Ciiyo 1

Mbomunga Mwaziba Ncayanda Leza

Mmakani nzi mapati aajanika mu Bbaibbele? (1)

Ino nguni sikwaanza Bbaibbele? (2)

Nkaambo nzi ncomweelede kwiiya Bbaibbele? (3)

1. Ibbaibbele ncipego cipati kuzwa kuli Leza. Lili mbuli lugwalo usyi bana siluyando ndwanga wabatumina. Lilatwaambila kasimpe kajatikizya Leza—ikuti naa nguni alimwi anzyayanda. Lilapandulula mbuli mbwaakonzegwa kumana mapenzi alimwi alukkomano mbolujanwa. Ibbaibbele lilikke ndelitwaambila ncotweelede kucita kutegwa tumukkomanisye Leza.—Intembauzyo 1:1-3; Isaya 48:17, 18.

2. Ibbaibbele lyakalembwa abantu basika ku 40 baindene-indene balo ibakatola myaka iisika ku 1,600 kutalikila mu 1513 B.C.E. Lijisi mabbuku masyoonto-syoonto aali 66. Aabo bakalemba Bbaibbele bakagwasigwa a Leza kwiinda mumuuya uusalala. Bakalemba mizeezo yakwe, kutali yabo beni. Aboobo Leza uuli kujulu ngo Sikwaanza Bbaibbele, kutali muntunsi uuli woonse pe.—2 Timoteo 3:16, 17; 2 Petro 1:20, 21.

3. Leza wakasinizya kuti Bbaibbele likkopwe akuyobolwa kabotu. Kwasimbwa ma Bbaibbele manji kwiinda mabbuku aambi aali oonse. Tabali boonse bantu ibayookondwa kumubona kamwiiya Bbaibbele, pesi eco mutacilekeli kuti cimulesye pe. Kupona kwenu kutamani kuyeeme akumuziba Leza akucita kuyanda kwakwe nomukazigwa.—Matayo 5:10-12; Johane 17:3.