Cibalo 43

Ino Bana Bokwesu Mbaani?

CIMWI ciindi Imwiiyi Mupati wakabuzya mubuzyo uugambya. Wakali wakuti: “Ino kayi baama mbaani, abalo bana bokwesu mbaani?” (Mateyo 12:48, Ci) Sena inga wawiingula mubuzyo ooyo?— Cakutadooneka ulizyi kuti banyina Jesu bakali kwiitwa kuti mbaa Mariya. Pele sena ulaazyi mazina aabanyina?— Sena wakalijisi abacizyi?—

Ibbaibbele lyaamba kuti ibanyina Jesu bakali ba ‘Jakobo, Josefa, Simoni alimwi a Judase.’ Alimwi Jesu wakalijisi bacizyi ibakali kupona naakali kukambauka. Mbwaanga Jesu ngowakali mutaanzi kuzyalwa, aaba boonse bakali baniini kulinguwe.—Matayo 13:55, 56; Luka 1:34, 35.

Sena ibanyina Jesu bakali basikwiiya bakwe abalo?— Ibbaibbele lyaamba kuti kumatalikilo “tiibakali kumusyoma pe.” (Joni 7:5, Ci) Pele kumbele, Jakobo alimwi a Judase (ooyo alimwi wiitwa kuti Juda) bakaba basikwiiya bakwe, alimwi mane bakalemba mabbuku aamu Bbaibbele. Sena ulaazyi mabbuku ngobakalemba?— Inzya, mmabbuku aa Jakobo alimwi a Juda.

Nokuba kuti ibacizyi ba Jesu tababandidwe mazina mu Bbaibbele, tulizyi kuti wakalijisi bacizyi basika kuli bobile. Nokuba boobo, kulakonzyeka kuti kwakali abambi. Sena ibacizyi aaba bakaba basikumutobela?— Talitwaambili oobo pe Bbaibbele, aboobo tatuzyi pe. Pele sena ulikazyi kaambo Jesu ncaakabuzya mubuzyo wakuti, “Ino kayi baama mbaani, abalo bana bokwesu mbaani?”—Atubone.

Jesu wakali kuyiisya basikwiiya bakwe eelyo umwi naakamunjila mukanwa akumwaambila kuti: “Banyoko abana bokwanu bali anze  bayanda kwaambaula anduwe.” Aboobo Jesu wakabelesya ciindi eeco kuyiisya ciiyo ciyandika kapati kwiinda mukubuzya mubuzyo uulya uugambya wakuti: “Ino kayi baama mbaani, abalo bana bokwesu mbaani?” Wakatambika janza lyakwe kuli basikwiiya bakwe akwiingula mubuzyo ooyo cakupozomoka ategwa: “Tee kayi baama abana bokwesu mbaaba!”

Mpoonya Jesu wakapandulula ncaakali kwaamba naakati: “Kufumbwa ooyo uucita ziyanda Taata uuli kujulu, ngomukwesu, ngomucizi alimwi mbabaama.” (Mateyo 12:47-50, Ci) Eeci citondezya mbwaakali kubayanda kapati basikwiiya bakwe Jesu. Wakali kutuyiisya kuti basikwiiya bakwe bakali mbuli ibanyina, bacizyi alimwi abanyina bakumubili.

Aciindi eeco, ibanyina Jesu bakumubili ba Jakobo, Josefa, Simoni alimwi a Judase tiibakali kusyoma kuti Jesu wakali Mwanaa Leza. Tiibakazisyoma pe eezyo mungelo Gabriyeli nzyaakaambilide banyina. (Luka 1:30-33) Aboobo kulangilwa kuti tiibakali  kumweendelezya kabotu pe Jesu. Kufwumbwa muntu uucita zintu munzila iili boobo tali munyina naa mucizyi wini-wini. Sena kuli muntu ngozyi watali kumweendelezya kabotu imunyina naa mucizyi wakwe?—

Ibbaibbele lyaamba Esau a Jakobo ambuli Esau mbwaakanyema kapati cakuti wakati: “Ndiyoomujaya Jakobo.” Banyina ba Rebeka bakayoowa kapati cakuti bakapozya Jakobo kutegwa Esau atamujayi. (Matalikilo 27:41-46, BT) Pele nokwakainda myaka minji, Esau wakacinca mizeezo yakwe eelyo wakamuwida acamba akumumyonta Jakobo.—Matalikilo 33:4.

Muciindi, Jakobo wakazyala bana basankwa ibali 12. Pele ibana ba Jakobo bapati tiibakali kumuyanda pe imunyina musyoonto Josefa. Bakamufwida bbivwe akaambo kakuti wakali kuyandwa kapati abausyi. Aboobo bakamuuzya kubantu bakali kucita makwebo aakuuzya bazike ibakali kuunka ku Egepita. Mpoonya bakaambila bausyi kuti Josefa wakajayigwa amunyama wabutambo. (Matalikilo 37:23-36) Sena eeco tiicakali cintu cibi citaambiki?—

Kumbele ibanyina Josefa bakeempwa  kuli ceeco ncobakacita. Aboobo Josefa wakabalekelela. Sena wateelela Josefa mbwaakali mbuli Jesu?— Ibaapostolo ba Jesu bakamutija naakali mumapenzi, alimwi Petro mane wakamukaka nokuba buyo kumuzyiba. Nokuba boobo, mbubwenya mbuli Josefa, Jesu wakabalekelela boonse.

