Cibalo 18

Jehova Wasyomezya Kupa Daniele Bulumbu Butaliboteli

1, 2. (a) Nciimo nzi ciyandika kapati ncayelede kubaancico sikuzuza ikutegwa azwidilile? (b) Ino mwaapostolo Paulo wakabukozyanisya buti ibuumi bwakusyomeka mumulimo wa Jehova amuzundano wakuzuza?

SIKUZUZA uyanda kusika ambaakani iitondezya kuti wamanizya muzundano. Wakatala kapati pele akaambo kakuti waibona mbaakani yakwe, wasolekesya anguzu zyakwe zyoonse kuzuza ntaamu zisyoonto ezyo zyamamanino. Ikwiinda mukusolekesya kapati, wakakosola keengo! Ibusyu bwakwe bwatondezya kukkomana akuti wazwidilila. Ikuliyumya kusikila kumamanino kwapa kuti azwidilile.

² Kumamanino aa Daniele caandaano ca 12, tujana musinsimi uuyandwa katandila kumbaakani ‘yamuzundano’ wakwe—ibuumi bwakubelekela Jehova. Naakamana kwaamba zikozyanyo zyaandeene-andeene zyalusyomo akati kababelesi ba Jehova bakuciindi kabutana talika Bunakristo, imwaapostolo Paulo wakalemba kuti: “Eno buya swebo mbotuzingul[u]kidwe makamu makamu aya aabakamboni, atuzisowe zyoonse zitucelezya azibi zyoonse zitulamatila, tu[liyumye mu]kusiana nkotwabikilwa kunembo. Katuduneme kuli-Jesu musolozi uulomya lusyomo lwesu, ikuti walo, nkaambo kalukondo ndwaakabikilwa kunembo, wakazyandamana kuci[samu cakupenzezya, NW], wakaubaula buusu, eno sunu ulikede kululyo lwacuuno ca-Leza.”—Ba-Hebrayo 12:1, 2.

3. (a) Ncinzi cakakulwaizya Daniele kuti ‘aliyumye mukusiyana’? (b) Nzintu nzi zyotatwe zipati-pati imungelo wa Jehova nzyaakaambila Daniele?

³ Daniele wakali akati ‘kamakamu-makamu aayo aabakamboni.’ Cakutadooneka wakali umwi wabaabo ‘bakaliyumya  mukusiyana’ elyo luyando ndwaakajisi kuli Leza ndolwakamukulwaizya kucita boobo. Nzinji nzyaakayubulwide Jehova kuli Daniele kujatikizya cakali kulangilwa kucitika kubweendelezi bwamunyika pele lino wakamukulwaizya munzila eyi: “Webo koya buyo mane mamanino asike; uuyootanguna kulyokezya, elyo uyooima kubusena mbobambilidwe kumamanino aaciindi.” (Daniele 12:13) Imungelo wa Jehova wakali kwaambila Daniele zintu zipati-pati zyotatwe: (1) ikuti Daniele weelede ‘kuunka mane mamanino asike’ (2) ikuti ‘uyoolyookezya’ alimwi (3) akuti “uyooima” alimwi kumamanino aaciindi. Ino majwi aya inga abakulwaizya buti Banakristo sunu kuti baliyumye kusika kumbaakani mumuzundano wabuumi?

“KOYA BUYO MANE MAMANINO ASIKE”

4. Ncinzi ncaakali kwaamba mungelo naakati “koya buyo mane mamanino asike,” alimwi nkaambo nzi eco ncocakaletela buyumuyumu kuli Daniele?

⁴ Ino ncinzi ncaakali kwaamba mungelo naakaambila Daniele kuti: “Webo koya mane mamanino asike”? Mamanino aanzi? Mbwaanga Daniele wakali kutandila kumyaka yakuzyalwa iili 100, kuboneka kuti wakali kwaamba mamanino aabuumi bwakwe alo aakali afwaafwi kapati. * Imungelo wakali kukulwaizya Daniele kuti aliyumye cakusyomeka kusikila kulufwu. Pele tiicakali cintu cuuba-uba kucita boobu. Daniele wakalibonena kuzundwa kwa Babuloni alimwi akupilukila kwabaange ku Juda aku Jerusalemu. Ceelede kuti cakamukomanisya kapati eco musinsimi oyu uucembeede. Nokuba boobo kwiina citondezya kuti wakasangana mulweendo olo. Weelede kuti wakalicembeede kapati kuciindi eco alimwi tanaakajisi nguzu. Naa ambweni kwakali kuyanda kwa Jehova kuti azumanane kukkala mu Babuloni. Nokuba boobo, muntu ulakonzya kulibuzya kuti naa Daniele wakanyomenena mbwaanga basaanyina bakapilukila ku Juda.

