1, 2. (a) Ino lukwatano lwakaanzwa kuti kalukkala ciindi cilamfwu buti? (b) Mbuti mbocikonzeka eci?

ICIINDI Leza naakaswaanganya mwaalumi amukaintu bakusaanguna mulukwatano, kwakanyina citondezyo cakuti lukwatano lwabo luyakumana. Ba Adamu a Eva bakeelede kuba antoomwe kukabe kutamani. (Matalikilo 2:24) Mulawo wa Leza iwalukwatano lwabulemu uzumizya lukwatano lwabantu buyo bobile, mwaalumi omwe amukaintu omwe. Icintu cilikke cizumizigwa a Magwalo kumana lukwatano alimwi cinga cazumizya kukwatana amuntu umbi, mbwaamu bwaomwe naa bobile bakwetene.—Matayo 5:32.

² Sena bantu bobile bakwetene balakonzya kukkala mulukkomano kwaciindi cilamfwu? Ee, Bbaibbele litondezya zintu zyobile izipa kuti eci cikonzeke. Kuti boonse bobile, mukaintu amwaalumi bazibelesya zintu ezi, balakonzya kujalula mulyango utola kulukkomano akuzileleko zinji. Ino ezi nzintu nzi?

3. Misyobo nzi yotatwe yaluyando banabukwetene njobeelede kubaayo?

³ Icintu cakusaanguna nduyando. Pele mu Bbaibbele kwaambwa luyando lunji lwiindene-indene. Luyando lumwi lwaambwa ndooluya muntu ndwanga kajisi kumweenzinyina, ilwabantu bobile bamvwana kapati. (Johane 11:3) Luyando lumbi ndooluya lujanika akati kabantu bamukwasyi omwe. (Ba-Roma 12:10) Luyando lwatatu ndooluya lujatikizya musankwa amusimbi ibayandana. (Tusimpi 5:15-20) Aino misyobo eyi  yoonse yaluyando yeelede kuti kailiko akati kamulumi amukaintu. Pele kuli luyando lwane, ilupati kwiinda misyobo eyi yaambwa.

4. Ino musyobo nzi waluyando wane?

⁴ Mumulaka wakusaanguna kubelesegwa kulemba Magwalo aa Bunakristo aa Cigiliki, ibbala lyaamba luyando olu lwane ndya a·gaʹpe. Eeli bbala lilabelesegwa ku 1 Johane 4:8 ikulembedwe kuti: “Leza nduluyando.” Masimpe “swebo tulamuyanda nkaambo [Leza] nguwakasaanguna kuyanda ndiswe.” (1 Johane 4:19) Munakristo usaanguna kuyanda Jehova Leza kuzwa waawo nayanda muntunyina. (Marko 12:29-31) Ibbala lya a·gaʹpe lilabelesegwa alimwi ku Ba-Efeso 5:2, ikulembedwe  kuti: “Amweende cakuyandana, mbuli Kristo alakwe mbwaakayanda ndinywe akulyaabilila kuba cituuzyo acipaizyo cabweema bubotu nkaambo kesu.” Jesu wakaamba kuti basikumutobela beni-beni bayakuzibwa kwiinda mukutondezya luyando olu, wakati: “Kuliceeci bantu boonse bayoomuziba, kuti muli basikwiiya bangu, mwanooyandana [a·gaʹpe] umwi amweenzinyina.” (Johane 13:35) Alimwi amubone kuti ibbala lya a·gaʹpe lilabelesegwa ku 1 Ba-Korinto 13:13: “Alabedelela aya otatwe, lusyomo abulangilizi aluyandisyo, pele akati kayaaya cipati nduyandisyo [a·gaʹpe].”

5, 6. (a) Nkaambo nzi luyando ncoluli lupati kwiinda lusyomo abulangizi? (b) Ntwaambo nzi tumwi tutondezya kuti luyando inga lwagwasya lukwatano kuti luzwidilile?

