Baroma 9:1-33
9 Ndaamba masimpe muli Kristo; tandibeji pe, nkaambo manjezyeezya aangu ngokamboni wangu mukuzuminana amuuya uusalala,
2 kuti ndiluuside kapati akuti moyo wangu ulacisa lyoonse.
3 Nkaambo inga ndalombozya kuti mebo lwangu ndizandulwe kuli Kristo alimwi akusinganizyigwa mubusena bwabakwesu, ibantu bamukowa wangu bakumubili,
4 aabo bali mbana Israyeli. Aaba Leza mbaakapa coolwe cakuba bana bakwe+ alimwi akubapa bulemu, zizuminano,+ Mulawo,+ mulimo uusetekene+ alimwi azisyomezyo.+
5 Muli baaba mobazulilwa abamatata+ alimwi ngomukowa mwaakazwa Kristo.+ Leza iweendelezya zintu zyoonse, aatembaulwe kukabe kutamani. Ameni.
6 Pele tacili mbuli kuti jwi lya Leza lyaalilwa pe. Nkaambo tabali boonse bazyalwa kuli Israyeli banga bategwa “mbana Israyeli” beni-beni.+
7 Alimwi tabali boonse bategwa mbana bakwe pe akaambo kakuti mbalunyungu lwa Abrahamu;+ pele kulembedwe kuti: “Iluyootegwa ndunyungu lwako luyoozwa muli Izaka.”+
8 Nkokuti, ibana bakumubili tabali bana ba Leza beni-beni pe,+ pele bana bazyalwa kwiinda mucisyomezyo+ mbabaambwa kuti ndunyungu.
9 Nkaambo ijwi lyacisyomezyo lyakaamba kuti: “Aciindi nciconya eeci ndiyooboola, eelyo Sara uyoozyala mwana musankwa.”+
10 Pele cisyomezyo tiicakapegwa buyo ciindi eeci pe, pele cakapegwa aleelyo Rebeka naakamita bana bamaanga kuli Izaka taateesu;+
11 nkaambo kabatanazyalwa alimwi kabatanacita cintu cili coonse cibotu naa cibi, ikutegwa makanze aa Leza kujatikizya kusala azumanane kucitika ikutali akaambo kamilimo, pele akaambo kayooyo wiita,
12 Rebeka wakaambilwa kuti: “Mupati uyooba muzike wamusyoonto wakwe.”+
13 Mbubonya mbokulembedwe kuti: “Jakobo ndakamuyanda, pele Esau ndakamusula.”+
14 Aboobo ino twaambe nzi? Sena kuli kutalulama kuli Leza? Peepe!+
15 Nkaambo kuli Musa waamba kuti: “Ndiyoomufwida luse kufwumbwa ngondiyanda kufwida luse, alimwi ndiyoomufwida luzyalo kufwumbwa ngondiyanda kufwida luzyalo.”+
16 Aboobo tacili kumuntu uulombozya naa kusolekesya kwakwe,* pele cili kuli Leza uufwida luse.+
17 Nkaambo lugwalo lwaambila Farao kuti: “Ikaambo ncondakulekela kuti kocipona nkakuti: kwiinda mulinduwe nditondezye nguzu zyangu akuti izina lyangu lyaambilizyigwe munyika yoonse.”+
18 Aboobo kufwumbwa ngwaayanda ulamufwida luse, alimwi kufwumbwa ngwaayanda ulamulekela kuba sicinguni.+
19 Aboobo umwi inga wandibuzya kuti: “Ino nkaambo nzi ncacijanina milandu? Nkaambo ino nguni iwakakukazya kale kuyanda kwakwe?”
20 Pele ino nduwe ni yebo omuntu ookazyanya a Leza?+ Sena cintu cibumbidwe cilakonzya kwaambila yooyo wakacibumba kuti: “Nkaambo nzi ncookandibumbila boobu?”+
21 Sena tamuzyi kuti mubumbi ulijisi nguzu zyakubumba+ cibelesyo cilemekwa alimwi acibelesyo citalemekwi kuzwa kubulongo bomwe?
22 Ino mbuti kuti Leza wakali kuyanda kutondezya bukali bwakwe akupa kuti nguzu zyakwe zizyibwe, alimwi wakazyeengelela akuzikkazikila moyo kapati izibelesyo zyabulongo zyabukali izyeelela kunyonyoonwa?
23 Alimwi ino mbuti ikuti wakacita boobo ikutegwa azyibye mbobuli bupati kapati bulemu bwakwe kuzibelesyo zyabulongo zyaluse,+ eezyo nzyaakabambila limwi kutegwa zikalemekwe,
24 nkokuti swebo, aabo mbaakaita ikutali buyo kuzwa akati kaba Juda balikke pele alimwi akuzwa mumasi?+
25 Cili buyo mbuli mbwaamba alimwi mubbuku lya Hosea kuti: “Aabo ibatali bantu bangu+ ndiyoobaita kuti ‘nobantu bangu,’ amukaintu ngondatakali kuyanda kuti, ‘ooyandwa’;+
26 alimwi mubusena oomo mobakali kwaambilwa kuti, ‘Nywebo tamuli bantu bangu,’ bayakwiitwa kuti ‘mbana ba Leza muumi.’”+
27 Kunze lyaboobo, ikujatikizya Israyeli, Isaya woompolola kuti: “Nokuba kuti mweelwe wabana ba Israyeli kauli mbuli musenga wakulwizi, ibasyeede balikke mbabayoofwutulwa.+
28 Nkaambo Jehova* uyoobeteka milandu anyika, uyakwiibeteka cakulondola akwiikosola cakufwambaana.”+
29 Alimwi mbubonya Isaya mbwaakaambila limwi kuti: “Ikuti Jehova* wamakamu naatakatusiila lunyungu, notwali buyo mbuli Sodoma, alimwi notwalikozyenye a Gomora.”+
30 Aboobo ino twaambe nzi? Tulati bantu bamasi, nokuba kuti tababutobeli bululami, bakabujana bululami,+ ibululami bujanwa kwiinda mulusyomo;+
31 pele bana Israyeli nokuba kuti bakali kusola kutobela mulawo wabululami, tiibakasika ambaakani yamulawo ooyo.
32 Nkaambo nzi? Nkaambo tiibakautobela calusyomo, pele bakacita boobo mbuli kuti bujanwa kwiinda mumilimo. Bakalebwa “abbwe lileba”;+
33 mbubonya mbokulembedwe kuti: “Amubone! Ndibikka bbwe lilebya mu Ziyoni+ alimwi amwala uupa kuwa, pele ooyo uusyoma mwala ooyu takatyompwi pe.”+
Bupanduluzi buyungizyidwe
^ Mu Chigiriki, “tacili kumuntu uulombozya naa uubalika.”
^ Amubone Makani Aayungizyidwe A5.
^ Amubone Makani Aayungizyidwe A5.