5. Ncinzi citondezya kuti Daniele wakaliyumya kusikila kumamanino?

 ⁵ Icakutadooneka, Daniele wakayumizigwa kapati kukaambo nkaakaamba mungelo munzila yaluzyalo ategwa: “Koya buyo mane mamanino asike.” Eci cituyeekezya majwi ngaakaamba Jesu Kristo nokwakainda myaanda yamyaka iili cisambomwi aakuti: “Oyo uuliyumya kusikila kumamanino uzoofutuka.” (Matayo 24:13) Eco ncaakacita Daniele. Wakaliyumya kusikila kumamanino, wakazuzaana cakusyomeka mumuzundano wabuumi mane wamanizya. Aka kalakonzya kuba nkakaambo ncalumbaizigwa mumabbuku aambi mu Jwi lya Leza. (Ba-Hebrayo 11:32, 33) Ino ncinzi cakamugwasya Daniele kuti aliyumye kusikila kumamanino? Imakani aajatikizya buumi bwakwe alatugwasya kujana bwiinguzi.

IKULIYUMYA KALI SIKWIIYA WA JWI LYA LEZA

6. Ino tuzi buti kuti Daniele wakali sikwiiya Jwi lya Leza musungu?

⁶ Acimbi cakali kuyandika kutegwa Daniele aliyumye kusikila kumamanino, nkuzumanana kwiiya alimwi akuyeeyesya zisyomezyo zya Leza zikondelezya. Tulizi kwaamba kuti Daniele wakali musungu kwiiya Jwi lya Leza. Buyo-buyo ino naakaciziba buti cisyomezyo ca Jehova kuli Jeremiya cakuti ibuzike bwakali kuyootola myaka iili 70? Daniele lwakwe wakalemba kuti: “Mebo . . . ndakamvwa makani aamumabuku. Ndakamvwa mweelwe wamyaka.” (Daniele 9:2; Jeremiya 25:11, 12) Icakutadooneka, Daniele wakayandaula mabbuku aa Jwi lya Leza aakaliko kuciindi eco. Imalembe aa Musa, Davida, Solomoni, Isaya, Jeremiya, Ezekieli—kufwumbwa ngaakali kukonzya kujana—wakajana ciindi cakwaabala Daniele cakukkomana alimwi akwaayeeyesya cakuzinzibala.

7. Ikuti tweezyanisya ciindi cesu aciindi ca Daniele, ncoolwe nzi ncotujisi swebo kumakani aakwiiya Jwi lya Leza?

⁷ Ikubala Jwi lya Leza akuliyeeyesya kulayandika kapati kutegwa tube bantu baliyumya sunu. (Ba-Roma 15:4-6; 1 Timoteo 4:15) Alimwi tulijisi Bbaibbele lyoonse mbolizulwa lyalo libikkilizya makani aabusinsimi bwa Daniele bumwi ibwakazuzikizigwa mumyaanda iili mbwiibede yakatobela. Kunze  lyaboobo tulilongezyedwe kuti tupona “kumamanino aaciindi” icakasinsimwa kuli Daniele 12:4. Kuciindi cesu cino, ibananike balongezyegwaa busongo bwakumuuya, balabekema mbuli mimuni yakasimpe munyika eyi iili mumudima. Aboobo ibusinsimi bunji butamvwugwi kabotu ibuli mubbuku lya Daniele, bumwi bwaboobo ibwakali kumugambya bulatujatikizya kapati swebo sunu. Aboobo atuzumanane kubala Jwi lya Leza abuzuba, tutaubyi-ubyi zintu ezi. Eci cilatugwasya kuti tuliyumye.

