Baroma 1:1-32
1 Ndime Paulo, imuzike wa Kristo Jesu nendakaitwa kuti ndibe mwaapostolo alimwi nendakasalwa kwaambilizya makani mabotu aa Leza.+
2 Aaya ngamakani mabotu Leza ngaakasyomezya musyule kwiinda mubasinsimi bakwe mu Magwalo aasalala.
3 Ajatikizya Mwanaakwe iwakazyalwa amubili wanyama mulunyungu lwa Davida,+
4 pele iwakaambilizyigwa canguzu kuti Mwana wa Leza+ ikweelana amuuya wabusalali kwiinda mububuke kuzwa kubafwu,+ inzya nkokuti Jesu Kristo Mwami wesu.
5 Kwiinda mulinguwe twakatambula luzyalo lwa Leza alimwi abwaapostolo+ kutegwa bantu bamumasi+ oonse bamumvwide akaambo kalusyomo akulemeka zina lyakwe.
6 Mumasi ngoonya aayo anywebo momwakazwa akwiitwa kuti mubalilwa kuli Jesu Kristo—
7 inywebo nyoonse nomuli mu Roma aabo Leza mbayandisya, ibakaitwa kuba basalali:
Amube aluzyalo alimwi aluumuno kuzwa kuli Leza Taateesu a Mwami wesu Jesu Kristo.
8 Ikusaanguna, ndilumba Leza wangu kwiinda muli Jesu Kristo kujatikizya ndinywe nyoonse, nkaambo lusyomo lwanu lulaambwa munyika yoonse.
9 Nkaambo Leza ooyo ngondibelekela mulimo uusetekene camoyo woonse kujatikizya makani mabotu aa Mwanaakwe, ngokamboni wangu kujatikizya mbondimubandauka lyoonse cakutaleka mumipailo yangu,+
10 akulomba kuti ndicikonzye kuboola kulindinywe ikuti kakuli kuyanda kwa Leza.
11 Nkaambo ndilayandisisya kumubona, kuti ndimupe cipego cakumuuya cimwi ikutegwa muyumizyigwe;
12 naa kutegwa kube kuyumizyanya+ kwiinda mulusyomo lwaumwi amweenzinyina, nkokuti lwanu alwangu.
13 Pele tandiyandi kuti kamutazyi bakwesu, kuti ziindi zinji ndalikukanza kuti ndiboole kulindinywe, pele ndakakilwa kusikila lino. Ndiyanda kuti ndikajane micelo imwi akati kanu mbubonya mbondikanzide kujana akumasi aambi.
14 Ndili sicikwelete kuba Giriki akubamuzwakule,* kubasongo akubafwubafwuba.
15 Aboobo ndiliyandide kapati kwaambilizya makani mabotu akulindinywe nomuli kooko ku Roma.+
16 Nkaambo taanduusyi nsoni makani mabotu;+ kayi ninguzu zya Leza zyalufwutuko kubantu boonse bajisi lusyomo,+ kusaanguna kumu Juda+ mpoonya kumu Giriki.+
17 Nkaambo mulingawo bululami bwa Leza bulatondezyegwa kwiinda mulusyomo, eelyo lusyomo oolo lulayumizyigwa,+ mbubonya mbokulembedwe kuti: “Pele mululami uyoopona akaambo kalusyomo.”+
18 Nkaambo bukali bwa Leza+ bulatondezyegwa kuzwa kujulu kubantu boonse batayoowi Leza alimwi abataluleme ibasinkilila kasimpe+ munzila iitaluleme,
19 nkaambo izikonzya kuzyibwa kujatikizya Leza zilalibonya akati kabo, akaambo kakuti Leza wakazibikka aatuba kulimbabo.+
20 Nkaambo bube bwakwe butalibonyi bulalibonya caantangalala kuzwa ciindi naakalenga nyika kuyakumbele, nkaambo bulabonwa muzintu nzyalengede,+ noziba nguzu zyakwe zitamani+ akuti ngu Leza ncobeni,+ cakuti tabajisi cilitamizyo pe.
21 Nkaambo nokuba kuti bakalimuzyi Leza, kunyina nobakamulemeka kuti ngu Leza nokuba kumulumba, pele bakali kuyeeya buyo zyabuyo alimwi myoyo yabo yabufwubafwuba yakaba mumudima.+
22 Nokuba kuti bakali kulyaamba kuti mbasongo, bakaba bafwubafwuba
23 akusandula bulemu bwa Leza uutakonzyi kufwa kuba mbuli bwacikozyanyo camuntu uufwa, cabayuni, cazilenge zijisi maulu one alimwi acabanyama bakalaba.+
24 Aboobo, kweelana azisusi zyamyoyo yabo, Leza wakabalekela kuti bacite busofwaazi, ikutegwa mibili yabo isampaulwe akati kabo.
25 Bakaleka kasimpe ka Leza akutobela bubeji alimwi bakalemeka* akubelekela zilenge mulimo uusetekene muciindi ca Mulengi, uutembaulwa kukabe kutamani. Ameni.
26 Nkakaambo kaako Leza ncaakabalekela kutobela zisusi zyakoonana zijazya nsoni,+ nkaambo bamakaintu akati kabo bakaleka bukkale mbobakazyalwa abwalo bwakoonana abaalumi akutobela zitondwa kwiinda mukoonana mulicabo;+
27 alimwi abalo baalumi mbubonya bakaleka koonana abamakaintu pele bakatalika kupya azisusi zyakoonana akati kabo beni, baalumi bakatalika koonana abaaluminyina,+ kabacita zisapi zisesemya, aboobo balalitambuda cisubulo ceelede iceelene azibi zyabo.+
28 Aboobo, mbubonya mbobatakayanda kuba aluzyibo lwini-lwini kujatikizya Leza,* Leza wakabalekela kuba amizeezo mibi, kutegwa bacite ziteelede.+
29 Bakazwide kutalulama kwamisyobo yoonse,+ bubi, busyaacivwulemwangu,*+ bakali kucita zibi, bakazwide munyono,+ bujayi,+ bulwani, lweeno,+ lusulo,+ bakali basikuvwiya,
30 basikubejelezya,+ ibasulaika Leza, basikasampusampu, basikulisumpula, basikulikankaizya, basikutalisya zintu zibi, bataswiilili bazyali,+
31 batamvwisyi,+ batabambi zizuminano, batajisi luyando lwakuzyalwa aandulo, alimwi batakwe luse.
32 Nokuba kuti aaba baluuzyi kabotu mulawo wa Leza uululeme wakuti aabo bacita zintu zili boobu beelede kufwa,+ tabazumanani buyo kuzicita pele alimwi balabakkomanina aabo bazicita.
Bupanduluzi buyungizyidwe
^ Naa “akuli baabo batali ba Giriki.”
^ Naa “bakakomba.”
^ Naa “mbubonya mbobatakayanda kumuzyiba ncobeni Leza.”
^ Naa “kunyomenena.”
