Bagalatiya 3:1-29
-
Kucita milimo yaambwa mu Mulawo naa lusyomo (1-14)
-
Mululami uyoopona akaambo kalusyomo (11)
-
-
Cisyomezyo ca Abrahamu ikutali kwiinda mu Mulawo (15-18)
-
Lunyungu lwa Abrahamu, Kristo (16)
-
-
Matalikilo alimwi amulimo wa Mulawo (19-25)
-
Bana ba Leza kwiinda mulusyomo (26-29)
-
Lunyungu lwa Abrahamu, aabo bazulilwa kuli Kristo (29)
-
3 Inywebo nobana Galatiya bafwubafwuba! Ino nguni wakamucenga boobu,+ nywebo nomwakapandulwidwa munzila iisalede kuti Jesu Kristo wakagagailwa aacisamu?+
2 Ndiyanda kumubuzya* cintu eeci comwe: Sena mwakatambula muuya akaambo kakucita milimo yaambwa mumulawo naa akaambo kakusyoma nzyomwakamvwa?+
3 Ino inga mwafwubaala buti boobu? Mbwaanga mwakatalika munzila yakumuuya, sena lino muyanda kumanizya munzila yakumubili?+
4 Sena mwakacitikilwa mapenzi manji cabuyo? Nkaambo tandisyomi kuti ncobeni mwakapenga cabuyo.
5 Aboobo, sena ooyo uumupa muuya akucita milimo mipati+ akati kanu ucita boobo akaambo kakuti mutobela mulawo naa akaambo kakusyoma nzyomwakamvwa?
6 Mbubonya buyo Abrahamu “wakasyoma Jehova,* eelyo wakabonwa kuti mululami.”+
7 Masimpe mulizyi kuti aabo ibakakatila mulusyomo mbabana ba Abrahamu.+
8 Lino lugwalo, kwiinda mukubonena limwi kuti Leza uyakwaamba bantu bamasi kuti baliluleme kwiinda mulusyomo, lwakaambilizya makani mabotu kuli Abrahamu zintu kazitanacitika kuti: “Kwiinda mulinduwe masi oonse ayoolongezyegwa.”+
9 Aboobo aabo ibakakatila mulusyomo balalongezyegwa antoomwe a Abrahamu iwakajisi lusyomo.+
10 Nkaambo boonse aabo ibasyoma milimo yaambwa mumulawo balisinganizyidwe, nkaambo kulilembedwe kuti: “Ulisinganizyidwe muntu oonse uutazumanani kutobela zintu zyoonse zilembedwe mubbuku lya Mulawo alimwi uutaziciti.”+
11 Kunze lyaboobo, cilisalede kuti kunyina muntu waambwa kuti mululami kuli Leza+ akaambo kamulawo, nkaambo “mululami uyoopona akaambo kalusyomo.”+
12 Lino Mulawo tuuyeeme alusyomo pe. Muciindi caboobo, “kufwumbwa muntu uucita zintu eezyi unoopona akaambo kanzizyo.”+
13 Kristo wakatuula swebo,+ ikutunununa+ kukusinganizyigwa a Mulawo kwiinda mukuba muntu uusinganizyidwe lwakwe muciindi candiswe, nkaambo kulilembedwe kuti: “Ulisinganizyidwe muntu uuli woonse uugagailidwe* aacisamu.”+
14 Cakaba boobu kutegwa zilongezyo zya Abrahamu zibasikile bantu bamasi kwiinda muli Kristo Jesu,+ ikutegwa tutambule muuya wakasyomezyegwa+ akaambo kalusyomo lwesu.
15 Bakwesu, ndipa cikozyanyo cizwa kubukkale bwabantu bwabuzuba abuzuba: Ikuti cizuminano casinizyigwa kale, nokuba kuti casinizyigwa amuntu omwe buyo, kunyina muntu naba omwe uucimwaya naa kuyungizya zimwi zintu kulincico.
16 Lino zisyomezyo zyakaambwa kuli Abrahamu akulunyungu lwakwe.+ Tiikwakaambwa kuti: “Akunyungu zyako,” mbuli kuti nzinji. Pele kwakaambwa lomwe kuti: “Akulunyungu lwako,” nkokuti Kristo.+
17 Alimwi andaambe kuti: Mulawo iwakapegwa nokwakainda myaka iili 430 + kunyina noumwaya cizuminano eeco Leza ncaakabamba musyule, kutegwa ucilobye cisyomezyo.
18 Nkaambo ikuti lukono kaluyeeme amulawo, nkokuti taluciyeeme acisyomezyo pe; pele Leza walo walupa Abrahamu kwiinda mucisyomezyo.+
19 Aboobo ino Mulawo ngwanzi? Wakayungizyigwa ikutegwa kusotoka mulawo kulibonye,+ kusikila lunyungu oolo lukasike,+ oolo lwakasyomezyegwa; alimwi wakapegwa abangelo+ kujanza lyasimwiimaakati.+
20 Lino kunyina simwiimaakati nokujatikizyidwe buyo muntu omwe, pele Leza uli buyo omwe.
21 Aboobo, sena Mulawo ulakazyanya azisyomezyo zya Leza? Peepe! Nkaambo ikuti nokwakapegwa mulawo iwakali kukonzya kupa buumi, mubwini bululami nobwakali kujanwa kwiinda mumulawo.
22 Pele Magwalo akatola zintu zyoonse mubwaange bwacibi, ikutegwa cisyomezyo icizuzikizyigwa akaambo kalusyomo muli Jesu Kristo cipegwe kuli baabo ibasyoma.
23 Nokuba boobo, ilusyomo oolo kalutanasika, twakali kukwabililwa amulawo, twakali kutolwa mubwaange, katulangila lusyomo oolo ilwakali kuyooyubununwa.+
24 Aboobo Mulawo waba musolozi* wesu uututola kuli Kristo,+ ikutegwa twaambwe kuti tuli balulami akaambo kalusyomo.+
25 Pele mbwaanga lino lusyomo oolo lwasika,+ tatucili mumaanza amusolozi* pe.+
26 Mubwini, nywebo nyoonse muli bana ba Leza+ kwiinda mulusyomo ndomujisi muli Kristo Jesu.+
27 Nkaambo nywebo nyoonse nomwakabbapatizyigwa muli Kristo musamide Kristo.+
28 Kunyina mu Juda naa mu Giriki,+ kunyina muzike naa muntu waangulukide,+ kunyina musankwa naa mukaintu,+ nkaambo nywebo nyoonse muli omwe mukukamantana a Kristo Jesu.+
29 Kunze lyaboobo, ikuti kamubalilwa kuli Kristo, nkokuti muli lunyungu* lwa Abrahamu ncobeni,+ basikukona+ kweelana acisyomezyo.+
Bupanduluzi buyungizyidwe
^ Mu Chigiriki, “kuzyiba.”
^ Amubone Makani Aayungizyidwe A5.
^ Mu Chigiriki, “waanzikidwe.”
^ Nkokuti, muntu iwakali kulanganya naa kukwabilila mwana.
^ Nkokuti, muntu iwakali kulanganya naa kukwabilila mwana.
^ Naa “bana.”