DANIELE WAKALI KUKOMBA LYOONSE

8. Ncikozyanyo nzi ncaakatupa Daniele kumakani aakukomba?

⁸ Akwalo kukomba kwakamugwasya kapati Daniele kuti aliyumye kusika kumamanino. Wakali kukomba Jehova Leza lyoonse alimwi wakali kwaambaula anguwe calusyomo kapati. Wakamuzi kuti Jehova ‘nguuswiilila zikombyo.’ (Intembauzyo 65:2; amweezyanisye Ba-Hebrayo 11:6.) Naakausa kapati Daniele akaambo kakuzanga kwabana Israyeli, wakakomba kuli Jehova camoyo woonse. (Daniele 9:4-19) Nociba ciindi Dariyo naakabikka mulawo wakuti alikke buyo nguunookombwa kwamazuba aali 30, Daniele tanaakaleka kukomba Jehova Leza. (Daniele 6:10) Sena tacitunjili mumoyo notweezyeezya mudaala oyu uusyomeka kalyaaba kuwaalilwa mumulindi wabasyuumbwa muciindi cakusowa coolwe citaliboteli icakukomba? Takudoonekwi pe kuti Daniele wakasika kumamanino aabuumi bwakwe kakomba camoyo woonse buzuba abuzuba kuli Jehova.

9. Nkaambo nzi ncotutayelede kulanga coolwe cakukomba kuti ncilengwa buyo?

⁹ Ikukomba ncintu cuuba-uba. Tulakonzya kukomba kufwumbwa ciindi, kufwumbwa nkotubede, icakupozya naa cakaumuumu. Nokuba boobo, tatweelede kucuubya-bya coolwe eci pe. Mu Bbaibbele ibbala lyakukomba lilaamboliswaangene akuliyumya, ikuzumanana alimwi akulangila munzila yakumuuya. (Luka 18:1, Ba-Roma 12:12, Ba-Efeso 6:18; Ba-Kolose 4:2) Sena tacitukkomanisyi kuti tulakonzya kukanana kufwumbwa ciindi amuntu wiinda kukomena kujulu aansi? Alimwi ulatuswiilila! Amuyeeye ciindi Daniele naakakomba mpoonya Jehova waingula kwiinda mukutuma mungelo. Imungelo wakasika naakacili  kukomba Daniele! (Daniele 9:20, 21) Ecino ciindi ncotukkede tacili ciindi cakuswaigwaa bangelo, pele Jehova kwiina naacinca pe. (Malaki 3:6) Ulaiteelela mipailo yesu mbubonya mbwaakateelela mipailo ya Daniele. Alimwi twanookomba tulaswenenena kuli Jehova akubaa cilongwe iciyootugwasya kuliyumya kusikila kumamanino mbuli bwakacita Daniele.

IKULIYUMYA KALI MWIIYI WA JWI LYA LEZA

10. Nkaambo nzi ncocakali cintu cipati kuli Daniele ikuyiisya kasimpe ka Jwi lya Leza?

¹⁰ Daniele wakeelede ‘kuunka mane kumamanino’ munzila imwi. Wakeelede kuliyumya kali mwiiyi wakasimpe. Kwiina naakaluba pe kuti wakali akati kabantu basale balo ibaambwaa Magwalo kuti: “Ndinywe bakamboni bangu, mbwaamba Jehova, alakwe mulanda wangu ngundisalide ngukamboni.” (Isaya 43:10) Daniele wakasolekesya mbuli mbwakonzya kutegwa azuzikizye mulimo oyo. Ambweni mulimo wakwe wakali kubikkilizya kuyiisya bantu bakwe balo bakali mubuzike mu Babuloni. Tatwaazi kapati makani aajatikizya mbwaakali kuyanzana aba Judanyina kunze lyabaabo botatwe ibaambwa kuti ‘mbeenzinyina’—ba Hananiya, Misayeli alimwi a Azariya. (Daniele 1:7; 2:13, 17, 18) Icilongwe cabo ciyumu cakagwasya kapati kuti umwi aumwi wabo aliyumye. (Tusimpi 17:17) Akaambo kakuti Daniele wakapegwa busongo bulibedelede kuli Jehova, wakalijisi luzibo lunji lwakuyiisya beenzinyina. (Daniele 1:17) Pele kuli aumbi mulimo wakuyiisya ngwaakajisi.

11. (a) Ncintu nzi cakalibedelede mumulimo wa Daniele? (b) Ino wakali musungu buti Daniele mukucita mulimo wakwe oyu uulibeledelede?

