CIBALO 35

Ncinzi Ncondeelede Kucita Kutegwa Ndibe Mulongwe Wa Leza?

Jeremy wakazyiba mbociyandika kuba aacilongwe a Leza akaambo kamapenzi aakamucitikila mubuumi. Wakaamba kuti: “Nondakajisi myaka iili 12, bataata bakazwa aŋanda. Bumwi buzuba masiku, ndakapaila kuli Jehova kutegwa bataata bajoke aŋanda.”

Kakopene kapati mumizeezo, Jeremy wakatalika kubala Bbaibbele. Ciindi naakabala lugwalo lwa Intembauzyo 10:14, wakakulwaizyigwa kapati. Lugwalo oolu lwaamba boobu kujatikizya Jehova: “Muntu uutakwe coolwe ulanga kulinduwe; Yebo ndonduwe mugwasyi wamucaala.” Jeremy wakaamba kuti: “Ndakalimvwa mbuli kuti Jehova wakali kwaambila ndime buya alimwi akundizyibya kuti walo ngomugwasyi wangu; ngu Taata. Eelo kaka Jehova ngomuzyali wiinda kubota muntu uuli woonse ngwakonzya kuba aanguwe!”

KUFWUMBWA naa muli mubukkale bukozyenye abwa Jeremy naa pe, Bbaibbele litondezya kuti Jehova uyanda kuti nywebo mube mulongwe wakwe. Mane buya Bbaibbele lyaamba kuti: “Amuswene kuli Leza, eelyo awalo ulaswena kulindinywe.” (Jakobo 4:8) Amuyeeye buyo ncaamba majwi aaya: Nokuba kuti tamukonzyi kumubona alimwi muliindene kapati anguwe, Jehova Leza ulamutamba kuti mube balongwe bakwe!

Pele kutegwa mube aacilongwe a Leza muyandika kubeleka canguzu. Mucikozyanyo, ikuti kamujisi duba lyamuŋanda, mulizyi kuti talikonzyi kulikomenena lilikke. Kutegwa likomene, mweelede kunoolitilaila lyoonse alimwi akulibikka abusena aali kabotu. Ncimwi buyo, kuyandika kubeleka canguzu kutegwa mube aacilongwe a Leza. Ncinzi ncomweelede kucita kutegwa cilongwe eeci cikomene?

Ncociyandika Kapati Kwiiya Bbaibbele

Cilongwe cibikkilizya zintu zyobilo, kuswiilila alimwi akubandika. Mbocibede oobo akuba acilongwe a Leza. Kubala alimwi akwiiya Bbaibbele nenzila mbotuswiilila nzyatwaambila Leza.​—Intembauzyo 1:​2, 3.

Masimpe kuti, kwiiya ambweni inga kakutamukkomanisyi. Bakubusi banji inga basala buyo kweebelela TV, kuuma mageemu naa kuyanzana abalongwe babo. Pele kuti kamuyanda kuba acilongwe a Leza, kunyina nzila iimbi. Muyandika kumuswiilila kwiinda mukwiiya Jwi lyakwe.

Pele tamweelede kulibilika pe. Kwiiya Bbaibbele taceelede kuba cintu citakkomanisyi. Mulakonzya kwiiya kukukkomanina nokuba kuti inga kamuli bantu batakukkomanini. Cintu cakusaanguna ncomweelede kucita nkubikka ciindi cakwiiya Bbaibbele. Musimbi uutegwa Lais wakaamba kuti: “Ndakapanga mulongo. Buzuba abuzuba kuseeni, ndisaanguna kubala caandaano comwe camu Bbaibbele.” Maria, uujisi myaka iili 15, walo ujisi mulongo wiindene. Wakaamba kuti: “Abuzuba masiku ndilalibala Bbaibbele kanditanaunka kukoona.”

Kutegwa mubone mbomukonzya kutalika bubambe bwanu bwakwiiya, amubone kabbokesi kakuti, “ amubale Bbaibbele cakubikkila maano.” Mpoonya aansi, amulembe ciindi ncomuyanda kunooyiya Jwi lya Leza ambweni kwamaminiti aali 30 buyo.

․․․․․

Kulemba ciindi matalikilo buyo. Mwatalika kwiiya, mulakonzya kubona kuti talili lyoonse nocili cuuba-uba kubala Bbaibbele. Ambweni inga mwazuminizya ncaakaamba Jezreel uujisi myaka iili 11 naakati: “Zibeela zimwi zyamu Bbaibbele zilakatazya kuzimvwisya alimwi tazikkomanisyi.” Ikuti naa mbomulimvwa oobo, mutatyompwi pe. Lyoonse kwiiya Bbaibbele amukubone kuti nceciindi nomuswiilila kuli Jehova Leza, imulongwe wanu. Ikuti mwazumanana kubeleka canguzu, ndendilyo nomuyoobona kuti kwiiya Bbaibbele ncintu cikkomanisya alimwi cigwasya kapati.

