Cibalo 27

Ino Leza Wako Nguni?

INO nkaambo nzi imubuzyo ooyu wakuti, Ino Leza wako nguni? ncouyandika kapati?— Nkaambo bantu bakomba baleza banji. (1 Ba-Korinto 8:5) Eelyo mwaapostolo Paulo naakatambula nguzu kuzwa kuli Jehova zyakuponya mwaalumi watakaina buzuba walyeendela kuzwa kubwana, ibantu bakoompolola ategwa: ‘Baleza balisandula kuba bantu akuza kulindiswe!’ Ibantu bakayanda kumukomba Paulo amweenzinyina Barnaba. Paulo bakamuulika kuti ngu Merkuri alimwi Barnaba bakamuulika kuti ngu Jupitere, imazina aabaleza bakubeja.

Pele Paulo alimwi a Barnaba tiibakabazumizya bantu kuti babakombe. Bakasotokela munkamu yabantu akwaamba kuti: “Muzileke ezi zintu zyabuyo, musandukile kuli-Leza uupona.” (Incito 14:8-15) Ino “Leza uupona” iwakalenga zintu zyoonse nguni?— Inzya, ngu Jehova, “Mupatikampatila atala anyika yoonse.” Jesu wakaamba Jehova kuti ngu ‘Leza mwini-mwini uuli alikke.’ Aboobo, ino nguni alikke weelede kukombwa?— Ngu Jehova alikke!—Intembauzyo 83:18; Johane 17:3; Ciyubunuzyo 4:11.

Ibunji bwabantu bakomba baleza bambi kunze lya ‘Leza mwini-mwini uuli alikke.’ Bunji bwaziindi bakomba zintu nzyobapanga kuzwa kuzisamu, kumabwe naa kulubulo. (Kulonga 32:4-7; Levitiko 26:1; Isaya 44:14-17) Nobaba baalumi abanakazi ibadumide zimwi ziindi balalemekwa nokuba kukombwa buya mbuli kuti mbaaleza. Sena cili kabotu kubalemya boobo bantu aaba?—

Saulo naakaba mwaapostolo Paulo, wakalemba kuti: ‘Leza waansi aano woofwaazya mizeezo yabantu batasyomi.’ (2 Ba-Korinto 4:4) Ino leza ooyu nguni?— Inzya, ngu Saatani Diabolosi! Saatani wakonzya kupa kuti bantu kabakomba bantunyina alimwi azintu buyo.

 Eelyo Saatani naakasola kweena Jesu kuti amufwugamine akumukomba, ino ncinzi Jesu ncaakamwaambila Saatani?— “Nguwe Jehova Leza wako ngoelede kukomba, nguwenya alike ngoelede kumanina milimo.” (Matayo 4:10) Aboobo, Jesu wakacisalazya kuti Jehova alikke nguuyelede kukombwa. Atubale makani aajatikizya balombwana bamwi ibakaazyi makani aaya. Imazina aabo mbaa Sadrake, Mesaki alimwi a Abedinego.

Aaba bana Hebrayo bana-bana bakali basicisi ca Leza ca Israyeli alimwi bakatoledwe buzike ku Babuloni. Ooko imwami wazina lya Nebukadinezara wakabumba cikozyanyo cangolida icipati kapati. Bumwi buzuba wakalailila kuti lyoonse zyanoolizigwa nyimbo, muntu woonse wakeelede kukotama akukomba cikozyanyo. Wakacenjezya kuti, ‘Kufwumbwa muntu uutanookotami akukomba uyakuwaalwa mubbila lyamulilo wamabangabanga.’ Ino ncinzi ncowakali kunga wacita?—

 Lyoonse buyo ba Sadrake, Mesaki alimwi a Abedinego bakali kucita zyoonse nzyaakali kubalailila mwami. Pele lino bakakaka kukotamina cikozyanyo akucikomba. Sena ulikazyi kaambo ncobakakakila?— Nkaambo mulawo wa Leza wakali kwaamba kuti: ‘Utabi abaleza bambi kunze lyangu. Utalicitili cikozyanyo cibezedwe akucikomba.’ (Kulonga 20:3-5) Aboobo ba Sadrake, Mesaki alimwi a Abedinego bakaswiilila mulawo wa Jehova muciindi cakumvwida mwami.

Imwami wakanyema kapati, aboobo ndilyonya wakaita bana Hebrayo aabo botatwe bana-bana. Wakababuzya kuti: ‘Sena ngancobeni makani aaya aakuti mwakaka kubelekela baleza bangu? Ndilamupa ciindi acimbi cakuti mucite oobo. Lino, mwamvwa buyo nyimbo, mweelede kuvwundama akukomba cikozyanyo ncindaimika. Ikuti mutaciti oobo, mulawaalwa mubbila lyamulilo wamabangabanga. Lino nguni leza ooyo uuyoomuvwuna mumaanza aangu?’

