Isaya 36:1-22
36 Mumwaka wa 14 wabweendelezi bwa Mwami Hezekiya, Sanakeribu mwami wa Asuri+ wakaboola kuzoolwana minzi iikwabilidwe yoonse ya Juda akwiizunda.+
2 Mpoonya mwami wa Asuri wakatuma Rabisake*+ kuzwa ku Lakisi+ kuti aunke ku Jerusalemu ku Mwami Hezekiya antoomwe ampi mpati yabasikalumamba. Eelyo bakaima kukagelo kacizyiba caatala,+ eeco cili kumugwagwa wamuunda wasikuwasya.+
3 Kumane Eliyakimu+ mwana wa Hilikiya, ooyo iwakali kulanganya basiŋanda yamwami,* antoomwe a Sebina+ mulembi alimwi a Joa mwana wa Asafu sikulemba makani bakazwa akuunka kulinguwe.
4 Mpoonya Rabisake wakabaambila kuti: “Amumwaambile Hezekiya kuti, ‘Mboobu mbwaamba mwami mupati, imwami wa Asuri: “Ino ncinzi cikupa kuba sicamba?+
5 Yebo waamba kuti, ‘Ndilizyi cakucita alimwi ndilaanguzu zyakulwana nkondo,’ pele majwi aaya taagwasyi pe. Ino nguni ooyo ngosyoma cakuti toyoowi kundizangila?+
6 Bona! Usyoma tete eeli lityokede, nkokuti Egepita, itete eelyo linga ikuti naa muntu wayaama aalindilyo, lilakonzya kumuyasa mujanza akubbila. Oobo mbwabede Farao mwami wa Egepita kulibaabo boonse bamusyoma.+
7 Alimwi ikuti naa undaambile kuti, ‘Tusyoma Jehova Leza wesu,’ sena tali nguwe uuli aamasena aakukombela alimwi azipaililo eezyo nzyaakamwaya Hezekiya,+ akwaambila bantu bamu Juda amu Jerusalemu kuti, ‘Mweelede kukotama ansi kumbele lyacipaililo eeci’?”’+
8 Lino nkooko, amubbejelane asimalelaangu, mwami wa Asuri:+ Ndilakupa mabbiza aali 2,000 tubone naa ulakonzya kwaajanina basikwaatanta.
9 Aboobo ino mbuti mbokonzya kutanda mweendelezi omwe muniini kapati akati kababelesi basimalelaangu, kakuli yebo usyoma nkalaki alimwi abasimabbiza baku Egepita?
10 Lino sena ndaliboolela buyo kakunyina kuzumizyigwa a Jehova kuzoolwana cisi eeci akucinyonyoona? Jehova lwakwe nguwakandaambila kuti, ‘Koya ukalwane cisi eeci akucinyonyoona.’”
11 Mpoonya Eliyakimu, Sebina+ alimwi a Joa bakaambila Rabisake+ kuti: “Twalomba kaka kuti ubandike ababelesi bako mumwaambo wa Chiaramu,*+ nkaambo tulaumvwa; utaambauli andiswe mumwaambo waba Juda kabamvwide bantu bali atala aabwaanda.”+
12 Pele Rabisake wakati: “Sena nkuuli simalelaako akulinduwe buyo nkwaandituma simalelaangu kuti ndizikwaambe majwi aaya? Sena takuli akubaalumi aabo bakkede atala aabwaanda nkwaandituma, aabo ibatiilye tubi twabo beni akunywa minsyu yabo beni antoomwe andinywe?”
13 Mpoonya Rabisake wakaima akoompolola ajwi lipati mumwaambo waba Juda,+ kuti: “Amumvwe majwi aamwami mupati, imwami wa Asuri.+
14 Mboobu mbwaamba mwami, ‘Mutalekeli Hezekiya kuti amucenge, nkaambo takonzyi kumuvwuna pe.+
15 Alimwi mutalekeli Hezekiya kumupa kusyoma Jehova+ kwiinda mukwaamba kuti: “Ncobeni Jehova ulatuvwuna, alimwi munzi ooyu taukokwaabwa mumaanza aamwami wa Asuri pe.”
16 Mutamuswiilili Hezekiya pe, nkaambo mboobu mbwaamba mwami wa Asuri: “Amumvwane andime akulibombya kulindime,* eelyo umwi aumwi wanu uyoolya kumusaansa wakwe mwini akumukuyu wakwe mwini, alimwi umwi aumwi wanu uyoonywa maanzi aazwa mumukalo wakwe mwini,
17 kusikila ndikaboole akumutola kunyika iili mbuli nyika yanu,+ inyika yamaila awaini mupya, inyika yacinkwa amyuunda yamisaansa.
18 Hezekiya atamucengi pe kwiinda mukwaamba kuti, ‘Jehova ulatuvwuna.’ Sena kuli leza akati kabaleza bamasi aambi wavwuna cisi cakwe mumaanza aamwami wa Asuri?+
19 Ino bali kuli baleza ba Hamati aba Aripadi?+ Ino bali kuli baleza ba Sefaravaimu?+ Alimwi sena bakamuvwuna Samariya mumaanza aangu?+
20 Ino nguni akati kabaleza boonse bamasi aaya iwavwuna cisi cakwe mumaanza aangu, cakuti Jehova awalo inga wavwuna Jerusalemu mumaanza aangu?”’”+
21 Pele balo bakaumuna buyo, tiibakamuvwiila noliba jwi lyomwe, nkaambo mwami wakabalailide kuti, “Mutakamuvwiili pe.”+
22 Pele Eliyakimu mwana wa Hilikiya, iwakali kulanganya basiŋanda bamwami,* Sebina+ mulembi, alimwi a Joa mwana wa Asafu sikulemba makani bakaunka kuli Hezekiya kabazapwide zisani zyabo akumwaambila majwi aa Rabisake.
Bupanduluzi buyungizyidwe
^ Naa “silutwe uutola zyakunywa kumwami.”
^ Naa “kulanganya ŋanda yamwami.”
^ Naa “waku Siriya.”
^ Mu Chihebrayo, “Amubambe cileleko andime muboole kulindime.”
^ Naa “kulanganya ŋanda yamwami.”
