CIIYO 57
Mbuti Kuti Mwacita Cibi Cipati?
Nokuba kuti mulamuyanda kapati Jehova alimwi akusolekesya kapati kutantamuka kucita zintu zikonzya kumunyemya, zimwi ziindi mulakonzya kulubizya. Nokuba boobo, zibi zimwi nzipati kwiinda zimwi. (1 Bakorinto 6:9, 10) Kuti mwacita cibi cipati, amuyeeye kuti Jehova kunyina naleka kumuyanda; ulilibambilide kumulekelela alimwi akumugwasya.
1. Ncinzi ncotweelede kucita kutegwa Jehova atulekelele?
Aabo bamuyanda Jehova inga balimvwa kuusa kapati ciindi nobazyiba kuti bacita cibi cipati. Pele balaumbulizyigwa acisyomezyo Jehova ncaakasyomezya bantu bakwe cakuti: “Nokuba kuti zibi zyanu zilasalala pyu, zilatubisyigwa buu mbuli caanda.” (Isaya 1:18) Kuti tweempwa kuzwa ansi aamoyo, Jehova uyootulekelela cakumaninina. Ino tutondezya buti kuti tweempwa? Tulausa kapati akaambo kacibi ncotwakacita, tulaleka kucita cibi alimwi akulomba Jehova kuti atulekelele. Mpoonya tulabeleka canguzu kucinca mizeezo iitaluzi naa kutantamuka zintu izyakapa kuti tucite cibi, alimwi tulasoleka kupona kweelana azyeelelo zya Jehova ziluleme.—Amubale Isaya 55:6, 7.
2. Mbuti Jehova mbwabelesya baalu kutugwasya ciindi notwacita cibi?
Kuti twacita cibi cipati, Jehova utwaambila kuti ‘twiite baalu bambungano.’ (Amubale Jakobo 5:14, 15.) Baalumi aaba basalidwe balamuyanda Jehova alimwi ambelele zyakwe. Baleelela kutugwasya kubambulula cilongwe cesu a Jehova.—Bagalatiya 6:1.
Mbuti baalu mbobatugwasya ikuti twacita cibi cipati? Baalu bobilo naa botatwe bayootululamika, kubelesya Magwalo. Alimwi bayootupa malailile aagwasya akutukulwaizya kutaciinduluka alimwi cibi. Balakonzya kutulesya kutola lubazu mumilimo imwi ya Bunakristo kwaciindi cili mbocibede kusikila cilongwe cesu a Jehova cikabe kabotu alimwi. Kutegwa bakwabilile mbungano kukuyungwa azintu zibyaabi, baalu balamugusya mumbungano muntu uuli woonse uucita zibi zipati alimwi uuteempwi.
AMWIIYE ZINJI
Atubone mbotukonzya kutondezya kulumba kapati kujatikizya mbwatugwasya Jehova kuti twacita cibi cipati.
3. Kulyaambilila zibi kulatugwasya kubambulula cilongwe cesu a Jehova
Kufwumbwa cibi ncotwacita cilamucisa Jehova, aboobo tweelede kulyaambilila kulinguwe. Amubale Intembauzyo 32:1-5, akubandika mubuzyo ooyu:
-
Nkaambo nzi ncocili kabotu kulyaambilila zibi zyesu kuli Jehova muciindi cakusola kuzisisa?
Kunze buyo lyakulyaambilila zibi zyesu kuli Jehova, tulaanguluka ciindi notulomba lugwasyo kubaalu. Atweebelele VIDIYO, akubandika mubuzyo uutobela.
-
Muvidiyo, mbuti baalu mbobakabagwasya ba Canon kupilukila kuli Jehova?
Tweelede kwaanguluka alimwi akubaambila masimpe baalu; bakabikkwa kutegwa kabatugwasya. Amubale Jakobo 5:16, akubandika mubuzyo ooyu:
-
Mbuti mbocikonzya kubaubila baalu kutugwasya kuti twabaambila masimpe?