⁵ Ino ncinzi cipa kuti luyando lwa a·gaʹpe lube lupati kwiinda lusyomo abulangizi? Lweendelezegwaa milawo—milawo iiluleme iijanika Mujwi lya Leza. (Intembauzyo 119:105) Olu luyando lujatikizya kucitila beenzinyoko zintu ziluzi alimwi zibotu kumeso a Leza, oyo sikucitilwa nayelede natayelede kucitilwa. Luyando olu lupa kuti bantu bakwetene batobele lulayo lwa Bbaibbele lwaamba kuti: “Amukazikilane myoyo yanu akulekelelana, na umwi ulijisi kaambo kumweenzinyina. Mbuli Mwami mbwaakamulekelela milandu yanu, anywebo amucite mbubonya obo.” (Ba-Kolose 3:13) Banabukwetene bajisi luyando “[bala]sungwaala kuyandana [a·gaʹpe], nkaambo luyando ndoluvumba zibi zinjizinji.” (1 Petro 4:8) Ategwa luyando lulavumba zibi. Taluzigusyi pe, nkaambo kunyina muntu uutakonzyi kulubizya.—Intembauzyo 130:3, 4; Jakobo 3:2.

⁶ Kuti banabukwetene kabajisi luyando luli boobu kuli Leza akumuntunyina, lukwatano lwabo lulakkala alimwi lunikukkomanisya nkaambo “luyandisyo talweeli.” (1 Ba-Korinto 13:8) Luyando “ncecaanzyo cazintu zyoonse mubulondosi.” (Bakolose 3:14, Ci) Kuti naa kamukwetene mbuti yebo amukaako mbomukonzya kubaa luyando olu? Kamubala Ijwi lya Leza  akulibandika antoomwe. Amwiiye cikozyanyo ca luyando Jesu ncaakapa, musole kumutobela, kuyeeya akulilemeka mbulinguwe. Kunze lyaboobo kamujanika kumiswaangano ya Banakristo Ijwi lya Leza nkoliyiisigwa. Alimwi amulombe lugwasyo kuli Leza lwakuti mube aluyando olu lusumpukide, lwalo luli akati kamicelo yamuuya wa Leza uusalala.—Tusimpi 3:5, 6; Johane 17:3; Ba-Galatiya 5:22; Ba-Hebrayo 10:24, 25.

7. Ino bulemu ninzi, alimwi nguni weelede kupa bulemu mulukwatano?

⁷ Kuti banabukwetene kabayandana ncobeni, inga cabapa kuti kabalemekana, kulemekana ncecintu cabili icileta lukkomano mulukwatano. Kulemeka “nkulanganya bantu, nkubapa bulemu.” Ijwi lya Leza lilaya Banakristo boonse kubikkilizya mulumi amukaintu kuti: “Amusungwaale kukulemekana.” (Ba-Roma 12:10) Mwaapostolo Petro wakalemba kuti: “Anywebo nobalumi, mbubonya obo, amukale kabotu abakazi banu, nkaambo mukazi uli mbuli cilongo cikompeme, mulumi nguuinda inguzu.” (1 Petro 3:7) Mukaintu ulaililwa kuti weelede “alemye mulumi wakwe.” (Ba-Efeso 5:33) Kuti naa muyanda kumupa bulemu muntu, mulamufwida luse, mulamulemeka kubikkilizya azyoonse nzyaamba, alimwi munooyandide kuzuzikizya kufwumbwa cintu camaanu ncaalomba kulindinywe.

8-10. Ino bulemu inga bwagwasya munzila nzi kucita kuti lukwatano lukkale alimwi kakuli lukkomano?

⁸ Aabo bayanda kubaa lukkomano mulukwatano lwabo, balalemeka bamakaintu naa balumi babo kwiinda ‘mukutayeeya kuligwasya lwabo beni luzutu, pe, pele kwiingasila kugwasya aumwi mukaakwe.’ (Ba-Filipi 2:4) Tabalangi buyo zintu zibakkomanisya pe, nkaambo oko inga kwaba kuliyanda. Pele aumwi ulalanga azintu zinga zyagwasya mukaakwe. Atwaambe, eco ncecintu cakusaanguna ncobalanga.

 ⁹ Kulemekana mulukwatano inga kwagwasya banabukwetene kulemeka kwaandaana kwamizeezo. Tacili camaanu pe kulangila kuti bantu bobile kabeendelana kuyeeya muzintu zyoonse. Mulumi ncayeeya kuti ncintu cipati, kumukaintu ambweni tacili acipati pe, alimwi mukaintu ncayanda ulakonzya mulumi kataciyandi pe. Pele muntu umwi aumwi weelede kulemeka mizeezo alimwi akusala kwamweenzinyina kufwumbwa kuti kazitaimpene amilawo alimwi anjiisyo zya Jehova. (1 Petro 2:16; Amukozyanisye a Filimona 14.) Kunze lyaboobo muntu umwi aumwi weelede kulemeka ciimo camweenzinyina, tayelede kwaamba majwi aanga amutola aansi, mube mubantu, antela kabali balikke.

