Matayo 14:1-36
14 Kuciindi eeco, Heroda mweendelezi wacilikiti* wakamvwa mpuwo ya Jesu,+
2 aboobo wakaambila babelesi bakwe kuti: “Ooyu ngu Johane Mubbapatizi. Wakabusyigwa kubafwu, alimwi nkakaambo kaako ncakonzya kucita milimo mipati eeyi.”+
3 Heroda* wakajata Johane akumwaanga akumubikka muntolongo akaambo ka Herodiya, imukaintu wa Filipo imunyina.+
4 Nkaambo Johane lyoonse wakali kumwaambila kuti: “Tacizumizyidwe pe kuti kali mukaintu wako.”+
5 Pele nokuba kuti wakali kuyanda kumujaya, wakali kuyoowa nkamu yabantu, nkaambo bakali kumubona kuti musinsimi.+
6 Pele nobakali kusekelela buzuba bwakuzyalwa kwa Heroda,+ mwana musimbi wa Herodiya wakabazyanina kabotu beenzu akumukkomanisya kapati Heroda+
7 cakuti wakamusyomezya kwiinda mukukonka kuti ulamupa kufwumbwa ncatiilombe.
8 Mpoonya walo mukutobela nzyobakamwaambila banyina wakati: “Amundipe lino aawa mutwe wa Johane Mubbapatizi mumutiba.”+
9 Nokuba kuti mwami wakausa, pele akaambo kakukonka kwakwe alimwi abeenzu mbaakali kulya limwi,* wakalailila kuti apegwe.
10 Aboobo wakatuma bantu ibakaunka kuyoomukosola mutwe Johane muntolongo.
11 Eelyo bakaleta mutwe wa Johane mumutiba akumupa musimbi, mpoonya wakautola kuli banyina.
12 Mpoonya basikwiiya bakwe bakaboola akubweza mubili akuuzikka; bamane bakaunka kuyakwaambila Jesu.
13 Naakamvwa boobu, Jesu wakatanta bwato akuzwa ooko, wakaunka kubusena bunyina bantu kutegwa abe alikke. Pele makamu aabantu naakamvwa boobo, akamutobela amaulu kuzwa muminzi.+
14 Lino naakasika kunkomwe, wakabona nkamu mpati yabantu, eelyo wakabeetelela+ akuponya balwazi babo.+
15 Pele nikwakaba kumangolezya, basikwiiya bakwe bakaboola kulinguwe akumwaambila kuti: “Okuno nkuusyokwe alimwi ciindi caunka kale; kobaambila bantu kuti bamwaikizyanye, kutegwa baunke muminzi bakalyuulile zyakulya.”+
16 Pele Jesu wakabaambila kuti: “Tabeelede kuunka pe; amubape zyakulya.”
17 Bakamwaambila kuti: “Taaku ncotujisi aano ccita buyo zinkwa zyosanwe answi zyobilo.”
18 Wakati: “Amundipe nzizyo.”
19 Mpoonya wakalailila makamu aabantu kuti bakkale abwizu. Kumane wakabweza zinkwa zyosanwe answi zyobilo, amane wakalanga kujulu akulumba Leza+ eelyo naakamana kukomauna zinkwa, wakapa basikwiiya, mpoonya basikwiiya bakapa makamu aabantu.
20 Aboobo boonse bakalya akukkuta, alimwi bakabwezelela bufwefwelenga bwakacaala, kwakazula zisuwo zili 12.+
21 Lino akati kabaabo bakali kulya kwakali baalumi batandila ku 5,000, ikutabalilizya abamakaintu abana basyoonto.+
22 Mpoonya kakunyina kusowa ciindi, wakaambila basikwiiya bakwe kuti batante mubwato basolole kuya mutala, walo naakacili kumwaya makamu aabantu.+
23 Lino naakamana kumwaya makamu aabantu, wakatanta acilundu alikke kuyoopaila.+ Masiku akamujana kooko kali alikke.
24 Lino bwato bwakali alamfwu kuzwa kunkomwe, kabuzungaanizyigwa canguzu amayuwe, nkaambo guwo lyakali kubbubbula kuletezya nkobakali kuya.
25 Pele nokwakaba kubucedo* wakaboola kulimbabo, keenda atala aamaanzi mulwizi.
26 Nobakamubona keenda atala aamaanzi mulwizi, basikwiiya bakanyongana kabati: “Ncilengaano!” Eelyo bakakwiila akaambo kakuyoowa.
27 Pele ndilyonya eelyo Jesu wakabaambila kuti: “Amukkazike myoyo! Ndime; mutayoowi pe.”+
28 Petro wakamwiingula kuti: “Mwami, ikuti naa nduwe ncobeni, kondaambila ndiboole kulinduwe kandeenda atala aamaanzi.”
29 Eelyo wakati: “Koboola!” Aboobo Petro wakazwa mubwato akweenda atala aamaanzi kuya kuli Jesu.
30 Pele naakabona guwo wakayoowa. Mpoonya naakatalika kubbila wakakwiila kuti: “Mwami, kondivwuna!”
31 Ndilyonya Jesu wakatandabika janza wamujata akumwaambila kuti: “Yebo osilusyomo luniini, nkaambo nzi ncoodooneka?”+
32 Eelyo nobakatanta mubwato, guwo lyakaleka.
33 Mpoonya aabo ibakali mubwato bakamufwugamina* akwaamba kuti: “Masimpe uli Mwana wa Leza.”
34 Mpoonya bakazabukila ku Genesarete.+
35 Mbobakamuzyiba buyo, bantu bakubusena oobo bakatuma mulomo kumasena oonse aakeengelede, eelyo bantu bakamuletela bantu boonse ibakali kuciswa.
36 Mpoonya bakamukombelezya kuti bajate buyo maaya aacisani cakwe caatala,+ eelyo boonse ibakaajata bakaponenena.
Bupanduluzi buyungizyidwe
^ Mu Chigiriki, “wacibeela comwe cazibeela zyone zyacooko.”
^ Nkokuti, Heroda Antipa. Amubone Bupanduluzi Bwamabala.
^ Naa “mbaakakkede limwi kutebulu.”
^ Nkokuti, cakuma 3 koloko yamasiku kusikila kumapaswido aazuba cakuma 6 koloko.
^ Naa “bakamukotamina.”