¹¹ Daniele wakajisi mulimo wakukambaukila nkumekume Zyamasi ikwiinda bwakacita musinsimi umbi uli woonse. Nokuba kuti kanjikanji wakali kutola milumbe mibyaabi kubasololi aba, kwiina naakali kubalanga mbuli kuti nzisesemyo naa mbuli kuti ulabainda bulemu. Wakali kukanana munzila yabulemu alimwi yabusongo kulimbabo. Kwakali bamwi—mbuli beendelezi bazisi basimunyono—balo bakali kuyanda kujaya Daniele. Pele nkumekume zimwi zyakali kumulemeka kapati.  Akaambo kakuti Jehova wakagwasilizya Daniele kuti apandulule maseseke alo aakali kugambya bami abaalumi basongo, oyu musinsimi wakasumpulwa kapati. (Daniele 2:47, 48; 5:29) Pele akaambo kakuti wakali kuyaabucembala, tanaakacijisi nguzu mbuli nzyaakajisi kubukubusi. Pele wakasika kumamanino abuumi bwakwe cakusyomeka kasola kujana nzila iili yoonse yakubeleka kali kamboni wa Leza uuyandwa.

12. (a) Milimo nzi yakuyiisya njotucita sunu to Banakristo? (b) Mbuti mbotunga twatobela lulayo lwa Paulo lwakuti “amucenjele kuti ibe yabusongo inzila njimweenda abaabo batali basimbungano ba-Kristo”?

¹² Sunu mumbungano ya Bunakristo tulakonzya kujana beenzuma ibasyomeka ibayootugwasya kuti tuliyumye mbubwenya mbuli Daniele abeenzinyina mbubakagwasyanya. Alimwi tulaiisyanya ‘akuyumizyanya.’ (Ba-Roma 1:11, 12) Tulijisi mulimo wakukambaukila batasyomi mbubwenya bwakacita Daniele. (Matayo 24:14; 28:19, 20) Aboobo tweelede kusumpula nzila zyesu zyakuyiisya kutegwa ‘katupandulula makani aalusinizyo mbukweelede’ notwaambaula abantu makani aajatikizya Jehova. (2 Timoteo 2:15) Alimwi ciyoogwasya kuti naa twatobela lulayo lwamwaapostolo Paulo lwakuti: “Amucenjele kuti ibe yabusongo inzila njimweenda abaabo batali basimbungano ba-Kristo.” (Ba-Kolose 4:5) Ibusongo buli boobu bubikkilizya kubalanga munzila iiluzi ibantu batali basyomima. Tatubanyansyi pe bantu bali boobu akulilanga mbuli kuti swebo tulisumpukide kwiinda mbabo. (1 Petro 3:15) Pele tweelede kubakulwaizya kuti bayande kasimpe, tulabelesya Jwi lya Leza cabusongo ikutegwa makani eesu abanjile. Tulakondwa kaka notuzwidilila kukulwaizya bamwi! Ikukondwa kuli boobu kulatugwasya kuliyumya kusikila kumamanino mbubwenya bwakacita Daniele.

‘UUYOOTAANGUNA KULYOOKEZYA’

13, 14. Nkaambo nzi ncolwakali kuyoosya lufwu kubana Babuloni banji, alimwi ino ciimo ca Daniele cakaimpene buti?

¹³ Mpoonya mungelo wakasyomezya Daniele kuti: “Uuyootanguna kulyokezya.” (Daniele 12:13) Ino majwi ayo akali kwaamba nzi? Daniele wakalizi kuti lufwu lwakwe lwakali afwaafwi kapati. Ilufwu ncecintu citakwe mboceelebwa abantu boonse  kuzwa kuciindi ca Adamu kusikila sunu. Aboobo, Ibbaibbele lyaamba lufwu kuti ‘ngusinkondoma.’ (1 Ba-Korinto 15:26) Nokuba boobo, Daniele wakali kuluteelela munzila yaandeene kapati ambubakaluzi bana Babuloni bakamuzingulukide. Ilufwu cakali cintu ciyoosya kubantu aabo ibakabbide buya mubukombi bunyongene bwabaleza bakubeja ibatandila ku 4,000. Bakali kusyoma kuti ibantu bafwa, abo bakali kupona cabupenzi-penzi naa ibakajaigwa buya bakali kuba zyeelo zyalo zyakali kupenzya bantu bapona. Alimwi bana Babuloni bakali kusyoma kuti kuli nyika yabafwide iiyoosya yalo yakazwide nziinga basyaamankwamu zigalangene iziboneka mbuli bantu abanyama.

