Makani 4: Cakapa Kuti Batandwe Mumunzi Wabo
LANGA lino cicitika. Adamu a Eva batandwa mumuunda mubotu wa Edeni. Hena ulikazyi kaambo ncobatandilwa?
Nkaambo kakuti bakacita cintu cimwi cibi kapati. Aboobo Jehova ubasubula buya. Hena ulicizyi cibi Adamu a Eva ncobakacita?
Bakacita cintu cimwi Leza ncaakabaambila kuti bataciti. Leza wakabaambila kuti balakonzya kulya micelo yakali kujanwa kuzisamu zya mumuunda. Pele kucisamu comwe Leza wakati tabeelede kulya, ikuti balya inga bafwa. Taku uumbi wakeelede kuciguma cisamu eeco. Alimwi tulizyi kuti kubweza cintu camuntu ncibi, hena tabusyi? Aboobo, ino ncinzi cakacitika?
Buzuba bumwi Eva naakali alikke mumuunda, nzoka yakaambaula anguwe. Koyeeya buyo eco! Yakaambila Eva kulya mucelo wacisamu eeco Leza ncaakabaambila kuti batalyi. Jehova naakapanga nzoka tanaakazyipanga kuti kazyaambaula. Aboobo eeci cipandulula kuti kwakali muntu uumwi wakali kupa kuti nzoka kayaambaula. Ino wakali ni?
Tanaakali Adamu. Aboobo kweelede kuti wakali umwi wabantu Jehova mbaakapanga kaindi katanalenga nyika. Aabo bantu mbangelo, alimwi tatukonzyi kubabona. Ooyu mungelo omwe wakatalika kulisumpula kapati. Wakatalika kuyeeya kuti weelede kuba muleli mbuli Leza. Alimwi wakali kuyanda kuti bantu kabamvwida nguwe kuleka kumvwida Jehova. Ngomungelo wakapa kuti nzoka yaambaule.
Ooyu mungelo wakakonzya kumucenga Eva. Naakamwaambila kuti ulakonzya kuba mbuli Leza ikuti naa walya mucelo, Eva wakasyoma. Aboobo wakalya, awalo Adamu wakalya. Adamu a Eva bakamuzangila Leza, nkakaambo kaako ncobakatandilwa mumuunda mubotu.
Pele buzuba bumwi Leza uya kuyanda kuti nyika yoonse yeebeke mbuli bwakali muunda wa Edeni. Kumpela tulaiya mbonga watola lubazu mumulimo wakubotezya nyika. Pele lino atubone cakacitikila Adamu a Eva.
Matalikilo 2:16, 17; 3:1-13, 24; Ciyubunuzyo 12:9.
Mibuzyo
- Ncinzi acifwanikiso cicitika kuli Adamu a Eva?
- Nkaambo nzi Jehova ncaakabasubula?
- Ncinzi nzoka nciyakamwaambila Eva?
- Ngwani wakapa kuti nzoka yaambaule kuli Eva?
- Nkaambo nzi Adamu a Eva ncibakazwida mumunzi wa Paladaiso?
Mibuzyo aimwi
- Bala Matalikilo 2:16, 17 a 3:1-13, 24.
Mbuti mubuzyo nzoka ngoyakamubuzya Eva ncowatakaamba bwini Jehova mbwabede? (Matl. 3:1-5; 1 Joh. 5:3)
Mbuti Eva mbwali ncenjezyo kuli ndiswe? (Flp. 4:8; Jak. 1:14, 15; 1 Joh. 2:16)
Muunzila nzi Adamu a Eva mbobakatondezya kuti bakakaka kuzumina kuti bakalubizya? (Matl. 3:12, 13)
Mbuti bakelibu bakabikkwa kujwe lyamuunda wa Edeni mbobakaiminina bweendelezi bwa Jehova bwakoonse-koonse? (Matl. 3:24)
- Bala Ciyubunuzyo 12:9.
Mbuti Saatani mbwaazwidilila mukuzwisya bantu kubweendelezi bwa Leza? (1 Joh. 5:19)
