Isaya 19:1-25
19 Ngaaya makani mapati aajatikizya Egepita:+
Amubone! Jehova utantide kkumbi libalika kapati alimwi uboola mu Egepita.
Baleza babuyo bamu Egepita bayookankama kumbele lyakwe,+Ayalo myoyo yabantu bali mucisi ca Egepita iyoozwa akaambo kakuyoowa.
2 “Ndiyookulwaizya bana Egepita kulwana bana Egepitanyina,Eelyo bayoolwana mulicabo,Umwi aumwi uyoolwana mwanookwabo alimwi amweenzinyina,Munzi uyoolwana munzinyina, bwami buyoolwana bwaminyina.
3 Bantu bali mucisi ca Egepita bayookopana mumizeezo,Alimwi ndiyoonyonganya makanze aancico.+
Eelyo bayoobuzya baleza babuyo,Basikuungula, ibaambaula amizimo alimwi abasikusonda.+
4 Ndiyakwaaba Egepita mumaanza aasimalelo muyumu moyo,Eelyo mwami ooyo uuyoobalela unooli mukali,”+ mbwaamba Mwami mwini-mwini, Jehova wamakamu.
5 Maanzi ayooyuminina mulwizi,Awalo mulonga uyooyuminina akulunda kasuko.+
6 Milonga iyoonunka nsu;Maanzi aamutugelo twamulonga wa Nile waku Egepita ayooceya akuyuminina.
Matete abwizu bwamumaanzi ziyoobola.+
7 Zisyango zili mumabali aa Mulonga wa Nile, eezyo zili kulwizi nkuutila maanzi Mulonga wa Nile,Amumyuunda yoonse iisyangidwe mbuto iili mumabali aa Mulonga wa Nile+ ziyooyuma.+
Zyoonse ziyootolwa amuwo, eelyo tazikabiko limbi pe.
8 Abalo bazubi banswi bayoolila,Aabo bawaala tulobyo mu Mulonga wa Nile bayakoomoka,Abalo aabo batandabula tunsabwe atala aamaanzi bayooceya.
9 Aabo babelesya ntali zyabutonje+Abaabo baluka masani aatuba bayoofwa nsoni.
10 Basikuluka bancico bayootyompwa;Babelesi boonse babelekela kuvwola bayakuusa kapati.
11 Basilutwe baku Zoani+ mbafwubafwuba.
Basikulaya ba Farao basongo kapati bapa lulayo lutagwasyi.+
Ino mbuti mbomukonzya kwaambila Farao kuti:
“Ndili mwana wabasongo,Mwana wabami bansiku”?
12 Ino lino bali kuli baalumi bako basongo?+
Ikuti kabazyi, abakwaambile makanze ngajisi Jehova wamakamu kujatikizya Egepita.
13 Basilutwe ba Zoani bacita cabufwubafwuba;Basilutwe ba Nofi*+ beenwa;Balupati-pati bamisyobo yakwe bapa kuti Egepita asweeke.
14 Jehova watila muuya wakuziluka aalinguwe;+Alimwi bapa kuti Egepita asweeke mumilimo yoonse njacita,Mbubonya mbuli muntu uukoledwe uudadalika mumalusi aakwe.
15 Alimwi Egepita takabi amulimo uuli woonse uukonzya kucitwa,Amutwe naa amucila, cisyuukila naa bwizu bwamumaanzi.*
16 Mubuzuba oobo Egepita uyooba mbuli bamakaintu, uyookankama akuyoowa kapati akaambo kajanza lya Jehova wamakamu ndyamweezyeka.+
17 Cisi ca Juda ciyooba cintu ciyoosya kuli Egepita. Kufwumbwa kucaamba buyo, banooyoowa kapati akaambo kamakanze Jehova wamakamu ngajisi aakubalwana.+
18 Mubuzuba oobo kuyooba minzi yosanwe mucisi ca Egepita yaambaula mwaambo waku Kanana+ alimwi akukonka kuti inoosyomeka kuli Jehova wamakamu. Munzi umwi unakwiitwa kuti Munzi Walunyonyooko.
19 Mubuzuba oobo kuyooba cipaililo ca Jehova akati kacisi ca Egepita, alimwi amusemu wa Jehova kumunyinza wancico.
20 Ciyooba citondezyo alimwi abumboni bwa Jehova wamakamu mucisi ca Egepita; nkaambo bayookwiilila Jehova akaambo kabasikubadyaaminina, eelyo walo uyoobatumina mufwutuli, muvwuni mupati, ooyo uuyoobafwutula.
21 Jehova uyoozyibwa kubana Egepita, alimwi bana Egepita bayoomuzyiba Jehova mubuzuba oobo, eelyo bayooleta zipaizyo azipego alimwi bayookonka kuli Jehova akuzuzikizya cikonke cabo.
22 Jehova uyakuuma cisi ca Egepita,+ uyoocuuma akuciponya; eelyo bayoopiluka kuli Jehova, mpoonya walo uyoomvwa kukombelezya kwabo akubaponya.
23 Mubuzuba oobo kuyooba mugwagwa mupati+ uuzwa mu Egepita kuya ku Asuri. Mpoonya bana Asuri bayoonjila mu Egepita, abalo bana Egepita bayoonjila mu Asuri, eelyo bana Egepita bayoobelekela Leza antoomwe abana Asuri.
24 Mubuzuba oobo Israyeli uyooba watatu antoomwe a Egepita alimwi a Asuri,+ bayooba cileleko mukati kanyika,
25 nkaambo Jehova wamakamu uyoobaleleka, kaamba kuti: “Abalelekwe bantu bangu, bana Egepita, amilimo yamaanza aangu, bana Asuri, alukono lwangu, bana Israyeli.”+