¹⁴ Walo Daniele tanaakali kuluteelela boobo lufwu pe. Kakucili myaanda yamyaka iili mbwiibede katanazyalwa Daniele, Imwami Solomoni wakasololelwa amuuya wa Leza ikwaamba kuti: “Bafwide tabezi cintu niciba comwe.” (Mukambausi 9:5) Alimwi ikujatikizya muntu uufwide sintembauzyo wakaimba kuti: “Muuya wakwe wazwa, ulabweeda kubulongo; mubuzuba obo mbubonya makanze aakwe oonse alamana.” (Intembauzyo 146:4) Aboobo Daniele wakalizi kuti imajwi aakamwaambila mungelo akali kulangilwa kuzuzikizigwa. Ikufwa kwakali kulyookezya. Kunyina mizeezo, kunyina kulizinza, kunyina kupenzyegwa—alimwi kunyina basyaamankwamu. Awalo Jesu Kristo mbwaakapandulula naakafwa Lazaro. Wakati: “Mulongweesu Lazaro uloona.”—Johane 11:11.

15. Ino buzuba bwakufwa inga bwabota buti kwiinda buzuba bwakuzyalwa?

¹⁵ Amulange akambi kaambo ncokwatakali kumuyoosezya kufwa Daniele. Ijwi lya Leza lyaamba kuti: “Izina ibotu ndibotu kwiinda muunde, abuzuba bwakufwa mbubotu kwiinda buzuba bwakuzyalwa.” (Mukambausi 7:1) Ino buzuba bwakufwa, ibwadilwe inga bwabota buti kwiinda buzuba bwakuzyalwa ibwakusekelela? Aawa cintu cipati ndi “zina.” “Muunde” ulakonzya kaudula kapati. Cimwi ciindi, Mariya imucizi wa Lazaro wakananikide Jesu kumaulu amafwuta aanunkilila alo aakali kuulwa mali aavwolwa mwaka oonse! (Johane 12:1-7) Ino zina lyalo inga lyayandika buti boobu? Kubbuku lya Mukambausi 7:1 mu Bbaibbele lya Septuagint lya Cigiliki lyaamba kuti “izina  libotu.” Talili zina buyo lilaampindu pele nciceeco ncoliiminina. Imuntu azyalwa, tajisi mpuwo, kwiina mulimo mubotu ngwacitide, kwiina ziimo zibotu zilombozyegwa mulinguwe. Pele afwa, izina lipandulula zintu zyoonse ezi. Alimwi ikuti kalili zina bbotu kuli Leza, lilayandika kwiinda lubono luli loonse.

16. (a) Ino Daniele wakasolekesya buti kubaa mpuwo mbotu kuli Leza? (b) Nkaambo nzi Daniele ncaakali kulangilwa kulyookezya kajisi lusyomo lunji lwakuti wakazwidilila ikubaa mpuwo mbotu kuli Jehova?

¹⁶ Daniele wakasolekesya kubaampuwo mbotu kuli Leza mubuumi bwakwe boonse elyo Jehova kwiina naakaluba pe. Wakali kumulangilila Daniele akulingula moyo wakwe. Mbweenya obo mbwaakacitide Leza aku Mwami Davida walo wakaimba kuti: “O Jehova, ulandilingula, ulindizi. Ulizi kukala kwangu akubuka kwangu, ulibwene miyeeyo yangu noli kule.” (Intembauzyo 139:1, 2) Masimpe Daniele tanaakalondokede pe. Wakali waluzubo lwa Adamu sizibi alimwi wakali mumusyobo wabasikubisya. (Ba-Roma 3:23) Pele Daniele wakeempwa zibi zyakwe elyo wakazumanana kweendaa Leza wakwe munzila iiluzi. Aboobo, imusinsimi uusyomeka wakali kusyoma kuti Jehova uyoomulekelela zibi zyakwe alimwi kwiina nayoomubikkilila. (Intembauzyo 103:10-14; Isaya 1:18) Jehova ulalisalila kuti ayeeye milimo mibotu yababelesi bakwe basyomeka. (Ba-Hebrayo 6:10) Aboobo kwaziindi zyobile, imungelo wa Jehova wakaita Daniele kuti “muntu uuyandwa loko.” (Daniele 10:11, 19) Eci cakali kutondezya kuti Daniele wakali kuyandwa kapati kuli Leza. Daniele wakali kunoolyookezya kakkomene akaambo kakuziba kuti wakali aampuwo mbotu kuli Jehova.