Amulyaambilile cibi canu, amubaambile masimpe baalu alimwi akuzumina lugwasyo lwa Jehova lwaluyando
4. Mbokugwasya kugusya muntu mumbungano
Kuti muntu iwakacita cibi cipati wakaka kutobela zyeelelo zya Jehova, ulaleka kuba cibeela cambungano. Aboobo ulagusyigwa mumbungano alimwi tatuyanzani anguwe nokuba kubandika anguwe. Amubale 1 Bakorinto 5:6, 11 alimwi a 2 Johane 9-11, akubandika mubuzyo ooyu:
-
Mbubwenya bumena mbobupa kuti fulaulu ufwufwumuke, mbuti kuyanzana asizibi uuteempwi mbokukonzya kwiijatikizya mbungano?
Banji ibakagusyidwe mumbungano kumbele bakajoka mumbungano akaambo kakuti lulayo, nokuba kuti lwakali kucisa, lwakabapa kuliyeeya. (Intembauzyo 141:5) Atweebelele VIDIYO, akubandika mubuzyo uutobela.
-
Muvidiyo eeyi, mbuti kugusyigwa mumbungano mbokwakabagwasya ba Sonja?
Ino mbuti bubambe bwakugusya bantu mumbungano . . .
-
mbokulemeka zina lya Jehova?
-
mbokutondezya kuti Jehova ulanyoneka alimwi ngusiluyando?
5. Jehova ulatulekelela ciindi notweempwa
Jesu wakabelesya cikozyanyo icitugwasya kumvwisya mbwalimvwa Jehova ciindi muntu naayempwa. Amubale Luka 15:1-7, akubandika mubuzyo ooyu:
-
Ino eeci citwaambila nzi kujatikizya Jehova?
Amubale Ezekieli 33:11, akubandika mubuzyo ooyu:
-
Ino kweempwa kubikkilizya ntaamu nzi iiyandika kapati?
Mbubwenya mbuli mweembezi, Jehova ulazibikkila maano kapati mbelele zyakwe
BAMWI BAAMBA KUTI: “Ndilayoowa kwaambila baalu cibi cangu, nkaambo inga ndagusyigwa mumbungano.”
-
Ncinzi ncomukonzya kumwaambila muntu uulimvwa boobo?
MUBUFWAAFWI
Kuti twacita cibi cipati pele tweempwa kuzwa ansi aamoyo alimwi akuba amakanze akuleka kucita cibi eeco, Jehova uyootulekelela.
Ncinzi Ncomwaiya?
-
Nkaambo nzi ncocili kabotu kulyaambilila zibi zyesu kuli Jehova?
-
Ncinzi ncotweelede kucita kutegwa Jehova atulekelele zibi zyesu?
-
Kuti twacita cibi cipati, nkaambo nzi ncotweelede kulomba lugwasyo kubaalu?
AMUZYIBE ZINJI
Amubone mwaalumi umwi mbwaakalubona luse lwa Jehova ilwaambidwe kulugwalo lwa Isaya 1:18.
Mbuti bubambe bwakugusya muntu mumbungano mbobubagwasya boonse ibajatikizyidwe?
“Ikaambo Kugwisyigwa Mumbungano Ncobuli Bubambe Bwaluyando” (Ngazi Yamulindizi yamu April 15, 2015)
Amwiiye mbomukonzya kupandulwida muntu uutali Kamboni bubambe bwakugusya muntu mumbungano.
“Sena Bakamboni ba Jehova Balabasula Bantu Mbobakali Kukombalimwi Kaindi?” (Cibalo caaintaneti)
Mucakuluula cakuti “Ndakeelede Kupiluka Kuli Jehova,” amubone mwaalumi iwakazwide mukasimpe mbwaakalimvwa kuti Jehova wakamukwela alimwi mukasimpe.
“Ibbaibbele Lilakonzya Kubacinca Bantu” (Ngazi Yamulindizi yamu April 1, 2012)
Andiza Inga Mwaakkomanina Ayaaya
MIBUZYO IIVWULA KUBUZYIGWA
Ino Ndwiiyo Nzi Lwamu Bbaibbele Ndobapa Bakamboni ba Jehova?
Mulakonzya kubelesya Bbaibbele lili lyoonse nomwiiya mupulogilamu iitabbadelelwi ya Bakamboni ba Jehova. Amwaanguluke kutamba bamukwasyi wanu boonse naa balongwe.
