Luka 22:1-71
-
Bapaizi bapangana kumujaya Jesu (1-6)
-
Kulibambila Pobwe Lyakwiindilila lyamamanino (7-13)
-
Kutalisya Mulalilo wa Mwami (14-20)
-
“Ijanza lyasikundaaba lili andime kutebulu” (21-23)
-
Kuzwangana kapati kujatikizya mupati (24-27)
-
Cizuminano ca Jesu cabwami (28-30)
-
Businsimi bwakuti Petro ulamukaka Jesu (31-34)
-
Kuyandika kulibambila; mapanga obilo (35-38)
-
Mupailo wa Jesu aa Cilundu ca Maolifa (39-46)
-
Jesu waangwa (47-53)
-
Petro wamukaka Jesu (54-62)
-
Jesu wafwubaazyigwa (63-65)
-
Kubetekwa kumbele lya Nkuta Mpati Yaba Juda (66-71)
22 Lino Pobwe lya Zinkwa Zitajisi Bumena eelyo liitwa kuti Pobwe Lyakwiindilila+ lyakali afwaafwi.+
2 Alimwi basilutwe babapaizi abalembi bakali kuyandaula nzila mbotu yakuti bamujaye,+ nkaambo bakali kuyoowa bantu.+
3 Mpoonya Saatani wakamunjila mumoyo Judasi, ooyo wakali kwiitwa kuti Isikariote, iwakali umwi wabali Kkumi Ababili,+
4 eelyo wakaunka akuyakwaambaula abasilutwe babapaizi abasilutwe babalindizi batempele kujatikizya nzila yakumwaaba kulimbabo.+
5 Bakakondwa kumvwa makani aaya eelyo bakamvwana kumupa mali aansiliva.+
6 Aboobo wakazumina, eelyo wakatalika kuyandaula ciindi cibotu cakumwaaba kulimbabo kakunyina nkamu yabantu.
7 Lino buzuba bwa Zinkwa Zitajisi Bumena bwakasika, eelyo cipaizyo ca Pobwe Lyakwiindilila noceelede kupaizyigwa;+
8 aboobo Jesu wakatuma Petro a Johane, ulaamba: “Kamuya mukatubambile Pobwe Lyakwiindilila kutegwa tuzoolye.”+
9 Bakamubuzya kuti: “Ino nkuli nkoyanda kuti tukalibambile nkuko?”
10 Wakabaambila kuti: “Amubone! Mwanjila mumunzi, mulayaanya muntu uunyamwide nongo yamaanzi. Amumutobele kuŋanda njayoonjila.+
11 Alimwi mukamwini ŋanda mumwaambile kuti, ‘Mwiiyi ubuzya kuti: “Ino ili kuli ŋanda yabeenzu mondikonzya kulida Pobwe Lyakwiindilila abasikwiiya bangu?”’
12 Eelyo muntu ooyo uyoomutondezya ŋanda mpati yamujulu, iijisi zintu zyoonse ziyandika. Amukalibambile mumo.”
13 Aboobo bakaunka akujana zintu mbubonya mbwaakabaambila, mpoonya bakalibambila Pobwe Lyakwiindilila.
14 Aboobo ciindi nocakasika, wakakkala kutebulu abaapostolo.+
15 Eelyo wakabaambila kuti: “Ndali kuyandisya kapati kulya Pobwe Lyakwiindilila eeli andinywe nenditanapenga;
16 nkaambo ndimwaambila kuti, tandikalilyi limbi kusikila likazuzikizyigwe mu Bwami bwa Leza.”
17 Lino naakatambula nkapu, wakalumba amane wakaamba kuti: “Umwi aumwi wanu atambule nkapu eeyi akunywa kulinjiyo,
18 nkaambo ndimwaambila kuti, kuzwa lino tandikanywi limbi cakunywa cizwa kumusaansa kusikila bukasike Bwami bwa Leza.”