17. Nkaambo nzi ncociyandikila kapati sunu ikubaa mpuwo mbotu kuli Jehova?

¹⁷ Umwi aumwi wesu ulakonzya kulibuzya kuti, ‘Sena ndilaa mpuwo mbotu kuli Jehova’? Tukkede muziindi zikatazya. Takuli kukonga buya pe, pele masimpe kuti lufwu lulakonzya kutusikila kufwumbwa ciindi. (Mukambausi 9:11) Aboobo cilayandika kapati kuti umwi aumwi wesu akanze kubaa mpuwo mbotu kuli Leza lino cakutasowa ciindi. Ikuti twacita boobo, tatweelede kuluyoowa lufwu. Nkulyookezya buyo—mbuli koona.  Alimwi mbubwenya mbuli mbokubukwa muŋonzi, amulufwu kuli kubuka!

“UYOOIMA”

18, 19. (a) Ino ncinzi ncaakali kwaamba mungelo naakasinsima kuti kumazuba aakumbele Daniele “uyooima”? (b) Nkaambo nzi ncotukonzya kwaamba kuti Daniele wakalibuzyi bulangizi bwabubuke?

¹⁸ Ibbuku lya Daniele limanaa cisyomezyo cimwi cibotu kapati ncataningaambide Leza kumuntu uuli woonse. Imungelo wa Jehova wakaambila Daniele kuti: “Uyooima kubusena mbobambilidwe kumamanino aaciindi.” Ino ncinzi ncaakali kwaamba mungelo? Mbwaanga “kulyokezya” nkwaakazwaa kwaamba kwakali kujatikizya lufwu, icisyomezyo cakuti Daniele “uyooima” cilakonzya kwaamba buyo cintu comwe—ibubuke! * Mane bahaabupampu bamwi baamba kuti ibbuku lya Daniele caandaano ca 12 ndelijisi majwi aakusaanguna aagaminina kwaamba bubuke akati ka Magwalo oonse aa Cihebrayo. (Daniele 12:2) Pele tabaluzi pe kwaamba boobu. Daniele wakalizi kabotu-kabotu kuti kuyooba bubuke.

¹⁹ Mucikozyanyo, Daniele wakalaazi majwi aya ngaakalembede Isaya myaanda yamyaka yobile yakaindide aakuti: “Bafu bako bayoopona, mitunta yangu iyoobuka. Amubuke, mwiimbe, inywe nobakede mubulongo, nkaambo . . . nyika iyoobusya ba[fu] bayo.” (Isaya 26:19) Kazitanacitika zyoonse ezyo, Jehova wakapa Eliya a Elisha inguzu zyakubusya bantu. (1 Bami 17:17-24; 2 Bami 4:32-37) Alimwi kazitana citika ezyo, Hana, banyina Samuele musinsimi bakali kusyoma kuti Jehova ulakonzya kubusya bantu kuzwa kukabanda naa cuumbwe. (1 Samuele 2:6) Alimwi musyule kapati, imusyomesi Jobu wakatondezya lusyomo lwakwe mumajwi aya aakuti: “Kuti naa muntu wafwa, sena uyoopona alimwi? Mumazuba oonse aamulimo wangu noolindilila mane kusikila nkaangununwe. Waakundiita, njooingula, uyoondiyandisisya ndemulengwa wako.”—Jobo 14:14, 15 BT.

20, 21. (a) Mbubuke buli mbwalangila kuya kubaa mbubo Daniele? (b) Ino muunzila nzi mobulangilwa kuyoocitwa bubuke mu Paradaiso?

 ²⁰ Daniele wakalijisi kaambo kakubedaa lusyomo kuti Jehova wakali kuyooyandisisya kumubusya kumbele aamazuba mbubwenya mbwaakali kusyoma Jobu. Pele cakali cintu cuumbulizya kapati ikumvwa cilenge camuuya icanguzu kacisinizya bulangizi obo. Ee, Daniele uyooima “kukubuka kwabaluleme” ikuyoocitika mu Myaka iili Cuulu ya Bulelo bwa Kristo. (Luka 14:14) Ino eco ciyoomujatikizya buti Daniele? Ijwi lya Leza lilatwaambila makani manji kujatikizya ncico.

