SENA kuli muntu uukonzya kuzumanana kusyomeka kuli Leza ikuti wasunkwa cakuzwa munzila, alimwi akuti kumvwida kakutaleteli mpindu iili yoonse? Mubuzyo ooyu wakaingulwa kweelana azintu zyakamucitikila Jobu.

Jobu wakali mubbululu wa Abrahamu, alimwi ciindi bana Israyeli nobakali kukkala mu Egepita, walo wakali kukkala mucisi ciitwa kuti Arabia mazuba aano. Mpoonya Leza abangelo bakajisi muswaangano kujulu, awalo Saatani wakaliko. Amuswaangano ooyu Jehova Leza wakaamba mbwaakali kumusyoma Jobu alimwi akuti kunyina muntu iwakali kusyomeka mbuli nguwe. Pele Saatani wakaamba kuti Jobu wakali kubelekela Leza akaambo kakuti wakali kumukwabilila. Alimwi akuti naa Leza waleka kumukwabilila, nkokuti Jobu wakali kukonzya kucileka kusyomeka kulinguwe.

Leza wakamuzumizya Saatani ikunyonyoona lubono lwa Jobu, kumujaila bana, alimwi akumupa kuciswa. Pele Jobu kunyina naakazyi kuti Saatani nguwakamuletela mapenzi woonse aaya. Nokuba boobo wakazumanana kusyomeka kuli Leza.

Mpoonya kwakamusikila balongwe bakwe botatwe bakubeja, akumwaambila kuti Leza nguwakali kumusubula akaambo kazibi zyakwe. Alimwi akwaamba kuti Leza tabayandi babelesi bakwe akuti tabasyomi. Pele Jobu wakaakazya makani aaya ngobakaamba aataluzi. Alimwi wakaamba kuti wakali kuyoozumanana kusyomeka mane kulufwu.

Pele Jobu wakalubizya kwiinda mukwaamba kuti wakaliluleme alimwi kunyina cibi cili coonse ncaakacitide. Aboobo Elihu walo iwakali kuswiilila mubandi woonse iwakali akati ka Jobu abalongwe bakwe bakubeja, wakamululamika Jobu. Akaambo kakuti wakabikkila maanu kumpuwo yakwe mwini muciindi cakusumpula bweendelezi bwa Jehova alimwi azina lyakwe. Elihu wakabakalalila abalongwe ba Jobu bakubeja.

Mpoonya Jehova awalo wakabandika a Jobu kutegwa alulamike kuyeeya kwakwe. Wakabelesya zilenge ikumugwasya kubona bantu ibalya maila mbobali basyoonto kapati beezyanisyigwa a Leza. Aboobo Jobu wakazumina kululamikwa a Leza. Alimwi mbwaanga Jehova “ulaalubomba kapati aluse,” wakamuponya Jobu, akumulongezya alubono lunji kapati kwiinda ndwaakajisi kumatalikilo alimwi akumupa bana bali 10. (Jakobo 5:​11) Kwiinda mukuzumanana kusyomeka kuli Jehova ciindi naakasunkwa cakuzwa munzila, Jobu wakatondezya kuti muntu uulya maila ulakonzya kuzumanana kusyomeka kuli Leza, nokuba kuti wajana masunko aali buti.

​—Kuzwa mubbuku lya Jobu