19 Alimwi wakabweza mukamu,+ wakalumba, wakaukomauna akubapa, ulaamba: “Eeci ciiminina mubili wangu+ uupegwa akaambo kandinywe.+ Kamucita oobu lyoonse kutegwa kamundiyeeya.”+
20 Wakacita mbubonya oobo kujatikizya nkapu nobakamana kulya cilalilo, ulaamba, “Inkapu eeyi yiiminina cizuminano cipya+ iciyeeme abulowa bwangu+ ibuyootilwa akaambo kandinywe.+
21 “Pele amubone! Ijanza lyasikundaaba lili andime kutebulu.+
22 Nkaambo masimpe Mwanaamuntu ulaunka kweelana ambokukanzidwe;+ pele nokuba boobo, maawe kumuntu ooyo iwaaba Mwanaamuntu!”+
23 Aboobo bakatalika kubuzyanya akati kabo ikuti naa nguni wabo mubwini wakali kuyanda kucita boobu.+
24 Pele alimwi bakatalika kuzwangana kapati akati kabo kujatikizya wakali kubonwa kuti ngomupati kwiinda boonse.+
25 Pele wakabaambila kuti: “Bami bamasi balabadyaaminina bantu, abalo aabo bajisi nguzu zyabweendelezi kubantu baambwa kuti Mbabasimalelo.+
26 Nywebo tamweelede kuba boobo.+ Pele ooyo mupati kwiinda boonse akati kanu abe mbuli musyoonto kwiinda boonse,+ awalo ooyo uusololela abe mbuli mubelesi wanu.
27 Ino nguni mupati, ooyo uulya kutebulu* naa ooyo uubeleka? Sena tali yooyo uulya kutebulu?* Pele mebo ndime ndibeleka akati kanu.+
28 “Nokuba boobo, nywebo ndinywe mwakakatila kulindime+ mumapenzi aangu;+
29 aboobo ndibamba cizuminano cabwami andinywe mbubonya Taata mbwaabamba cizuminano andime,+
30 kutegwa mukalye akunywa atebulu lyangu mu Bwami bwangu,+ akuti mukakkale azyuuno zyabwami+ akubeteka misyobo yabana Israyeli iili 12.+
31 “Simoni, Simoni, bona! Saatani uyanda kuti amupupulule nywebo nyoonse mbuli wiiti.+
32 Pele ndakukombelezyela mumupailo kuti lusyomo lwako lutamani;+ eelyo wapiluka ayebo ubayumye ibanyoko.”+
33 Mpoonya wakamwaambila kuti: “O Mwami, ndililibambilide kunjila anduwe muntolongo alimwi amulufwu.”+
34 Pele wakati: “Ndikwaambile Petro, imukombwe katanalila sunu, ulakazya ziindi zyotatwe kuti ulindizyi.”+
35 Alimwi wakababuzya kuti: “Nindakamutuma kamunyina cikwama camali ankomo yacakulya ampato,+ sena kuli cintu cili coonse ncomwakabula?” Bakati: “Peepe!”
36 Mpoonya wakabaambila kuti: “Pele lino ooyo uujisi cikwama camali acibweze, ncimwi buyo ankomo yacakulya, alimwi ooyo uutajisi panga asambale cisani cakwe caatala akuula panga.
37 Nkaambo ndimwaambila kuti cileelede kuzuzikizyigwa mulindime eeci cilembedwe kuti, ‘Wakabalilwa antoomwe abasikusotoka mulawo.’+ Nkaambo eeci cazuzikizyigwa mulindime.”+
38 Mpoonya bakati: “Mwami, bona! Ngaaya mapanga obilo.” Wakati kulimbabo: “Mbubo, manji ngoona aayo.”
39 Naakazwa, mbuli cilengwa wakaunka ku Cilundu ca Maolifa, abalo basikwiiya bakamutobela.+
40 Nobakasika kubusena oobo, wakati kulimbabo: “Amuzumanane kupaila kutegwa mutanjili mumasunko.”+
41 Eelyo walo wakabasiya akuunka mbuli waawo aasika bbwe lyafwuswa, mpoonya aawo wakafwugama akutalika kupaila,
42 ulaamba: “Taata, ikuti koyanda, koigusya nkapu eeyi kulindime. Nokuba boobo, kutabi kuyanda kwangu, pele akucitwe kuyanda kwako.”+
43 Mpoonya mungelo uuzwa kujulu wakalibonya kulinguwe akumuyumya-yumya.+
44 Pele wakapenga kapati mumoyo cakunga wakazumanana kupaila canguzu kapati;+ inkasaalo yakwe yakaba mbuli madosi aabulowa aalokela ansi.