²¹ Jehova “tali Leza walupilingano pe, ngwaluumuno.” (1 Ba-Korinto 14:33) Aboobo, cilalibonya kuti ibubuke mu Paradaiso buyoocitwa munzila yaluumuno. Ambweni kunooindide ciindi kuzwa lyankondo ya Amagedoni. (Ciyubunuzyo 16:14, 16) Imikondo yoonse yabweende bwazintu bwakale tiicinoolibonyi, alimwi bubambe bunoocitidwe bwakutambula bantu bayoobusigwa. Ikujatikizya mbobayoobusigwa bafwide, Ibbaibbele lilatwaambila mbociyooba ategwa: “Umwi aumwi kuciindi cakwe ceelede.” (1 Ba-Korinto 15:23) Kuboneka kuti caakusika ‘kukubusigwa kwabaluleme abataluleme,’ ibaluleme bayoosaanguna kubusigwa. (Incito 24:15) Munzila eyo, ibaalumi basyomeka bansiku mbuli Daniele bayoogwasilizya mubweendelezi bwazintu anyika kubikkilizya akuyiisya zyuulu-zyuulu ‘zyabataluleme’ ibayoobusigwa.—Intembauzyo 45:16.

22. Mibuzyo nzi imwi njalangilwa kuyooyanda bwiinguzi Daniele?

²² Cakutadooneka, Daniele unoojisi mibuzyo imwi katanalibambila kuyumuna mikuli iili boobu. Kayi ikujatikizya businsimi bumwi bukatazya mbwaakapegwa, wakati: “Ndakamvwa, pele nsikwe nendakamvwisya pe.” (Daniele 12:8) Uyookondwa kaka ikumvwisya maseseke aya aazwa kuli Leza! Uyooyandisya kuziba zintu zijatikizya Mesiya. Daniele uyookkomana kuziba makani aajatikizya bweende bwazisi zyeendelezya nyika kuzwa kuciindi cakwe mane kusikila kuciindi cesu cino, aajatikizya “basalali ba-Sijulu”—ibasyomeka balo bakaliyumya nobapenzyegwa “kumamanino aaciindi”—alimwi aajatikizya kunyonyoonwa kwamamanino kwabweendelezi bwabantunsi kwiinda mu Bwami bwa Leza bwabu Mesiya.—Daniele 2:44; 7:22; 12:4.

 NZYABAMBILIDWE DANIELE MU PARADAISO—ANDINYWE LWANU!

23, 24. (a) Ino nyika mwayoobusilwa Daniele inooindene buti anyika mwaakabede? (b) Sena Daniele kuli busena mbwabambilidwe mu Paradaiso, ino tuzi buti?

²³ Daniele uyooyandisisya kuziba nyika eyo mwanoobede—inyika yaandeene kapati kuliyeeyo njaakali kupona kuciindi cakwe. Inkondo zyoonse alimwi akudyaamininwa izyakali kusofwaazya nyika mwaakabede zinooli zyamana. Kunoonyina kuusa, kunoonyina kuciswa, kunoonyina lufwu. (Isaya 25:8; 33:24) Pele kunooli maunda-maunda aazyakulya, imaanda manji alimwi amulimo uukkomanisya kuli boonse. (Intembauzyo 72: 16; Isaya 65:21, 22) Ibantu bayooba mukwasyi omwe uukamantene alimwi uuzwide lukkomano.

²⁴ Masimpe Daniele uyootola lubazu munyika eyo. Imungelo wakamwaambila kuti: “Uyooima kubusena mbobambilidwe kumamanino aaciindi.” Ibbala lya Cihebrayo ilyakasandululwa kuti “mbobambilidwe” lilakozyanya alibelesyegwa kwaamba zibeela zini zyanyika. * Daniele ulakonzya wakalibuzi businsimi bwa Ezekieli ibujatikizya kwaabanya nyika yakapilusigwa ya Israyeli. (Ezekieli 47:13–48:35) Ino businsimi bwa Ezekieli bwaamba nzi kujatikizya kuzuzikizigwa kwa Paradaiso? Bwaamba kuti bantu ba Leza boonse bayoobaa busena mu Paradiaso noiba nyika iyooabanizigwa kabotu. Aino, ncabambilidwe Daniele mu Paradaiso tacikajatikizyi buyo nyika. Ciyoojatikizya amulimo ngwanoojisi mumakanze aa Leza. Ibulumbu mbwasyomezyedwe Daniele bulibambidwe.

25. (a) Mbulangizi nzi bwabuumi bwamu Paradaiso ibumukkomanisya nywebo? (b) Nkaambo nzi ncokunga kwaambilwa kuti ibantu beelede kukkala mu Paradaiso?