¹⁰ Ee, kuyanda Leza alimwi akuyandana, antoomwe akupana bulemu nzintu zyobile iziyandika kapati kuti lukwatano luzwidilile. Ino zintu ezi inga zyabelesegwa buti mumbazu zimwi zipati zyabuumi bwalukwatano?

11. Kweelana acaamba Magwalo, nguni mutwe mulukwatano?

¹¹ Ibbaibbele litwaambila kuti mwaalumi wakalengwa muciimo cinga camugwasya kuba silutwe wamukwasyi uukonzya kuzwidilila. Aboobo mwaalumi nguunopedwe mukuli kuli Jehova wakubona kuti mukaintu wakwe antoomwe abana bakkala kabotu munzila yakumubili ayakumuuya. Walikweelede kuti kasala nzila zibotu izyeendelana akuyanda kwa Jehova alimwi akuba citondezyo cibotu cabukkale bwabukombi. “Nubanakazi, amulibombye kubalumi banu mbuli mbumulibombya kuli-Leza. Nkaambo mulumi ngumutwe wamukakwe, mbubonya mbuli Kristo mbwali mutwe wambungano.” (Ba-Efeso 5:22, 23) Nokuba boobo Ibbaibbele lyaamba kuti awalo mulumi ulijisi mutwe, Oyo umweendelezya. Mwaapostolo Paulo wakalemba kuti: “Lino ndayanda kuti mukazibe aya. Mutwe  wamwaalumi umwi aumwi ngu-Kristo, awalo mutwe wamwanakazi ngumwaalumi, awalo mutwe wa-Kristo ngu-Leza.” (1 Ba-Korinto 11:3) Mwaalumi musongo ulaiya mbokuzuzikizigwa busilutwe kwiinda mukutobela Kristo Jesu mutwe wakwe.

12. Ncitondezyo nzi cibotu Jesu ncaakasiya icakulibombya alimwi acabweendelezi bwasilutwe?

¹² Jesu awalo ulijisi mutwe, Jehova, elyo ulalibombya Kulinguwe mbuli mbwayelede. Jesu wakati: “Nsiyandauli luyando lwangu, pele luyando lwayooyo uwakandituma.” (Johane 5:30) Cabota citondezyo eco! Jesu “[ngo]mutaanzi kuzyalwa kuzilenge zyoonse.” (Ba-Kolose 1:15) Wakaba Mesiya. Wakali kweelede kuba Mutwe wambungano ya Banakristo bananike alimwi oyo usalidwe kuba Mwami wa Bwami bwa Leza, kubainda baangelo boonse. (Ba-Filipi 2:9-11; Ba-Hebrayo 1:4) Nokuba kuti wakalijisi busena bupati buli boobu, Jesu tanaakali muntu silunya, uutaambiliki, naa utongooka. Tanaakazi kudyaaminina, taakwe naakali kuyeezya basiciiya bakwe lyoonse kuti beelede kumuteelela. Jesu wakali muntu siluyando alimwi siluse, ikapati kubantu badyaamininwa. Wakati: “Amuboole kulindime nyoonse nomukatede nomulemenwa, ndime enti kamulemunune. Amulikulike ijokwe lyangu, mwiiye kwangu, nkaambo ndilibombede, ndi mutete moyo, lino mulakatulukwa mumyoyo yanu, nkaambo ijokwe lyangu lilibulungusene, awalo mukuli wangu muuba.” (Matayo 11:28-30) Calikukkomanisya kuba anguwe.

13, 14. Ino mbuti mulumi uujisi luyando mbwanga watobela Jesu mubweendelezi bwakwe bwabusilutwe?

¹³ Mulumi uuyanda lukkomano mumukwasyi weelede kutobela ciimo cibotu ca Jesu. Mulumi mubotu tatondezyi lunya alimwi tadyaaminini, tabelesyi nguzu zyakwe zyabusilutwe kupenzya mukaintu wakwe. Pele ulamuyanda alimwi ulamulemeka. Kuti naa Jesu uutakonzyi kulubizya wakali “mutete moyo,” nkokuti mulumi ulijisi kaambo kapati kakuba boobo nkaambo walo  ulalubizya. Kuti naa walubizya ulayanda kuti mukaintu wakwe amuteelele. Aboobo mulumi mutete moyo ulazumina kuti naa walubizya, nokuba kuti cilakatazya kwaamba kuti, “undijatile; waliluzi.” Mukaintu cilamuubaubila kulemeka busilutwe bwamulumi uulicesya alimwi mubombe moyo kwiinda mulumi uulisumpula, uutamvwi. Awalo mukaintu uujisi bulemu ulalilekelela kuti naa walubizya.

