Ino nkuli julu anyika nkozyakazwa? Ino mbuti zuba, mwezi, nyenyezi azintu zinji zili anyika mbozyakaboola? Ibbaibbele lilapa bwiinguzi bumvwika nolyaamba kuti zyakalengwa a Leza. Aboobo ibbuku lyesu lilatalika amakani aamu Bbaibbele aakulenga.

Izilenge zyakutaanguna zya Leza nzyotulaaiye, bakali bantu bamuuya bali mbuli nguwe. Bakali bangelo. Pele nyika yakalengelwa bantu bali mbuli ndiswe. Aboobo Leza wakalenga musankwa amukaintu ibaitwa kuti Adamu a Eva akubabikka mumuunda mubotu. Pele bakamuzangila Leza, aboobo bakacibula coolwe cakuti kabapona lyoonse.

Kuzwa Adamu naakalengwa kusikila lya Zambangulwe kuli myaka iili 1,656. Muciindi eeci, kwakali bantu banji babi bakali kupona. Kujulu kwakali bantu bamuuya batabonwi, nkokuti Saatani abangelo bakwe babi. Anyika kwakali Kaini abamwi bantu banji babi kubikkilizya abantu ibakajisi nguzu zinji kapati. Pele alimwi kwakali abamwi bantu bakali kabotu anyika mbuli Abela, Enoki a Nowa. Mu Cibeela CAKUTAANGUNA tulabala makani aamba bantu aaba boonse alimwi azyakacitika.