Mpoonya alimwi kuli banabunyina bobile ba Kaini a Abelo. Akuli mbabo tulakonzya kwiiya ciiyo cimwi. Leza wakabona mumoyo wa Kaini kuti kunyina naakali kumuyanda ncobeni imunyina. Aboobo Leza wakaambila Kaini kuti acince bukkale bwakwe. Ikuti Kaini naakali kumuyanda ncobeni Leza, naakamuswiilila. Pele tanaakali kumuyanda pe Leza. Bumwi buzuba Kaini wakaambila Abelo kuti: “Atweende musokwe.” Abelo wakaunka a Kaini. Nobakali musokwe, Kaini wakamuumputa imunyina akumujaya.—Matalikilo 4:2-8.

Ibbaibbele litwaambila kuti kuli ciiyo cilibedelede ncotunga twaiya kuli ceeco. Sena ulicizyi kuti nciiyo nzi?— ‘Aaya ngamakani ngomwakamvwa kuzwa kumatalikilo aakuti: Tuleelede kuyandana; ikutali mbuli Kaini iwakali mwana wamubi.’ Aboobo ibanyina abacizyi beelede kuyandana. Tabeelede kuba mbuli Kaini pe.—1 Johane 3:11, 12.

Ino nkaambo nzi ncotuteelede kuba mbuli Kaini?— Nkaambo Ibbaibbele lyaamba kuti ‘wakali mwana wamubi,’ Saatani Diabolosi. Mbwaanga Kaini wakacita zintu mbuli Diabolosi, cakali buyo mbuli kuti Diabolosi ngowakali wisi.

Sena waciteelela ncociyandika kapati kubayanda ibanyoko alimwi abacizyi?— Ikuti kotabayandi, ino unooiya bana bani?— Mbana ba Diabolosi. Toyandi kuba boobo, tee kayi?— Aboobo ino mbuti mbonga watondezya kuti uyanda kuba mwanaa Leza?— Nkwiinda mukubayanda ncobeni ibanyoko alimwi abacizyi.

Pele ino luyando ncinzi?— Luyando nkulimvwa kwamukati ikutupa kuyanda kucitila bantu bambi zintu zibotu izibagwasya. Tulatondezya kuti tulabayanda bantu eelyo notubalombozya alimwi aleelyo notubacitila zintu zibagwasya. Alimwi ino bakwesu alimwi abacizyi aabo  mbotweelede kuyanda mbaani?— Koyeeya kuti, Jesu wakayiisya kuti mbakwesu boonse Banakristo.

Ino ciyandika kapati buti kuti tubayande aaba bakwesu abacizyi Banakristo?— Ibbaibbele lyaamba kuti: “Oyo uutayandi mweenzinyina [imunyina naa mucizyi] ngwabwene takonzyi kuyanda Leza ngwatabwene.” (1 Johane 4:20) Aboobo tatukonzyi kuyanda buyo bantu basyoonto mubukwesu bwa Bunakristo. Tweelede kubayanda boonse. Jesu wakati: “Kuli ceeci bantu boonse bayoomuziba, kuti muli basikwiiya bangu, mwanooyandana umwi amweenzinyina.” (Johane 13:35) Sena ulabayanda ibanyoko abacizyi Banakristo boonse?— Koyeeya kuti, ikuti kotabayandi bakwesu, tokonzyi kunoomuyanda ncobeni Leza.

Ino inga twatondezya buti kuti tulabayanda ncobeni ibakwesu abacizyi?— Ikuti katubayanda, tatukabatantamuki pe akaambo buyo kakuti tatuyandi kubandika ambabo. Tunooli balongwe kuli boonse. Lyoonse tunoobacitila zintu zibotu, izibagwasya alimwi tunoolibambilide kwaabana ambabo. Alimwi ikuti naa kabali mumapenzi, tuyoobagwasya akaambo kakuti mubwini tuli mukwasyi mupati.

Ino citondezya nzi eelyo notubayanda ncobeni ibakwesu abacizyi boonse?— Citondezya kuti tuli basikwiiya ba Jesu, Imwiiyi Mupati. Alimwi oobo mbotuyanda kuba, tee kayi?—

Alimwi ikutondezya luyando kubakwesu alimwi abacizyi kulabandikwa ku Ba-Galatiya 6:10 alimwi akuli 1 Johane 4:8, 21. Kojalula Bbaibbele lyako akulibalila zibalo eezyo.

[Cifwanikiso icili apeeji 223]

Ino Jesu wakaamba kuti ibanabokwabo bakali bani?

[Cifwanikiso icili apeeji 224]

Ino nciiyo nzi ncotunga twaiya kuli ceeco Kaini ncaakacita kuli Abelo?

[Cifwanikiso icili apeeji 226]

Mbuti mbonga watondezya kuti ulamuyanda imunyoko?