Ino ncinzi ncobakali kunga bacita lino balombwana aabo? Ino ncinzi ncowakali kunga wacita yebo?— Bakaambila mwami kuti: ‘Leza wesu ngotukomba ulakonzya kutuvwuna. Pele nokuba kuti ataciti oobo, baleza bako tabali baleza mbotunookomba akumanina milimo pe. Twakaka kucikotamina cikozyanyo cako cangolida.’

Imwami wakalutila cini-cini. Wakalailila kuti: ‘Amulisosele bbila lyamulilo ziindi zili ciloba kwiinda mbolisoselwa lyoonse!’ Mpoonya wakalailila  baalumi bakwe basinguzu kwaanga ba Sadrake, Mesaki alimwi a Abedinego akubawaala mubbila lyamulilo wamabangabanga! Ibbila lyamulilo eelyo lyakali kupya kapati cakuti babelesi bamwami bakafwa akaambo kakkumbi lyamulilo! Ino ncinzi cakacitika kubana Hebrayo botatwe?

Ba Sadrake, Mesaki alimwi a Abedinego bakafwusilwa akati eeni aamulilo. Pele bakayumuka! Kunyina nobakapya pe. Alimwi tiibakacaangidwe pe. Ino eeco cakakonzyeka buti?— Imwami wakalanga mubbila lyamulilo, alimwi eeco ncaakabona cakamupa kuyoowa kapati. Wakabuzya kuti: ‘Sena tiitwawaala baalumi botatwe mumulilo?’ Babelesi bakwe bakaingula kuti: ‘Mbombubo Omwami.’

Mpoonya mwami wakati: ‘Amulange! Ndibwene baalumi bone beendeenda mumulilo, alimwi mulilo tuuli mukubaumpa pe.’ Sena muntu ooyo wane ulimuzyi kuti wakali ni?— Wakali mungelo wa Jehova. Wakabakwabilila ba Hebrayo aabo botatwe kukupya mulilo.

Naakacibona eeci, imwami wakaunka kumulyango wabbibi lyamulilo akoompolola kuti: ‘Sadrake, Mesaki a Abedinego nobalanda ba Leza Sijulu wamajulu,  amuzwe muboole kuno!’ Nobakazwa, bantu boonse bakabona kuti kunyina mpobakapya. Alimwi kunyina anobakali kununka busi bwamulilo. Mpoonya mwami wakati: ‘Atembaulwe Leza waba Sadrake, Mesaki alimwi a Abedinego, iwakatuma mungelo wakwe akuvwuna balanda bakwe ibatakakomba leza umbi ccita buyo Leza wabo beni.’—Daniele, caandaano 3.

Kuli ciiyo ncotukonzya kwiiya kuli ceeco cakacitika kuciindi eeco. Naaba mazubaano, ibantu babelesya zikozyanyo naa mituni mukukomba. Ibbuku limwi lyaamba kuti: “Indembela ilalemekwa mbubwenya mbuli ciingano.” (The Encyclopedia Americana) Zikozyanyo zilakonzya kupangwa kuzwa kuzisamu, mabwe, lubulo naa zisila. Basikwiiya ba Jesu bakusaanguna bakakaka kukomba mwami waba Roma, eeco sikwiiya zyakaindi wazina lya Daniel P. Mannix ncaakaamba kuti cikozyenye buyo “akukaka kucita silutu kundembela naa kwiinduluka cikonkezyo cakusyomeka.”

Aboobo sena kuli kwiindana kuliko kuli Leza ikuti naa cikozyanyo cikombwa kacipangidwe aacisila, cisamu, ibbwe naa lubulo?— Sena inga kacili kabotu kuti mubelesi wa Jehova kakomba cikozyanyo cili boobo?— Ba Sadrake, Mesaki a Abedinego bakakaka kucita oobo, alimwi Jehova wakabakkomanina. Ino mbuti mbonga waiya cikozyanyo cabo?

Aabo ibabelekela Jehova tabakonzyi kukomba muntu uumbi naa cintu pe. Bala makani aajatikizya ceeci, kuli Joshua 24:14, 15, 19-22; Isaya 42:8; 1 Johane 5:21; alimwi a Ciyubunuzyo 19:10.

[Cifwanikiso icili apeeji 143]

Ino nkaambo nzi Paulo a Barnaba ncobatakabazumizyila bantu kubakotamina akubakomba?

[Cifwanikiso icili apeeji 144]

Ino nkaambo nzi baalumi aaba bali mucifwanikiso ncobakakaka kukotamina cikozyanyo?

[Cifwanikiso icili apeeji 145]

Ino mbuti Jehova mbwaakabafwutula babelesi bakwe kuzwa mubbila lyamulilo wamabangabanga?

[Zifwanikiso izili apeeji 146]

Mmituni nzi njobalemeka bantu mazubaano?