¹⁴ Leza wakamulenga mukaintu aciimo cibotu cinga cagwasyilizya kuleta lukkomano mulukwatano. Mulumi musongo ulacilemeka ciimo eci, elyo takoomudyaaminina mukaintu wakwe. Bamakaintu banji mbaasiluse kapati, alimwi balijisi lweetelelo, eci ciimo cilayandika mukubamba mukwasyi alimwi akuyanzana abantu. Kanjikanji mukaintu mmusungu kubamba ŋanda, ikwiicita kuti bube busena bubotu bwakukkala. “Mukaintu mubotu” waambwa ku Tusimpi caandaano 31 wakalijisi ciimo cibotu kapati alimwi amaanu, elyo mukwasyi wakwe wakagwasigwa kapati kulinguwe. Nkaambo nzi? Nkaambo moyo wamulumaakwe “ulamusyoma.”—Tusimpi 31:10, 11.

15. Mbuti mulumi mbwanga watondezya luyando mbuli lwa Kristo alimwi abulemu kumukaintu wakwe?

¹⁵ Mumisyobo imwi, inguzu zyamulumi zilaindizigwa cakuti kumubuzya mubuzyo cilangwa mbuli kuti nkubula bulemu. Mulumi ulaendelezya mukaintu mbuli muzike. Obu bweendelezi bubi bulakonzya kuleta kutamvwana kabotu kutali buyo amukaintu pele a Leza. (Amukozyanisye a 1 Johane 4:20, 21.) Pele bamwi balumi muciindi cakusololela mukwasyi, balekela bamakaintu babo kweendelezya ŋanda. Mulumi uulibombya kuli Kristo tapenzyi mukaintu wakwe nokuba kumusampula. Pele utobela Jesu mukutondezya luyando lwakulyaaba alimwi ulamvwa lulayo lwa Paulo lwakuti: “Anywebo nobalumi, amuyande banakazi banu, mbuli Kristo mbwaakayanda imbungano akulyaaba nkaambo kanjiyo.” (Ba-Efeso 5:25) Kristo Jesu  wakali kubayanda kapati basiciiya bakwe cakuti wakabafwida. Mulumi mubotu ulasola kutobela muuya oyu wakutaliyanda, elyo muciindi cakumutongooka mukaintu wakwe ulayanda kumugwasya. Kuti naa mulumi ulalibombya kuli Kristo, alimwi utondezya luyando abulemu mbuli Kristo, eci cilapa kuti mukaintu wakwe alibombye kulinguwe.—Ba-Efeso 5:28, 29, 33.

16. Nciimo nzi mukaintu ncayelede kutondezya mukuyanzana kwakwe amulumi?

¹⁶ Nokwakainda ciindi kuzwa naakalengwa Adamu, “Jehova Leza wakati, Tacili cibotu kuti muntu akale alike pe. Atumucitile sikumugwasya uumweelede.” (Matalikilo 2:18) Leza wakalenga Eva kuti abe “sikumugwasya,” kutali sikuzundana amwaalumi. Lukwatano taakwe nolwakeelede kuba mbuli nkamu yababelesi iijisi bakapitau bobile ibali mukukwelana. Mulumi wakali kweelede kweenzya busilutwe bwakwe muluyando, alimwi awalo mukaintu wakali kweelede kutondezya luyando, bulemu, alimwi akulibombya cakutasinikizigwa.

17, 18. Muunzila nzi njanga mukaintu waba mugwasyi wamulumi wakwe?

¹⁷ Nokuba boobo mukaintu mubotu talibombyi buyo pe. Ulasola kuba sikugwasya ncobeni, ulagwasyilizya mulumi wakwe muzintu nzyasala kucita. Aino eci cilauba-uba kulinguwe kuti naa muzeezo wamulumi uleendelana awakwe. Nokuba kuti baimpana mizeezo amulumi, kugwasyilizya kwakwe kulakonzya kupa kuti muzeezo wamulumi uzwidilile.

