Jeremiya 33:1-26
33 Ijwi lya Jehova lyakamusikila Jeremiya ciindi cabili, kacaangidwe mu Lubuwa lwa Mulindizi+ kaliti:
2 “Mboobu mbwaamba Jehova Mulengi wanyika, Jehova, ooyo wakaibumba akwiikkazikizya; Jehova ndezina lyakwe,
3 ‘Kondikwiilila, eelyo ndilakuvwiila alimwi cakutasowa ciindi ndilakwaambila zintu zipati nzyotakonzyi kumvwisya alimwi eezyo nzyotazyi.’”+
4 “Nkaambo mboobu mbwaamba Jehova Leza wa Israyeli kujatikizya maanda aamunzi uuno akujatikizya maanda aabami ba Juda aayo aakakolomonwa akaambo kamayake aakusinkilizya munzi alimwi akaambo kapanga,+
5 alimwi akujatikizya baabo ibaboola kuzoolwana ba Kasidi, ikuzuzya masena aaya amitunta yabantu aabo mbondakajaya kandinyemede alimwi kandikalede, aabo ibapa kuti munzi ooyu nduusise busyu bwangu akaambo kabubi bwabo:
6 ‘Amubone ndilaupa kuti uyumye akupona kabotu,+ alimwi ndilabaponya akubayubunwida luumuno lunji kapati alimwi akasimpe.+
7 Ndiyoobapilusya bantu ba Juda baangidwe alimwi abantu ba Israyeli baangidwe,+ alimwi ndiyoobayaka mbubonya mbuli kumatalikilo.+
8 Ndiyoobasalazya kumilandu yoonse yazibi nzyobakandicitila,+ alimwi ndiyoobalekelela milandu yoonse yazibi azinyonyoono nzyobakandicitila.+
9 Munzi ooyu uyoondibeda zina lipa kusekelela, ntembauzyo alimwi abweebesi kumasi oonse aamunyika aayo aayoomvwa zyabubotu boonse mbondibacitila.+ Alimwi bayooyoowa kapati akukankama+ akaambo kabubotu boonse alimwi akaambo kaluumuno loonse ndondiyakuupa.’”+
10 “Mboobu mbwaamba Jehova: ‘Mubusena oobu mbomuyakwaamba kuti nditongo buyo litakwe muntu naba munyama uuvwubwa, inzya muminzi ya Juda alimwi amumigwagwa ya Jerusalemu eeyo iinyonyookede, iitakwe muntu naa bantu bakkala mumo nobaba banyama bavwubwa, muyoolimvwisya alimwi
11 majwi aakusekelela amajwi aakukondwa,+ ijwi lyasibwiinga ajwi lyanabwiinga, ijwi lyabaabo baamba kuti: “Amutembaule Jehova wamakamu, nkaambo Jehova mubotu;+ iluyando lwakwe lutamani nkoluli lyoonse mane kukabe kutamani!”’+
“‘Bayooleta cituuzyo cakulumba muŋanda ya Jehova,+ nkaambo mebo ndiyoobapilusya bantu bacisi eeci baangidwe, mbubonya mbuli kumatalikilo,’ mbwaamba Jehova.”
12 “Mboobu mbwaamba Jehova wamakamu: ‘Mubusena oobu bunyonyookede butajisi muntu naba munyama uuvwubwa amuminzi yambubo yoonse, muyooba macelelo alimwi, oomo beembezi mobanoolekela matanga aabo kubuwa.’+
13 “‘Muminzi yanyika yamalundu, muminzi yacooko cakunselelo, muminzi yakumusanza, muminzi yacisi ca Benjamini, mumasena aayengelede Jerusalemu+ alimwi amuminzi ya Juda,+ matanga ayakwiinda alimwi kunsi aamaanza aamuntu ooyo iwaabala,’ mbwaamba Jehova.”
14 “‘Amubone! Mazuba alaboola,’ mbwaamba Jehova, ‘eelyo ndiyoozuzikizya cisyomezyo cibotu ncindaamba kujatikizya bamuŋanda ya Israyeli abamuŋanda ya Juda.+
15 Mumazuba aayo alimwi akuciindi eeco, ndiyoopa kuti kuli Davida kusyuuke cisyuukila* ciluleme,+ eelyo uyoobeteka kabotu alimwi akucita bululami mucisi.+
16 Mumazuba aayo, Juda uyoofwutulwa+ awalo Jerusalemu uyookkala kaliibide.+ Alimwi mboobu mbwanakwiitwa: Jehova Mbululami Bwesu.’”+
17 “Nkaambo mboobu mbwaamba Jehova: ‘Muzyalani lya Davida takukabuli muntu uukkala acuuno cabwami cabamuŋanda ya Israyeli,+
18 abalo bapaizi ba Levi tabakabuli muntu wiima kumbele lyangu kuti katuula zituuzyo zyuumpwa buumbulu, kaumpa zituuzyo zyamaila alimwi akutuula zipaizyo lyoonse.’”
19 Lino ijwi lya Jehova lyakamusikila alimwi Jeremiya kaliti:
20 “Mboobu mbwaamba Jehova, ‘Ikuti naa nywebo mulakonzya kujaya cizuminano cangu casyikati alimwi acizuminano cangu camasiku, kutegwa syikati amasiku zitabiko aciindi canzizyo ceelede,+
21 nkokuti acalo cizuminano cangu a Davida mubelesi wangu inga cajaigwa+ kutegwa atabi amwana uulela kali mwami acuuno cakwe cabwami,+ acalo cizuminano cangu abapaizi ba Levi, basimilimo bangu,+ inga cajaigwa.
22 Mbubonya makamu aakujulu mbwaatakonzyi kubalwa, amusenga wakulwizi mboutakonzyi kupimwa, mbombubo mbondiyoovwuzya lunyungu lwamubelesi wangu Davida alimwi aba Levi ibandikutaukila.’”
23 Ijwi lya Jehova lyakamusikila alimwi Jeremiya, kaliti:
24 “Sena tomvwide nzyobaamba bantu aaba kuti, ‘Jehova uyakwiikaka mikowa yobilo eeyo njaakasala’? Alimwi banyansya bantu bangu, tabacibaboni kuti ncisi pe.
25 “Mboobu mbwaamba Jehova: ‘Masimpe, mbubonya mbondakabamba cizuminano cangu cijatikizya syikati alimwi amasiku,+ akubikka milawo yajulu ayanyika,+
26 nkokuti kunyina nondiyoolukaka lunyungu lwa Jakobo alwamubelesi wangu Davida, akutabweza bamwi ibalunyungu lwakwe kuti balele lunyungu lwa Abrahamu, Izaka a Jakobo. Nkaambo ndiyoobayobolola bantu babo baangidwe+ akubafwida lubomba.’”+
Bupanduluzi buyungizyidwe
^ Naa “sikukona.”
