Intembauzyo 148:1-14
148 Amumutembaule Ja!*
Amumutembaule Jehova nywebo nomuli mumajulu;+Amumutembaule nywebo nomuli kujulu.
2 Amumutembaule, nywebo nobangelo bakwe nyoonse.+
Amumutembaule, nywebo nomakamu aakwe oonse.+
3 Amumutembaule, nozuba amwezi.
Amumutembaule, nyoonse nonyenyeezi zimweka.+
4 Amumutembaule, nomajulu aamajuluAnywebo nomaanzi aali atala lyamajulu.
5 Azitembaule zina lya Jehova;Nkaambo walo nguwakalailila, eelyo zyakalengwa.+
6 Ulazibamba kuti kaziliko lyoonse alyoonse mane kukabe kutamani;+Wabikka mulawo ooyo uutakamani.+
7 Amumutembaule Jehova nywebo nomuli anyika,Nozilenge zipati zyamulwizi andinywe nyoonse nomaanzi malamfwu,
8 Yebo okalabo acivwulamabwe, ocaanda amakumbi aasiya mbi,Oguwo lyuungisya, oozuzikizya jwi lyakwe,+
9 Nomalundu anotulundu-lundu toonse,+Nozisamu zizyala micelo anyoonse nomasamu aakkedari,+
10 Nobanyama bamusyokwe+ anyoonse nobanyama bavwubwa,Nozilenge zikalaba ansi anywebo nobayuni bauluka,
11 Nobami baanyika anyoonse nomisyobo yabantu,Nobasilutwe anyoonse nobabetesi baanyika,+
12 Nobalombwana anywebo nobasimbi,*Nobamadaala antoomwe abana.*
13 Boonse abatembaule zina lya Jehova,Nkaambo zina lyakwe lilikke ndelisumpukide kapati.+
Ibulemu bwakwe bwiinda nyika ajulu.+
14 Uyooyungizya nguzu* zyabantu bakwe,Kuti bantu bakwe basyomeka boonse batembaulwe,Nkokuti bana ba Israyeli, bantu balaafwaafwi anguwe.
Amumutembaule Ja!*
Bupanduluzi buyungizyidwe
^ Naa “Aleluya!” “Ja” nkufwiinsyigwa kwazina lyakuti Jehova.
^ Mu Chihebrayo, “nobanakalindu.”
^ Naa “Nobapati antoomwe abana.”
^ Mu Chihebrayo, “Uyoosumpula lwija.”
^ Naa “Aleluya!” “Ja” nkufwiinsyigwa kwazina lyakuti Jehova.
