Jobu 1:1-22
1 Mucisi ca Uzi kwakali mwaalumi umwi wazina lyakuti Jobu.*+ Wakali mwaalumi uululeme alimwi uusyomeka;*+ wakali kuyoowa Leza akutantamuka cibi.+
2 Wakajisi bana basankwa bali ciloba abana basimbi botatwe.
3 Akati kazivwubwa zyakwe kwakali mbelele zili 7,000, nkamela zili 3,000, ŋombe zili 1,000* alimwi ambongolo* zili 500, alimwi wakalijisi ababelesi banji kapati cakuti wakaba mupati kwiinda bantu boonse ba Kujwe.
4 Umwi aumwi wabana bakwe basankwa wakali kuba apobwe kuŋanda yakwe bwasika buzuba mbwabikkide.* Bakali kutamba bacizyi babo botatwe kuti bakalye akunywa antoomwe ambabo.
5 Lino ainda mazuba aabo boonse aakuba apobwe, Jobu wakali kubaita kuti abasalazye. Mpoonya mafwumofwumo wakali kubuka akutuula zipaizyo zyakuumpa+ kweelana amweelwe wabo boonse. Nkaambo Jobu wakali kwaamba kuti: “Andiza bana bangu babisya akutukila Leza mumyoyo yabo.” Oobu mbombubo mbwaakali kucita Jobu lyoonse.+
6 Lino bwakasika buzuba eelyo bana* ba Leza mwini-mwini+ nibakaboola kuzikwiima kumbele lya Jehova,+ eelyo Saatani+ awalo wakaboola akwiima akati kabo.+
7 Mpoonya Jehova wakabuzya Saatani kuti: “Ino wazwa kuli?” Saatani wakavwiila Jehova kuti: “Ndazwa kukuzinguluka munyika akweendeenda mulinjiyo.”+
8 Kumane Jehova wakabuzya Saatani kuti: “Sena wamubona* mubelesi wangu Jobu? Kunyina muntu naba omwe uuli mbuli nguwe munyika. Mwaalumi uululeme alimwi uusyomeka,*+ uuyoowa Leza akutantamuka cibi.”
9 Mpoonya Saatani wakavwiila Jehova kuti: “Sena Jobu uyoowa Leza kakunyina kaambo?+
10 Sena yebo tonoomuyakila lukwakwa lwakumukwabilila ilumuzingulukide+ walo abamuŋanda yakwe kubikkilizya azintu zyoonse nzyajisi? Yebo waileleka milimo yamaanza aakwe,+ alimwi zivwubwa zyakwe zilimwaikide munyika.
11 Pele lino, kotandabika janza lyako unyonyoone zintu zyoonse nzyajisi, ulabona ulakutukila kolangilila.”
12 Aboobo Jehova wakaambila Saatani kuti: “Bona! Zyoonse nzyajisi zili mumaanza aako.* Pele walo utasoli kumujata ajanza lyako!” Eelyo Saatani wakazwa kumbele* lya Jehova.+
13 Lino ibuzuba bumwi bana bakwe basankwa abasimbi nibakali kulya akunywa waini muŋanda yamupati wabo musankwa,+
14 mutumwa wakaboola kuli Jobu akumwaambila kuti: “Ŋombe nizyali kulima ambongolo nizyali kucela kumbali lyanzizyo,
15 bana Seba batulwana akuzitola, alimwi bajaya babelesi apanga. Mebo endikke buyo ndime ndafwutuka kuti ndizookwaambile.”
16 Ooyu kacaambaula, kwakaboola umwi iwakaamba kuti: “Mulilo* waloka kuzwa kujulu kuli Leza akuvwutukila mbelele ababelesi, eelyo wabaumpa cakumaninina! Mebo endikke buyo ndime ndafwutuka kuti ndizookwaambile.”
17 Ooyu kacaambaula, aumwi wakaboola akwaamba kuti: “Ba Kasidi+ balibunga-bunga akupanga nkamu zyotatwe, mpoonya bavwuumukila nkamela akuzitola, alimwi bajaya babelesi apanga. Mebo endikke buyo ndime ndafwutuka kuti ndizookwaambile.”
18 Ooyu awalo kacaambaula, aumwi wakaboola akwaamba kuti: “Ibana bako basankwa abasimbi bali kulya akunywa waini muŋanda yamupati wabo musankwa.
19 Mpoonya kwaboola guwo pati kuzwa kunkanda, lyabbubbula mumakkona one aaŋanda cakuti yabawida bana bako, aboobo bafwa. Mebo endikke buyo ndime ndafwutuka kuti ndizookwaambile.”
20 Mpoonya Jobu wakanyamuka akuzapula cisani cakwe alimwi wakagela masusu aakwe; kumane wakaliwaala ansi akuvwuntama
21 akwaamba kuti:
“Ndakazwa mwida lyabaama amantanda,Alimwi ndiyoojokela amantanda.+
Jehova wakandipa,+ alimwi Jehova wandinyanga.
Alizumanane kutembaulwa izina lya Jehova.”
22 Muzintu zyoonse eezyi zyakamucitikila, Jobu tanaakabisya naa kupa Leza mulandu uuli woonse.*
Bupanduluzi buyungizyidwe
^ Naa “mwaalumi uunyina kampenda alimwi mululami.”
^ Ambweni lyaamba “Cintu Cisulidwe.”
^ Mu Chihebrayo, “zipani zyaŋombe zili 500.”
^ Mu Chihebrayo, “ambongolo zizyazi.”
^ Naa “kuŋanda yaumwi aumwi wabo casika ciindi cakwe.”
^ Maambilambali aamu Chihebrayo aamba bana ba Leza bangelo.
^ Mu Chihebrayo, “wabikka moyo wako ku.”
^ Naa “Mwaalumi uunyina kampenda alimwi mululami.”
^ Naa “munguzu zyako.”
^ Mu Chihebrayo, “kubusyu.”
^ Naa ambweni, “Lulabo.”
^ Naa “tanaakamwaamba cibi cili coonse Leza.”