¹⁸ Mukaintu ulakonzya kugwasya mulumi wakwe kuba silutwe uuli kabotu munzila zimbi. Ulakonzya kumulumba mulumi akaambo kamilimo yakwe yabweendelezi muciindi cakumutongooka naa kumupa kuyeeya kuti takonzyi kumukkomanisya. Mukaintu weelede kuyeeya kuti kuyanzana kabotu amulumi wakwe kulajatikizya akubaa “moyo mubombe mutontozi, uuyandika  loko mumeso aa-Leza” alimwi akumeso aamulumaakwe. (1 Petro 3:3, 4; Ba-Kolose 3:12) Ino kuti mulumi katasyomi? Nasyoma natasyomi, Imagwalo akulwaizya bamakaintu “kuyanda balumi babo akuyanda bana babo, [akuti] balibatamike, akusalala, akukutauka kabotu mumaanda aabo, kabasamauka, akumvwa balumi babo, kuti makani aa-Leza atasampaulwi.” (Tito 2:4, 5) Kuti naa kwabuka makani aajatikizya manjezeezya, imulumi uutasyomi ulalangilwa kapati kulemeka ciimo camukaintu kufwumbwa kuti capandululwa “amoyo mutete [amu]kulemeka.” Bamwi bamalumi batasyomi ‘basanduka akaambo kanyendelo zyabakazi babo [kakunyina akubelesya majwi Ci], kukulangilila nyendelo zyabo nzibeendela cakuyoowa.’—1 Petro 3:1, 2, 15; 1 Ba-Korinto 7:13-16.

19. Ino kuti mulumi waambila mukaintu kuti atyole mulawo wa Leza?

¹⁹ Ino kuti mulumi waambila mukaintu kucita cintu cikasigwa a Leza? Kuti naa eco cacitika, ayeeye kuti Leza Ngomuleli wakwe mupati. Ulatobela nzila njobakatola bamaapostolo ciindi nobakaambilwa kutyola mulawo wa Leza abeendelezi. Ibbuku lya Incito 5:29 liluula kuti: “Kwalo wakavuwa Petro abaapostolo bati, Tuleelede kumvwa Leza kwiinda bantu.”

20. Ndubazu nzi lupati iluyandika luyando abulemu?

²⁰ Luyando abulemu zilayandika kapati kulubazu lumwi lwalukwatano—ikubandika. Imulumi uuyanda mukaintu wakwe ulabandika anguwe makani aajatikizya milimo yamukaintu amapenzi ngajisi alimwi ulayanda kumvwa mizeezo yamukaintu kuzintu zyaandeene-andeene. Eco ncintu ciyandika kumukaintu. Mulumi uujana ciindi cakwaambaula kabotu alimwi akuswiilila ncaamba mukaintu wakwe, utondezya kuti ulamuyanda alimwi ulamulemeka mukaintu wakwe. (Jakobo 1:19) Bamakaintu balatongooka kuti bamalumi babo  tababandiki kapati ambabo. Eco ncibyaabi. Mulumi masimpe ulakonzya kabeleka mawoola manji ciindi cino bantu banji nobajisi bubi alimwi awalo mukaintu akaambo kabuumi bwayuma ulakonzya kabeleka. Nokuba boobo banabukwetene beelede kujana ciindi cakukkala antoomwe. Kuti pe, lukamantano lwabo lulamana. Kuti basinikizigwa kulangaula cilongwe kubantu bambi babeetelela, kunze lyambobakwetene limwi, eci inga caleta mapenzi mapati.

21. Mbuti kubelesya majwi aayelede mukukanana mbokunga kwagwasya kuti kakuli lukkomano mulukwatano?

²¹ Inzila Bamakaintu njobabandika abamaalumi ncintu cipati. “Majwi aabotezya . . . alalweezya muuya akuponya mubili.” (Tusimpi 16:24) Muntu ngomukwetene limwi nasyoma natasyomi, ilulayo lwa Bbaibbele lulabeleka ilwakuti: ‘Kwaamba kwanu kulweezegwe amunyo wakulunga,’ nkokuti kakumvwika kabotu. (Ba-Kolose 4:6) Kuti zintu buzuba obo taakwe nozyamweendela kabotu mukaako, ikumukulwaizya mumajwi aatontozya kulagwasya kapati. “Mbuli micelo yangolida mucisuwo cansiliva, mbwaabede majwi aambwa kuciindi ceelede.” (Tusimpi 25:11) Majwi ngomubelesya alimwi aŋambawido nzintu zipati. Mucikozyanyo umwi ulakonzya kwaambila mweenzinyina kuti: “Jala mulyango!” Mumajwi aatondezya kucimwa akutongooka. Pele majwi ‘aalweezegwa amunyo’ ngaayo aambwa cabulemu kabotu-kabotu kuti: “Ndalomba mundijalile mulyango.”

