugusyigwa muntolongo akuzumanana kuba sikumupa zyakunywa Falawo.’ Alimwi Josefa wayungizya kuti: ‘Waakuzwa ukandaambilide kuli Falawo kutegwa andime ndikazwe muntolongo.’ Pele kuli sikujika, Josefa wati: ‘Mumazuba otatwe buyo Falawo uya kukunyongola mutwe.’
Kwiinde mazuba otatwe, cakacitika mbweena mbwaakaamba Josefa. Falawo waunyongola mutwe wasikujika. Sikumupa zyakunywa wakazwa muntolongo akutalika kubelekela mwami alimwi. Pele sikumupa zyakunywa wakaciluba ncibakamvwana a Josefa. Taku naakamwaambila Falawo, aboobo Josefa ucikkede muntolongo.
Matalikilo 39:1-23; 40:1-23.
Mibuzyo
- Wakajisi myaka yongaye Josefa naakatolwa ku Ijipiti, alimwi ncinzi cakacitika naakasika okuya?
- Mbuti Josefa mbwaakanjila muntolongo?
- Mulimo nzi Josefa ngwaakapegwa muntolongo?
- Ncinzi Josefa ncaakacita kali muntolongo kubabelesi ba Falawo, sikumupa zyakunywa asikumujikila?
- Ncinzi cakacitika kuli sikumupa zyakunywa naakaangululwa?
Mibuzyo aimwi
- Bala Matalikilo 39:1-23.
Ncinzi cakamupa kuti Josefa accije kumukaintu wa Potifa mbwaanga tiikwakali mulawo uulembedwe kuzwa kuli Leza uukasya kubbukilwa mumazuba ngaakali kupona? (Matl. 2:24; 20:3; 39:9)
- Bala Matalikilo 40:1-23.
Pandulula mubufwaafwi ciloto caasikumupa zyakunywa, alimwi abupanduluzi Jehova mbwaakapa Josefa? (Matl. 40:9-13)
Nciloto nzi ncaakalota sikujika, alimwi cakali kupandulula nzi? (Matl. 40:16-19)
Mbuti muzike musyomesi uucenjede sunu mbwamwiiya Josefa? (Matl. 40:8; Int. 36:9; Joh. 17:17; Inc. 17:2, 3)
Mbuti Matalikilo 40:20 mbwagwasya Banakristo mbobeelede kuzyibona zisobano zyakusekelela mazuba aakuzyalwa? (Muk. 7:1; Maako 6:21-28)
Andiza Inga Mwaakkomanina Ayaaya
TUKKAADI TWAAMBA ZYABANTU BAMU BBAIBBELE
Kakkaadi ka Potifara Kamu Bbaibbele
Amukkope kakkaadi kamuntu wamu Bbaibbele aaka, alimwi akwiiya zinji kujatikizya Potifara, simalelo wa Josefa ku Egepita.