Mupailo Ulayandika Kapati

Mupailo ninzila njotubandika a Leza. Aboobo, eeci ncipego cilibedelede! Mulakonzya kubandika a Jehova Leza kufwumbwa ciindi, syikati naa masiku. Lyoonse ulilibambilide kumuswiilila. Alimwi buya, ulayanda kumvwa nzyomwaamba. Nkakaambo kaako Bbaibbele limukulwaizya kuti: “Muzintu zyoonse, kwiinda mumupailo akukombelezya antoomwe akulumba, amumuzyibye Leza nzyomulomba.”​—Bafilipi 4:6.

Kweelana alugwalo mbolwatondezya, kuli zintu zinji nzyomukonzya kumwaambila Jehova. Eeci cilakonzya kubikkilizya mapenzi alimwi azintu nzyomulibilika. Alimwi zilakonzya kubikkilizya azintu nzyomulumba. Alimwi buya, tee tulabalumba balongwe besu akaambo kazintu zibotu nzyobatucitila? Aboobo, tweelede kucita mbubwenya oobo akuli Jehova walo iwakatucitila zintu zinji kwiinda mulongwe uuli woonse.​—Intembauzyo 106:1.

Ansi aawa, amulembe zintu zimwi nzyomumulumba Jehova.

․․․․․

Tacidoonekwi buya kuti, kuli zintu zisiyene-siyene izimupa kulibilika zimwi ziindi. Lugwalo lwa Intembauzyo 55:22 lwaamba kuti: “Kowaala mukuli wako uuminya mumaanza aa Jehova, eelyo walo uyookulanganya. Kunyina nayoolekela muntu uululeme kuti azungaanizyigwe.”

Mumizila iili aansi, amulembe zintu izimupa kulibilika nywebo kumugama nzyomuyanda kubikkilizya mumupailo.

․․․․․

Zintu Izyakamucitikila

Kuli cintu acimbi ncomuteelede kuluba kujatikizya cilongwe canu a Leza. Sintembauzyo Davida wakalemba kuti: “Amulabile mubone kuti Jehova mubotu.” (Intembauzyo 34:8) Ciindi Davida naakalemba Intembauzyo 34, wakazwide akucitikilwa bukkale bukatazya. Aciindi eeci, wakali kutija Mwami Saulo iwakali kuyanda kumujaya, bukkale ibwakali kuyoosya kapati. Mpoonya wakaakuyuba akati kaba Filisiti balo ibakali basinkondonyina. Akaambo kakuyoowa kujaigwa, Davida wakalicengeezya kuba muntu uusondokede, aboobo wakacikonzya kutija.​—1 Samuele 21:10-​15.

Kufwutukila kumpelaalwala ooku, Davida tanaakakubona kuti kwakakonzyeka akaambo kabusongo bwakwe. Muciindi caboobo, Davida wakalumba Jehova kuti ngowakamugwasya. Kumatalikilo aa Intembauzyo 34 wakalemba kuti: “Ndakabuzya Jehova, eelyo wakandivwiila. Wakandivwuna kuzintu zyoonse izyakali kundiyoosya.” (Intembauzyo 34:4) Akaambo kazintu zyakamucitikila mubuumi, Davida wakali kukonzya kukulwaizya bamwi kuti “amulabile mubone kuti Jehova mubotu.” *

Sena kuli cintu cakamucitikila mubuumi icitondezya kuti Jehova ulamubikkila maano? Ikuti kaciliko, amucilembe aansi aawa. Icikonzya kumugwasya: Cintu eeco taceelede kuba cintu cilibedelede buya. Amusole kuyeeya zilongezyo zisyoonto-syoonto zyalo izicitika buzuba abuzuba, zimwi ambweni zintu nzyomutabikkili amaano kapati.

․․․․․

Ambweni bazyali banu mbobakamuyiisya kasimpe kamu Bbaibbele. Ikuti naa mbocibede oobo, eeco ncilongezyo. Nokuba boobo, muyandika kuba acilongwe cimugeme a Leza. Ikuti naa tamunacita oobo, mulakonzya kubelesya twaambo tuli mucibalo eeci ikutegwa tumugwasye kuba acilongwe a Leza. Jehova uyoomulongezya akaambo kakusolekesya kwanu. Bbaibbele lyaamba kuti: “Amuzumanane kulomba, eelyo muyoopegwa; amuzumanane kuyandaula, eelyo muyoojana.”​—Matayo 7:7.

[Bupanduluzi Buyungizidwe]

LUGWALO LUYANDIKA

“Balikkomene aabo bazyi kuti bayandika kusololelwa a Leza”​—Matayo 5:3.

NZILA IIGWASYA

Ikuti kamubala Bbaibbele mapeeji aali 5 abuzuba, muyoolimanizya kulibala mumwaka omwe.

SENA MULIZYI . . . ?

Ikubala bbuku eeli nkomucita alimwi akubelesya lulayo lwamu Bbaibbele ndolipa kutondezya kuti Jehova ulamubikkila maano.​—Johane 6:​44.

NZYONDIYANDA KUCITA!