45 Naakanyamuka aawo mpaakali kupailila, akuunka kuli basikwiiya bakwe, wakajana kuti baloona nkaambo bakalilemede akaambo kakuusa.+
46 Wakati kulimbabo: “Nkaambo nzi ncomoona? Amubuke muzumanane kupaila, kutegwa mutanjili mumasunko.”+
47 Lino naakacili kwaambaula, amubone! Kwakabbuka nkamu yabantu, alimwi imuntu wiitwa kuti Judasi, umwi wabali Kkumi Ababili wakali kumbele lyabo, eelyo wakaunka kuli Jesu kuti amumyonte.+
48 Pele Jesu wakati kulinguwe: “Judasi, sena waaba Mwanaamuntu kwiinda mukumumyonta?”
49 Aabo mbaakali limwi nobakabona cakali kuyanda kucitika, bakati: “O Mwami, sena tubalwane apanga?”
50 Umwi wabo mane wakauma muzike wamupaizi mupati akumukosola kutwi kwakululyo.+
51 Pele mukwiingula Jesu wakati: “Mbubo.” Eelyo wakajata kutwi kwakwe akumuponya.
52 Mpoonya Jesu wakaambila basilutwe babapaizi abasilutwe babalindizi bakutempele abaalu ibakaboola kubusena oobo kukumujata kuti: “Nkaambo nzi ncomwaboola kuti mundijate amapanga alimwi ankoli mbuli kuti muboola kuzoojata mubbi?+
53 Nindakali andinywe mutempele buzuba abuzuba+ tiimwakandijata pe.+ Pele eeci nceciindi canu aciindi cabweendelezi bwamudima.”+
54 Mpoonya bakamujata akumutola,+ baakumunjizya muŋanda yamupaizi mupati; pele Petro wakali kutobela alaale.+
55 Nobakakunka mulilo akati kalubuwa akukkala antoomwe, Petro wakalikkede akati kabo.+
56 Pele musimbi umwi mubelesi wakamubona kwiinda mubbalabala lyamulilo kakkede kuyota mulilo, eelyo wakamulangisya akwaamba kuti: “Ooyu mwaalumi awalo wakali anguwe.”
57 Pele wakakaka kati: “Yebo omusimbi, ooyu muntu tandimuzyi pe.”
58 Nokwakainda ciindi cisyoonto muntu umwi wakamubona akwaamba kuti: “Ayebo uli umwi wabo.” Pele Petro wakati: “Yebo muntu, mebo tandili umwi wabo pe.”+
59 Alimwi nokwakainda ciindi citandila kuwoola lyomwe, imwaalumi aumwi wakatalika kwaamba cakusinizya kuti: “Ndili masimpe kuti mwaalumi ooyu awalo wakali anguwe, nkaambo muna Galilaya!”
60 Pele Petro wakati: “Yebo muntu, mebo tandaazyi pe makani aayo ngoamba.” Ndilyonya eelyo, naakacili kwaambaula, mukombwe wakalila.
61 Mpoonya Mwami wakacenguluka akulanga Petro, eelyo Petro wakaayeeya majwi aa Mwami ngaakamwaambila aakuti: “Mukombwe katanalila sunu, ulandikaka ziindi zyotatwe.”+
62 Eelyo wakaunka anze akulila kapati.
63 Lino baalumi aabo ibakamujata Jesu bakatalika kumufwubaazya+ akumuuma;+
64 alimwi nobakamana kumuvwumba kumeso, bakali kumubuzya kuti: “Sinsima! Nguni wakuuma?”
65 Alimwi bakaamba zintu azimwi zinji zyakumusampaula.
66 Mpoonya nobwakaca, inkamu yabaalu akati kabantu, kubikkilizya abasilutwe babapaizi abalembi bakaswaangana,+ alimwi bakamunjizya mu Nkuta Mpati Yaba Juda, balaamba:
67 “Ikuti naa nduwe Kristo, kotwaambila.”+ Pele wakabaambila kuti: “Nokuba kuti ndamwaambila, kunyina nomunga mwasyoma pe.
68 Alimwi ikuti ndamubuzya mubuzyo, kunyina nomunga mwaingula pe.
69 Pele kuzwa lino Mwanaamuntu+ unookkede kujanza lyalulyo lyanguzu lya Leza.”+
70 Eelyo boonse bakati: “Aboobo, sena nkokuti yebo uli Mwana wa Leza?” Wakabaambila kuti: “Ndinywe nobeni nomwaamba kuti ndili Mwana wa Leza.”
71 Bakati: “Sena tuciyandika bumboni abumbi? Nkaambo swebo tobeni twalimvwida kaamba amulomo wakwe mwini.”+