22. Muuya nzi banabukwetene ngobayandika kubaawo kutegwa kababandika kabotu?

²² Kubandika ikuli kabotu takukatazyi pe kuti naa majwi kaakananwa kabotu-kabotu, kucembwidana akutambaika kakuli kokuya kwaluyando alimwi kakuli luse, kuteelelana alimwi myoyo kiili mitete. Kuti mulumi amukaintu coonse ciindi kababeleka canguzu kuyandaula nzila yakubandika kabotu, banoolimvwa kwaanguluka kuzibisyanya nzyobayanda, alimwi aumwi unoojana luumbulizyo alugwasyo kumweenzinyina  muziindi zityompya naa zibuzya mizeezo. Ijwi lya Leza lyaamba kuti “mubaumbulizye batyompedwe mumyoyo.” (1 Ba-Tesalonika 5:14) Kulaba ziindi mulumi natyompwa naa mukaintu. Balakonzya ‘kuumbulizyanya,’ akuyakana.—Ba-Roma 15:2.

23, 24. Mbuti luyando abulemu mbozinga zyagwasya ciindi nokuli kuzwangana? Amupe cikozyanyo.

²³ Banabukwetene bayandana akulemekana tabakookubona kuba penzi kwiimpana kulikoonse nkobanga babaako. Balasoleka canguzu kutatondezyanya “lunya.” (Bakolose 3:19, Ci) Boonse bobile beelede kuyeeya kuti “kuvuwa kabotu kulalesya bukali.” (Tusimpi 15:1) Mutanyansyi naa kutongooka mweenzinyoko kuti waamba zintu zimukatazya mumoyo. Pele mweelede kucibona kuti nceciindi cakuteelela mizeezo yamweenzinyoko. Mweelede kusoleka kujana nzila antoomwe yakumana mazwanga munzila inga yamukkomanisya nyoonse.

²⁴ Amuyeeye ciindi Sara naakapa muzeezo wakumana penzi limwi oyo walo mulumi wakwe Abrahamu ngwaatakakkomanina. Pele Leza wakaambila Abrahamu kuti: “Swiilila ijwi lyakwe.” (Matalikilo 21:9-12) Abrahamu wakacita obo, elyo wakalelekwa. Aboobo kuti mukaintu wapa muzeezo umwi wiindene awamulumi, mulumi weelede kuswiilila. Awalo mukaintu atabi nguwe waambaula coonse ciindi pe, pele aswiilile ncaamba mulumaakwe. (Tusimpi 25:24) Kuti mulumi naa mukaintu coonse ciindi kayanda kuti abe ngonguwe uuteelelwa, citondezya kubula luyando abulemu.

25. Mbuti kubandika ikuli kabotu mbokunga kwagwasya mumakani aajatikizya lubazu lwakoonana?

²⁵ Kubandika ikuli kabotu kulayandika kumakani aajatikizya koonana kwabanabukwetene. Muuya wakuliyanda alimwi akutalyeendelezya inga wanyonyoona cilengwa eci calukamantano mulukwatano. Kubandika camoyo omwe alimwi abusicamba cilagwasya. Kuti aumwi kasoleka kukkomanisya mweenzinyina,  koonana taakwe nolinga lyaba penzi pati pe. Kumakani aaya alimwi amakani aambi, “umwi aumwi uleelede kuyandaula kugwasya mweenzinyina.”—1 Ba-Korinto 7:3-5; 10:24.

26. Nokuba kuti kuli ziindi zimwi mumakwatano oonse nokuli kukkala kabotu aciindi nokuli mapenzi, mbuti kuswiilila Ijwi lya Leza mbokunga kwagwasya banabukwetene kujana lukkomano?

²⁶ Lwabota lulayo olu luzwa Mujwi lya Leza! Masimpe, kuli ciindi nokuli kukkala kabotu alimwi aciindi nokuli mapenzi mumakwatano oonse. Pele kuti banabukwetene batobela mizeezo ya Jehova njaatondezya mu Bbaibbele, akubelesya luyando lweendelezegwaa mulawo alimwi akupana bulemu mulukwatano, balakonzya kusyoma kuti balajana lukkomano alimwi balazwidilila mulukwatano lwabo. Munzila eyi, kunze lyakupana bulemu, balalemeka ayooyo Wakatalisya lukwatano, Jehova Leza.