Kutegwa ndigwasyigwe kapati akwiiya Bbaibbele, ndi ․․․․․

Kutegwa kandipaila lyoonse, ndi ․․․․․

Nzeezyi nzyondiyanda kubuzya bazyali bangu kujatikizya makani aaya ․․․․․

INO MUYEEYA BUTI?

● Ino mbuti mbomukonzya kupa kuti kwiiya Bbaibbele kwanu kakukkomanisya kapati?

● Nkaambo nzi Jehova ncayanda kwiiswiilila mipailo yabantu batalondokede?

● Ino mbuti mbomukonzya kuyaambele kujatikizya mbomupaila?

[Majwi aakwelelezya sikubala]

Nondakacili mwana, mipailo yangu yakali yakwiinduluka. Mazuba aano, ndilasola kupaila kujatikizya zintu zibotu alimwi azibi izindicitikila buzuba abuzuba. Mbwaanga zintu zicitika buzuba abuzuba ziliindene, eeci cindipa kuti kanditainduluki zintu nzyondaamba mumupailo.’’​—Eve

[Kabbokesi/Cifwanikiso]

Amubale Bbaibbele cakubikkila maano

1. Amusale cibalo camu Bbaibbele ncomuyanda kubala. Amupaile kulomba busongo kutegwa muzimvwisye nzyomubala.

  2. Amubale cakubikkila maano. Mutabindi pe. Ciindi nomubala, amweezeezye kuti mulizibwene zintu eezyo kazicitika. Amusole kwaabelesya maano aanu woonse: Amusole kubona cicitika, kumvwa majwi aabantu baambidwe mucibalo, kununkizya zintu izili mukwaambwa, kulabila cakulya caambidwe alimwi azimbi buyo. Amusoleke kweezeezya kuti mulizibwene buya zintu nzyomubala!

3. Amuzinzibale kuyeeya zintu nzyomwazwa akubala. Amulibuzye mibuzyo mbuli yeeyi iitobela:

● Nkaambo nzi Jehova ncaakacibikkilizya cibalo eeci mu Jwi lyakwe?

● Mbantu bali mbondeelede kwiiya, alimwi mbaabali ibeelede kuba cikozyanyo cakundicenjezya?

● Ino nziiyo nzi zigwasya izili mucibalo eeci nzyondeelede kubelesya?

● Ino cibalo eeci cindiyiisya nzi kujatikizya Jehova alimwi ambwacita zintu?

4. Amupaile mupailo mufwaafwi kuli Jehova. Amumwaambile nzyomwaiya mucibalo eeco camu Bbaibbele alimwi ambomuyanda kuzibelesya mubuumi bwanu. Amumulumbe Jehova lyoonse akaambo kacipego ncaakamupa, nkokuti Ijwi lyakwe, Bbaibbele!

[Cifwanikiso]

“Ijwi lyako ndilambe kumaulu aangu, alimwi mumuni uumunikila nzila yangu.”​—Intembauzyo 119:105.

[Kabbokesi/Cifwanikiso]

Amubikke zintu ziyandika kapati mubusena bwakusaanguna

Sena mujisi bubi kapati cakuti tamujisi ciindi cakupaila? Naa kwiiya Bbaibbele? Kanji-kanji, eeci ciyeeme azintu nzyomubikka mubusena bwakusaanguna.

Amusole nzila eeyi: Amubweze kabbakete akubikka mabwe mapati-pati mulinkako. Mpoonya amubikke musenga mukabbakete mane kazule. Lino mujisi kabbakete kazwide mabwe alimwi amusenga.

Amwaagwisye mabwe alimwi amusenga mukabbakete akuzibikka ambali. Amwiinduluke alimwi mbomwacitide akusaanguna ikubelesya mabwe alimwi amusenga ngoonya, pele lino musaangune kubikka musenga: Amubikke musenga mukabbakete mpoonya mwamanizya mubikke mabwe. Lino mabwe tanaakkwana woonse pe. Cili boobu akaambo kakuti mwasaanguna kubikka musenga mukabbakete.

Ino ncinzi ncotwiiya kucikozyanyo eeci? Bbaibbele lyaamba kuti: ‘Amusinizye zintu ziyandika kapati.’ (Bafilipi 1:​10) Ikuti mwabikka tuntu tusyoonto-syoonto mubusena bwakusaanguna mbuli kulikondelezya, muyoolimvwa kuti kunyina nomuyoojana ciindi cinji cakucita zintu ziyandika kapati, nkokuti zintu zyakumuuya. Pele kuti mwatobela malailile aamu Bbaibbele, muyoojana kuti munoojisi ciindi cinji cakucita ziyandika zya Bwami alimwi aciindi cakucita zyakulikondelezya zyeelede. Ciyeeme buyo azintu nzyomusaanguna kubikka mukabbakete kanu!

[Cifwanikiso]

Mbubwenya mbuli duba lyamuŋanda, kuyandika kubeleka canguzu kutegwa cilongwe canu a Leza ciyume