²⁵ Ino mbuti kujatikizya ncomubikkilidwe nywebo? Izisyomezyo nzizyonya zilakonzya kubeleka akulindinywe. Jehova  uyanda kuti bantu bamuteelela ‘bakaime,’ kuti bakabe abusena mbobabikkilidwe mu Paradaiso. Amuyeeye buyo! Masimpe ciyooba cintu cikondelezya ikubona Daniele antoomwe abaalumi abanakazi bamwi basyomeka bakuciindi ca Bbaibbele. Mpoonya kunooli abantu bamwi batabaliki ibayoobusigwa balo bayandika kuyiisigwa kutegwa bamuzibe Jehova Leza akumuyanda. Amweezeezye kuti mulanganya nyika yesu akugwasya kuti ibe paradaiso iijisi zintu zinji zyaandeene-andeene izibotu alimwi izitamani. Amuyeeye kuyiisigwaa Jehova, ikwiiya kupona munzila njaakakanzide kuti bantu kabapona. (Isaya 11:9; Johane 6:45) Ee, mulibambilidwe busena mu Paradaiso. Nokuba kuti ncintu cigambya kubantu bamwi ikumvwa makani aa Paradaiso sunu, amuyeeye kuti kuzwa kumatalikilo, Jehova wakalenga bantu kuti kabakkala mubusena buli boobu. (Matalikilo 2:7-9) Munzila eyo, Paradaiso mbobusena bwakukkala bwatuulunzuma twabantu banooli anyika. Mpampawo mpobeelede kukkala. Ikujana Paradaiso cinooli mbuli kuunka kumunzi nkomuzwa.

26. Ino Jehova uzuminizya buti kuti ikulindila mamanino aabweende obu tacili cintu cuuba-uba kulindiswe?

²⁶ Tulalumba kapati twaziyeeya zintu zyoonse ezi, embo  na? Sena nywebo tamulombozyi kuya kujanika muparadaiso? Anu Bakamboni ba Jehova ncobayandila kuziba nobuyoomana bweende obu bwazintu! Tacili cuuba-uba pe kulindila. Awalo Jehova ulizi kuti cilakatazya nkaambo ulatukulwaizya kuti ‘tulindile’ mamanino ‘nokuba kuti amuke.’ Awa upandulula kuti cilakonzya kuboneka kuti camuka kweelana ambotuzilanga zintu swebo nkaambo mulugwalo ndulonya tulasyomezyegwa kuti: “Tacikooyoocedelelwa pe.” (Habakuku 2:3; amweezyanisye Tusimpi 13:12.) Ee imamanino ayooboola aciindi ceelede.

27. Ncinzi ncomweelede kucita kutegwa mukaime kumbele lya Leza kukabe kutamani?

²⁷ Ncinzi ncomweelede kucita mamanino mbwaasika afwaafwi? Amuliyumye cakusyomeka mbubonya mbwaakacita musinimi wa Jehova uuyandwa, Daniele. Amwiiye Jwi lya Leza cabusungu. Amukombe lyoonse. Amuyanzane caluyando lyoonse abasyominyoko. Amubayiisye kasimpe bambi cabusungu. Mbwaayaabuswena mamanino aabweende bwazintu obu bubyaabi buzuba abuzuba, amuzumanane kuba babelesi basyomeka ba Sijulu wamajulu alimwi akuba basikutobela Jwi lyakwe beni-beni. Amusolekesye kubikkila maanu kubusinsimi bwa Daniele! Alimwi Mwami Mupati, Jehova amupe coolwe cakwiima kumbele lyakwe cakukondwa kusikila kutamani!

Bupanduluzi buyungizidwe

NCINZI NCOMWAIYA?

• Ncinzi cakagwasya Daniele kuti aliyumye kusika kumamanino?

• Nkaambo nzi lufwu ncolwatakali cintu ciyoosya kuli Daniele?

• Ino cisyomezyo camungelo cakuti Daniele ‘uyooima kubusena mbwabambilidwe’ ciyoozuzikizigwa buti?

• Ino mbuti mbumwagwasigwa nywebo kumugama kwiinda mukubikkila maanu kubusinsimi bwa Daniele?

[[Mibuzyo yaciiyo]]

 [Cifwanikiso icili apeeji 307]

[Cifwanikiso icili apeeji 318]

Sena mulabikkila maanu ku jwi lya Leza lyabusinsimi mbuli Daniele?