Ezekieli 30:1-26
30 Alimwi ijwi lya Jehova lyakandisikila kaliti:
2 “Omwanaamuntu, kosinsima waambe kuti, ‘Mboobu mbwaamba Mwami Singuzuzyoonse Jehova:
“Amulile kuti, ‘Maawe, buzuba bwasika!’
3 Nkaambo buzuba bulaafwaafwi, inzya, buzuba bwa Jehova bulaafwaafwi.+
Bunooli buzuba bwamakumbi,+ ciindi cibikkidwe cakubeteka masi.+
4 Ipanga liyoosikila cisi ca Egepita, alimwi cisi ca Etiopiya ciyoozyingwa ciindi bantu baakujaigwa mu Egepita;Ilubono lwancico lwaakutolwa, azyalo ntalisyo zyancico zyaakunyonyoonwa.+
5 Cisi ca Etiopiya,+ ca Puti,+ ca Ludi alimwi amisyobo-misyobo yabantu boonse,*Acisi ca Kubi antoomwe abana bamucisi cacizuminano,*Boonse buyo bayoojaigwa apanga.”’
6 Mboobu mbwaamba Jehova:
‘Aabo bagwasya cisi ca Egepita abalo bayakuwa,Azyalo nguzu zyancico izicipa kulisumpula ziyooletwa ansi.’+
“‘Bayoojaigwa apanga mucisi kuzwa ku Migidoli+ kusikila ku Sevene,’+ mbwaamba Mwami Singuzuzyoonse Jehova.
7 ‘Cisi cabo ciyoonyonyoonwa kapati kwiinda zisi zimbi; ayalo minzi yancico iyoonyonyoonwa kapati kwiinda minzi imbi.+
8 Eelyo bayoozyiba kuti ndime Jehova ndaakuvwutusya mulilo mu Egepita alimwi baakupwayaulwa boonse aabo bamvwana ancico.
9 Mubuzuba oobo, ndiyootuma batumwa kutegwa bakape kuti Etiopiya uulisyoma akakankame; bayoozyingwa kapati mubuzuba oobo ibuyoosikila Egepita, nkaambo ncobeni buyoosika.’
10 “Mboobu mbwaamba Mwami Singuzuzyoonse Jehova: ‘Ndiyakwaamana makamu aa Egepita kwiinda mukubelesya janza lya Mwami Nebukadinezara* wa Babuloni.+
11 Walo abasikalumamba bakwe, basilunya kapati kwiinda masi aambi,+ bayooletwa kuzoonyonyoona cisi. Bayoosomona mapanga aabo ikulwana Egepita akuzuzya cisi amitunta yabantu.+
12 Ndiyoosandula tugelo twa Nile+ kuba nyika njumu alimwi cisi ndiyoocisambala mumaanza aabantu babi. Ndiyoocinyonyoona cisi azintu zyoonse zili mumo kwiinda mukubelesya janza lyabamuzwakule.+ Mebo lwangu, nde Jehova, ndime ndaamba.’
13 “Mboobu mbwaamba Mwami Singuzuzyoonse Jehova: ‘Alimwi ndiyoonyonyoona mituni iisesemya* akulobya baleza babuyo baku Nofi.*+ Takukabi limbi silutwe wamucisi ca Egepita, alimwi ndiyoopa kuti kube buyoofwu mucisi ca Egepita.+
14 Ndiyoonyonyoona Patirosi,+ ndiyoovwutusya mulilo mu Zoani, alimwi akusubula munzi wa No.*+
15 Ndiyootila bukali bwangu aali Sini, munzi muyumu wa Egepita, alimwi ndiyoonyonyoona bantu boonse bakkala mu No.
16 Ndiyoovwutusya mulilo mu Egepita; Sini uyooyoowa kapati, No uyoopwaigwa, mpoonya Nofi* uyoolwanwa masyikati!
17 Balombwana baku Oni* aku Pibeseti bayoojaigwa apanga, abalo bantu bamuminzi bayootolwa mubuzike.
18 Mumunzi wa Tahapanesi ibuzuba buyoosiya ciindi majoko aa Egepita ndaakwaatyola ooko.+ Nguzu zyanguwo izipa kuti kaulisumpula ziyoomana,+ makumbi ayakuuvwumba, abalo bantu bamutunzi twanguwo bayootolwa mubuzike.+
19 Ndiyoomusubula Egepita, eelyo bayoozyiba kuti ndime Jehova.’”
20 Lino mumwaka wa 11, mumwezi wakusaanguna, mubuzuba bwaciloba bwamwezi, ijwi lya Jehova lyakandisikila kaliti:
21 “Omwanaamuntu, ndalityola janza lya Farao mwami wa Egepita; talikaangwi kutegwa lipone naa kuzambailwa tusani kutegwa liyume akucikonzya kunyamuna panga.”
22 “Aboobo, mboobu mbwaamba Mwami Singuzuzyoonse Jehova: ‘Amubone ndilamulwana Farao mwami wa Egepita,+ ndilatyola maanza aakwe, ijanza lyakwe liyumu aleelyo lityokede,+ alimwi ndilapa kuti panga lili mujanza lyakwe liloke.+
23 Mpoonya ndiyoomwaya bana Egepita akati kamasi akubapalanganya muzisi zimbi.+
24 Ndiyooyumya maanza aamwami wa Babuloni+ akubikka panga lyangu mujanza lyakwe,+ ndiyootyola maanza aa Farao, eelyo walo uyootongela kumbele lyakwe* mbuli muntu uufwumba bulamfwu.
25 Ndiyooyumya maanza aamwami wa Babuloni, pele maanza aa Farao ayoogonkelwa; eelyo bayoozyiba kuti ndime Jehova ndaakubikka panga lyangu mujanza lyamwami wa Babuloni alimwi walo aakulibelesya kulwana cisi ca Egepita.+
26 Ndiyoobamwaya bana Egepita akati kabantu bamasi akubapalanganya muzisi zimbi,+ eelyo bayoozyiba kuti ndime Jehova.’”
Bupanduluzi buyungizyidwe
^ Naa “abantu boonse bamumasi aambi.”
^ Ambweni kwaamba bana Israyeli ibakali kumvwana abana Egepita.
^ Mu Chihebrayo, “Nebukadirezara,” nzila imbi mbolilembwa zina eeli.
^ Naa “Mofi.”
^ Mu Chihebrayo kuboneka kuti bbala eeli liliswaangene abbala lyaamba “bufwumba” alimwi lilabelesyegwa kwaamba cintu cisesemya.
^ Nkokuti, Tebesi.
^ Naa “Mofi.”
^ Nkokuti, Heliopolisi.
^ Nkokuti, kumbele lyamwami wa Babuloni.
