IKAAMBO NCOCIYANDIKA: Mwiiyi wesu Mupati Jehova, ulatupa lwiiyo lwiinda kubota. Ulatuyiisya mbotukonzya kuba bantu bali kabotu alimwi akutugwasya kulibambila buumi butaliboteli kumbele, ulacita zyoonse eezyi kakunyina kutubbadelesya. (Is. 11:6-9; 30:20, 21; Ciy. 22:17) Kwiinda mulwiiyo oolu, Jehova alimwi ulatuyiisya mbotukonzya kwaambila bamwi mulumbe walufwutuko.—2Kor. 3:5.

MBOMUKONZYA KUCITA OOBO:

• Amube abube bwakulicesya alimwi akubomba moyo.—Int. 25:8, 9

• Amulutambule lwiiyo Jehova ndwamupa lino, mucikozyanyo kwiinda mukuzumina makani aabasicikolo aapegwa mumuswaangano wa Buumi Amulimo

• Amulibikkile mbaakani zyakumuuya.—Flp. 3:13

• Amuliimye zintu zimwi kutegwa mweelele kutambula lwiiyo luyungizyidwe.—Flp. 3:8

AMWEEBELELE KAVIDIYO KAKUTI BAKAGWASYIGWA KAPATI KWIINDA MUKUYIISYIGWA A JEHOVA, MPOONYA MWIINGULE MIBUZYO IITOBELA:

• Ino zisinkilizyo nzi nzyobakazunda basikumwaya bamwi kutegwa bacikonzye kuunka ku Cikolo Cabakambausi ba Bwami?

• Ino Cikolo Cabakambausi ba Bwami cigwasya buti?

• Ciindi aabo ibakanjila cikolo eeci nobasika kumulimo wabo mupya, ino mbuti basimbungano mbobabagwasya?

• Ino nzyeelelo nzi ziyandika kutegwa umwi ayelele kunjila Cikolo Cabakambausi ba Bwami? (kr 189)

• Ino nzikolo nzi zimbi nzyomukonzya kunjila mumbunga ya Jehova?